ရုရှားသမ္မတ ဗလာဒီမာပူတင်ဟာ အမေရိကန် အကျဉ်းသား ၃ ဦး အပါအဝင် အနောက်နိုင်ငံတွေက အကျဉ်းသား ၁၂ ဦးကို လွတ်ငြိမ်းချမ်းသာခွင့် ပေးခဲ့တယ်လို့ ကရင်မလင်နန်းတော်က ဩဂုတ် ၁ ရက်မှာ ကြေညာပါတယ်။

စစ်အေးခေတ် တိုက်ပွဲတွေပြီးချိန်ကတည်းက အကြီးမားဆုံး ကမ္ဘာ့အရှေ့-အနောက် အကျဉ်းသားလဲလှယ်မှု တစိတ်တပိုင်းအဖြစ် နိုင်ငံခြားတိုင်းပြည်တွေရှိ ရုရှားအကျဉ်းသားတွေနဲ့ အလဲအလှယ်ပြုလုပ်လိုက်တာပါ။

ဒီဆုံးဖြတ်ချက်ဟာ အနောက်နိုင်ငံတွေမှာ ဖမ်းဆီးထိန်းသိမ်းခံရသူတွေနဲ့ ထောင်ချခံနေရသူတွေကို ပြည်တော်ပြန်နိုင်ကြစေဖို့ ရည်ရွယ်ပြီး အမိန့်ကြေညာချက်ကို သမ္မတပူတင်က လက်မှတ်ရေးထိုးခဲ့တာလို့ ဆိုပါတယ်။

အကျဉ်းသားလဲလှယ်ရေး အစီအစဉ်ဟာ တနှစ်ကျော်ကြာ လျှို့ဝှက်စေ့စပ်ညှိနှိုင်းမှုတွေ လုပ်ခဲ့ရတဲ့ ရှုပ်ထွေးတဲ့ သဘောတူညီမှုတခုလို့လည်း ဆိုပါတယ်။

ဒီအကျဉ်းသားဖလှယ်ရေးအတွက် တူရကီနိုင်ငံက ကြားဝင်ဆောင်ရွက်ခဲ့ပြီး ကလေး ၂ ဦး အပါအဝင် လူ ၁၀ ဦးကို ရုရှားနိုင်ငံကို ပို့ဆောင်ပေးထားကြောင်း တူရကီက ပြောပါတယ်။

ဒီအစီအစဉ်မှာ အမေရိကန်၊ ဂျာမန်၊ ပိုလန်၊ ဆလိုဗေးနီးယား၊ နော်ဝေနဲ့ ဘီလာရုစ်တို့ ပါဝင်ပြီး သူတို့နိုင်ငံတွေမှာ ပြစ်မှုအမျိုးမျိုးနဲ့ ဖမ်းဆီးခံထားရတဲ့ ရုရှားနိုင်ငံသားတွေနဲ့ ရုရှားနိုင်ငံမှာ အကျဉ်းကျ ဖမ်းဆီးခံထားရတဲ့ သူတို့နိုင်ငံသားတွေနဲ့ ပြန်လဲလှယ်ခဲ့တာပါ။

ပြန်လွတ်လာတဲ့ အမေရိကန် ၃ ဦးဟာ ဝေါလ်စထရိဂျာနယ် သတင်းထောက် အီဗန်ဂါရ်ကိုဗစ်ချ်၊ အမေရိကန် မရိန်းတပ်သားဟောင်း ပေါလ်ဝှေလန်နဲ့ အမေရိကန်ထောက်ပံ့တဲ့ ရေဒီယို-ဖရီး-ယူရုပ်မှ ရုရှား-အမေရိကန် သတင်းထောက် အာလ်ဆူ ကူရ်မာရှယ်ဗာတို့ ပါဝင်ပါတယ်။

သမ္မတ ဂျိုးဘိုင်ဒင်ဟာ ဒီအကျဉ်းသားလဲလှယ်ရေး သဘောတူညီချက်ကို “သံတမန်ရေးနဲ့ ခင်မင်ရင်းနှီးမှုဆိုင်ရာ လုပ်ရပ်” အဖြစ် ချီးကျူးခဲ့ပြီး ဝါရှင်တန်ရဲ့ မဟာမိတ်တွေကိုလည်း သူတို့ရဲ့ ရဲရင့်ပြတ်သားတဲ့ ဆုံးဖြတ်ချက်တွေအတွက် ချီးကျူးခဲ့ပါတယ်။

Source-Reuters