ထိုင်းနိုင်ငံ၊ ချွန်းပူးရီးခရိုင်၊ ဆီရားချားမြို့နယ်၊ လဲမ်ချဘမ်းဆိပ်ကမ်းမှာ မြန်မာနိုင်ငံ၊ ရှမ်းပြည်နယ်ထဲကို တင်ပို့မယ့် မူးယစ်ဆေးဝါးထုတ်ရာမှာသုံးတဲ့ Toluene ဓာတုပစ္စည်းကုန်ကြမ်း အလေးချိန်ပေါင်း တန်ချိန် ၉၀ ကို ဖမ်းဆီးရမိတယ်လို့ 3Plus News ထိုင်းသတင်းမှာ ဇူလိုင် ၁၃ က ဖော်ပြပါတယ်။
အဆိုပါ မူးယစ်ဆေးဝါးထုတ်လုပ်နိုင်တဲ့ ဓာတုကုန်ကြမ်းတွေဟာ တောင်ကိုးရီးယားနိုင်ငံ ဘူဆန်ဒေသဘက်ကနေ သင်္ဘောနဲ့ ဝင်လာပြီး ဇွန် ၇ ရက်က ဆီရားချားလဲမ်ချဘမ်းဆိပ်ကမ်းကို ဆိုက်ရောက်လာတာပါ။
တန်ချိန် ၉၀ ရှိတဲ့ ဓာတုကုန်ကြမ်းတွေကို ကွန်တိန်နာသေတ္တာ ၆ လုံးနဲ့ လဲချဘမ်းဆပ်ကမ်းမှာ ထိန်းသိမ်းထားပြီး ဥပဒေနဲ့ညီညွတ်မှုရှိမရှိကို ဆိပ်ကမ်းအကောက်ခွန်ဌာန၊ စက်မှုလုပ်ငန်းရှင်များအသင်း၊ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့တို့ ပူးပေါင်းပြီး စုံစမ်းစစ်ဆေးခဲ့ကြပါတယ်။
စစ်ဆေးချက်အရ အဆိုပါပစ္စည်းတွေကို မှာယူသူဟာ စမွတ်စခွန်းခရိုင် လော်ဂျစ်စတစ် စီးပွါးရေးကုမ္ပဏီတခုဖြစ်ပြီး ထိုင်း-မြန်မာနယ်စပ် မဲဆောက်မြို့ကနေတဆင့် မြန်မာနိုင်ငံ ရှမ်းပြည်နယ်ရှိ ကုမ္ပဏီတခုကို ပို့ပေးဖို့ဖြစ်တယ်။
အိမ်နီးချင်းနိုင်ငံတာဝန်ရှိသူတွေနဲ့ ပူးပေါင်းပြီး အဆိုပါကုမ္ပဏီကို စုံစမ်းရာမှာ လိပ်စာ ပါနေရာမှာ အဆောက်အဦမှမရှိဘဲ မြေကွက်လွတ်သာ ရှိကြောင်း၊ မသင်္ကာဖွယ်တွေရှိနေတာကြောင့် သက်ဆိုင်ရာက မဲဆောက်ဘက်ကို ပို့ဆောင်ဖို့ ခွင့်ပြုချက် ပါမစ်မထုတ်ပေးနိုင်ဘဲ နိုင်ငံပိုင်အဖြစ်သိမ်းဆည်းသွားမယ်လို့ ဆိုပါတယ်။
အဆိုပါဓာတုကုန်ကြမ်း တန်ချိန်ပေါင်း ၉၀ ကနေ ဟီးရိုးအင်းထုတ်မယ်ဆိုရင် ၄ တန်ခွဲ၊ အိုက်စ်မူးယစ်ဆေး ၄၅၀၀ ကီလိုဂရမ်၊ ကိုကင်း ၄၅၀၀ ကီလိုဂရမ်၊ စိတ်ကြွဆေးပြား သန်းပေါင်း ၂၇၀ သန်းထုတ်လုပ်နိုင်မယ်လို့ သိရပါတယ်။
အရင်းအနှီးက စိတ်ကြွဆေး ၁ ပြား အတွက် ၀ ဒသမ ၂၅ ဘတ်သာရှိလို့ ထုတ်လုပ်ပြီးရင် ပမာဏအလွန်များပြားတဲ့ အမြတ်ငွေရရှိတယ်၊ အဲဒီဓာတုကုန်ကြမ်းက အမှန်ဆိုရင် ကြွက်သတ်ဆေးထုတ်လုပ်ရာမှာ အသုံးပြုတယ်၊ လူသားတွေအတွက် လွန်စွာ အန္တရာယ်ရှိတယ်။ ဒီတန်ချိန်ပေါင်း ၉၀ ကထုတ်တဲ့ မူးယစ်ဆေးဝါးဟာ မြို့နယ်တမြို့နယ်စာက လူတွေကို ပျက်စီးစေနိုင်တယ်၊ ဒါကြောင့် အရှိန်မြှင့် နှိမ်နင်းရမယ်လို့ မူးယစ်ဆေး ဝါးနှိမ်နင်းရေးရဲတပ်ဖွဲ့ ရဲမှူးချုပ် ခီရီဆဒ် တန်းသီနဝပ်ချိုင်းက ပြောပါတယ်။
Source: 3Plus News
