ပါရီ ၂၀၂၄ အိုလံပစ်ပွဲတော် ဖွင့်ပွဲအခမ်းအနားမှာ ထိုင်ဝမ်အသင်းကို ပြင်သစ်ရုပ်သံဌာနက ‘ထိုင်ဝမ်’ အဖြစ် အသိအမှတ်ပြု ခေါ်ဆိုခံရလို့ အလွန်ပျော်ရွှင်မိတယ်လို့ ထိုင်ဝမ်အားကစား ဝါသနာအိုးတွေက ပြောပါတယ်။

ထိုင်ဝမ်အားကစားသမားတွေဟာ စိန်းမြစ်ကမ်းဘေးမှာ လှေစီးနေချိန်မှာ တရုတ်တိုင်ပေကို ထိုင်ဝမ်လို့ အများအားဖြင့် သိကြတယ်လို့ အိမ်ရှင် ပြင်သစ်ချန်နယ်တခုဖြစ်တဲ့ France 4 ရုပ်သံက ပရိသတ်တွေကို ရှင်းပြခဲ့ပါတယ်။

ပါရီကိုလာလည်ပြီး အားကစားပြိုင်ပွဲကို ကြည့်ရှုခဲ့တဲ့ အသက် ၂၀ အရွယ် ကောလိပ်ကျောင်းသား ချန်ခါ့ရှင်းက “သူတို့က ထိုင်ဝမ်လို့ ပြောတာကြားတော့ အရမ်းပျော်သွားတယ်။ အဲဒါကို မှားတယ်လို့ထင်ပြီး ပြန်ကြည့်တော့ ထိုင်ဝမ်လို့ခေါ်တာ အမှန်ပဲ။ ထိုင်ဝမ်က သူငယ်ချင်းတွေနဲ့ မျှဝေလိုက်တာ။ အားလုံး အရမ်းပျော်နေကြပါတယ်” လို့ ပြောပါတယ်။

နိုင်ငံတကာ အိုလံပစ်ကော်မတီရဲ့ လက်ရှိစည်းမျဉ်းတွေအရ ထိုင်ဝမ်အားကစားသမားတွေကို မိတ်ဆက်ရာမှာ အချုပ်အခြာအာဏာပိုင် နိုင်ငံအဖြစ် မဖော်ပြဘဲ တရုတ်တိုင်ပေ နာမည်နဲ့ ယှဉ်ပြိုင်ခွင့် ပြုထားပါတယ်။

လွန်ခဲ့တဲ့ ၃ နှစ်က တိုကျိုမြို့တော်မှာ ဂျပန်အများပိုင် ရုပ်သံလိုင်း NHK က တရုတ်က တားမြစ်တဲ့ စကားလုံးဖြစ်ပေမဲ့ ‘ထိုင်ဝမ်’ လို့ ခေါ်ခဲ့ဖူးပါတယ်။

ထိုင်ဝမ်ယဉ်ကျေးမှု လက်ထောက်ဝန်ကြီး ဝမ်ရှူးက “ထိုင်ဝမ် ဆိုတဲ့နာမည်က ကမ္ဘာပေါ်က လူတိုင်းနဲ့ ပိုရင်းနှီးတာမို့ အိုလံပစ်ပြိုင်ပွဲမှာ ကျနော်တို့ရဲ့ နာမည်အရင်းကို သမုတ်တဲ့အခါ အားလုံးက ‘ထိုင်ဝမ်’ ဆိုရင် သိကြလိမ့်မယ်လို့ မျှော်လင့်ပါတယ်” လို့ ပါရီမြို့တော်က ထိုင်ဝမ်အိမ်တော်ဖွင့်ပွဲနေ့ အခမ်းအနားမှာ ပြောပါတယ်။

ယဉ်ကျေးမှုကွဲပြားချက်ကိုပြဖို့ အခုနှစ်အစောပိုင်းမှာ ရူပေါလ်ဒရက်ဂ်ပြိုင်ပွဲရဲ့ သရဖူကို ရယူခဲ့တဲ့ ပထမဆုံးအရှေ့အာရှသူ ထိုင်ဝမ်-အမေရိကန်ကပြား နင်မ်ပီယာဝင်း အပါအဝင် ဖျော်ဖြေသူတွေက အိုလံပစ်ပြိုင်ပွဲတလျှောက် ထိုင်ဝမ်အိမ်တော်မှာ ဖျော်ဖြေပွဲတွေ ဆက်တိုက်လုပ်ဖို့ စီစဉ်ထားပါတယ်။

Source-Reuters