စစ်ကောင်စီရဲ့ အရှေ့မြောက်တိုင်းစစ်ဌာနချုပ် အခြေစိုက် လားရှိုးမှာ အလံဖြူထောင် လက်နက်ချ အညံ့ခံခဲ့တဲ့ စစ်သည်တွေရဲ့ မိသားစုဝင် ၃၀၀ ကျော်ကို ဩဂုတ် ၆ ရက်မှာ ပြန်လွှတ်ပေးလိုက်ကြောင်း တော်လှန်ရေးအသိုက်အဝန်းနဲ့ ဒေသခံတွေဆီက သိရပါတယ်။

“လားရှိုးမှာ လက်နက်ချ အညံ့ခံခဲ့တဲ့ စစ်သည်တွေရဲ့ မိသားစုဝင်တွေကို စစ်ပွဲနဲ့မသက်ဆိုင်လို့ ကျနော်တို့ ပြန်လွှတ်ပေး‌နေတာ ဖြစ်ပါတယ်။ မဟာမိတ်အချင်းချင်း ကူညီတဲ့အနေနဲ့ SSPP က လမ်းမှာ ကျနော်တို့ကို တဝက်လာပြီးတာ့ ကူညီပေး၊ စစ်သည်မိသားစုဝင်တွကို လာပြီး ကြိုပေးနေတာ ဖြစ်ပါတယ်” လို့ မှတ်တမ်း ဗွီဒီယိုဖိုင်မှာ ရှင်းပြထားပါတယ်။

ဒေသခံ အမျိုးသမီးတဦးကတော့ လားရှိုးအရှေ့မြောက်တိုင်းစစ်ဌာနချုပ် (ရမခ) က တပ်မိသားစုဝင်တွေကို မိုင်းရယ်ဘက် လွှတ်ပေးလိုက်တယ်လို့ သိရပြီး SSPP/SSA က လာကြိုတယ်လို့ ကြားသိရကြောင်း ပြောပါတယ်။

တော်လှန်ရေးတပ်ဖွဲ့နဲ့ နီးစပ်သူတဦးက “တပ်မိသားစုဝင်တချို့ကို ပထမအသုတ်အဖြစ် အယောက် ၃၀၀ ကျော်ကို ပြန်လည် လွှတ်ပေးလိုက်တယ်လို့ သိရတယ်” လို့ ပြောပါတယ်။

စစ်ကောင်စီခေါင်းဆောင်ပိုင်းတွေ အနေနဲ့ လက်နက်ချသွားတဲ့ စစ်သည်တွေရဲ့ မိသားစုဝင်တွေကို ဘယ်လိုပုံစံနဲ့ ဆက်ဆံမယ် ဆိုတာတော့ မပြောနိုင်ဘူးလို့ ဆိုပါတယ်။

အဲဒီ တပ်မိသားစုဝင်တွေက ပြီးခဲ့တဲ့ ဩဂုတ် ၃ ရက်‌ ရမခသိမ်းတိုက်ပွဲမှာ ကိုးကန့်တပ် (MNDAA) က စစ်သုံ့ပန်းအဖြစ် ဖမ်းဆီးထိန်းသိမ်းထားတဲ့ အရှေ့မြောက်တိုင်းစစ်ဌာနချုပ် (ရမခ) က အရာရှိ၊ အရာခံ၊ အကြပ် စစ်သည်တွေရဲ့ မိသားစုဝင်တွေ ဖြစ်တယ်လို့ သူကပြောပါတယ်။

လားရှိုးမြို့က စစ်ကောင်စီရဲ့ အရှေ့မြောက်ပိုင်းစစ်ဌာနချုပ် (ရမခ) ကို ဩဂုတ် ၃ ရက် နေ့လယ်မှာ MNDAA နဲ့ ပူးပေါင်းတပ်ဖွဲ့တွေက တိုက်ခိုက်သိမ်းပိုက်လိုက်ပြီး ရမခ တိုင်းရုံးမှာရှိတဲ့ တပ်မိသားစုဝင်တွေနဲ့ တပ်ဖွဲ့ဝင် အများအပြားကို ထိန်းသိမ်းဖမ်းဆီးနိုင်ခဲ့တာ ဖြစ်ပါတယ်။