ထိုင်းမြောက်ပိုင်း၊ ချင်းမိုင်ခရိုင်၊ ချင်းဒေါင်းမြို့နယ်က ထိုင်းရဲတပ်ဖွဲ့ဝင် ၂ ဦးအား ပစ်ခတ်ပြီး ထွက်ပြေးလွတ်မြောက်နေတဲ့ မူးယစ်ကုန်သည် လားဟူအမျိုးသား ၁ ဦးကို ဖမ်းဆီးရမိဖို့ သတင်းပေးနိုင်က ဆုငွေ ဘတ် ၅ သိန်းချီးမြှင့်မယ်လို့  ထိုင်းရဲတပ်ဖွဲ့က ကြေညာပါတယ်။ 

လားဟူအမျိုးသား နိုင်းကျိုင်း ကျကာ (အသက် ၃၇ နှစ်) တောင်ပေါ်တိုင်းရင်းသား မှတ်ပုံတင်ကိုင်ဆောင်သူဟာ မူးယစ်ဆေးဝါး‌ရောင်းဝယ်နေကြောင်း ရဲစုံထောက်တွေက သတင်းရလို့ ဝယ်သူအယောင်ဆောင်ပြီး ဇူလိုင် ၁၁ ရက်က  သူ့အိမ်မှာ သွားရောက် ဖမ်းဆီးခဲ့ပါတယ်။ 

နိုင်းကျကာက အဖမ်းမခံဘဲ သေနတ်နဲ့ ပစ်ခတ်ထွက်ပြေးသွားတာကြောင့် နားဝိုင်နယ်မြေ ရဲတပ်ဖွဲ့မှ ရဲတပ်ကြပ်ကြီး ၁ ဦး သေဆုံးပြီး ရဲတပ်ကြပ် ၁ ဦး ဒဏ်ရာရခဲ့ပါတယ်။ 

သူ့ကိုဖမ်းဆီးရမိဖို့ ရဲတပ်ဖွဲ့ဝင် အင်အား ၂၀၀ နဲ့ နယ်မြေထဲ လိုက်လံရှာဖွေခဲ့ပေမဲ့ ဖမ်းလို့ မမိခဲ့တာကြောင့် ဖမ်းမိနိုင်အောင် သတင်းပေးပါက ဘတ် ၂ သိန်း ဆုချမယ်လို့ ရဲတပ်ဖွဲ့က ကြေညာထားပါတယ်။ 

ဒါပေမဲ့ ရက်ပေါင်း  ၂၀ နီးပါးကြာမြင့်သည်အထိ ဖမ်းမမိသေးတာကြောင့် ဆုငွေ ဘတ် ၂ သိန်းကနေ ၅ သိန်းထိ တိုးမြှင့်ပေးမယ့်အကြောင်း အမှတ် ၅ ခရိုင်ရဲတပ်ဖွဲ့ ဒုရဲချုပ် ကရစ်ထားဖွန်း ယိဆာခွန်းက ဇူလိုင် ၂၉ ရက်မှာ ထုတ်ပြန်ကြေညာခဲ့ပါတယ်။ 

နိုင်းကျကာဟာ အိမ်နောက်ဘက် တောထဲကနေ ထွက်ပြေးပြီး မြန်မာနယ်စပ် ဝိန်းဟိုင်မြို့နယ်ကို  ၂ နာရီ၊ ၃ နာရီထိ ခြေလျင်လျှောက်သွားခဲ့ကြောင်း၊ အဲဒီနောက် ထိုင်းနယ်စပ်နဲ့ ကီလိုမီတာ ၁၀၀ ခန့်အကွာ ရှမ်းပြည်နယ် မိုင်းဆတ်ခရိုင်ထဲမှာ ခိုလှုံနေတယ်လို့ သတင်းရတာကြောင့် တဖက်နိုင်ငံက တာဝန်ရှိသူတွေအနေနဲ့ တရားခံဖမ်းမိရေး ပူးပေါင်းဆောင်ရွက်ပေးဖို့ အကူအညီတောင်းထားတယ်လို့  ခရိုင်ရဲတပ်ဖွဲ့ တာဝန်ရှိသူက ပြောသွားပါတယ်။ 

Source- ThaiPBS