(က)

ဒီမနက်ရေနွေးကြမ်းဝိုင်းမှာ စိမ်းသရဖူစိမ်း အဘစိမ်းမောင် မျက်နှာသိပ်မကောင်း။ အဘစောမူးသာ၏ အိမ်ပြတင်းမှနေ၍  ခြံဝင်းကျယ်ကြီးထဲက မိုးရေရွှဲရွှဲစို နေသည့် သစ်ပင်ကြီးများကို လှမ်းငေးကာ တခါတခါ သက်ပြင်းခိုး၍ ချနေတာကို မြင်ကြရပါ၏။

အဘစောမူးသာက စစ်ပြန်ကြီးအဘလုံးတုံးကို မျက်ရိပ်ပြပါလေ၏။ အဘလုံးတုံးက " သူငယ်ချင်း စိမ်းမောင် နေမကောင်းဘူးလား " ဟု စကားလမ်းကြောင်းလေရာ အဘစိမ်းမောင်ထံက " ဟှူး . . " ဟု သံရှည်စွဲလာသည့် သက်ပြင်းချသံကြီးကို ကြားကြရပါလေတော့၏။

"လူတော့နေကောင်းပါတယ်ကွာ"

"ဒါဆိုရင် မင်းအိမ်က ' ဆိတ် ' တွေတော့  မကျန်းမာဘူးဆိုတဲ့ သဘောလား ''

"ဟားဟား ဟားဟား ဟားဟား"

"မနောက်ကြပါနဲ့ကွာ . . . "

မေးမှ သိကြရပါလေ၏။ ဟိုဘက်ရွာကသူ၏ တူတော်မောင်အရင်းဖြစ်သူ 'စိမ်းချစ်' စစ်မှုထမ်းပါသွားလို့ဟု ပြောပါ၏။

သူ၏တူတော်မောင်၏အမည်ရင်းမှာ 'သိမ်းချစ်' ဖြစ်ပေမယ့် သူတို့၏ အစိမ်းရောင်ချစ်သူစစ်ဖြစ်နေ၍ ' စိမ်းချစ် ' ဟုသာတွင်နေပါလေ၏ ခင်ဗျာ။

"မင့်တူက မင်းလိုပဲ ကြင်စိုး သာ၀ မအလကို ကိုးကွယ်ဆည်းကပ်နေတဲ့သူပဲကွာ၊ စစ်မှုထမ်းပါတော့ ဂုဏ်ယူရမှာပေါ့ "

" ဟာကွာ . . . မင်းတို့က ဘာမှမသိဘဲစွတ်ပြောနေပြန်ပါပြီ . . . ရီးတဲ့မှပဲ "

" ဟဲ ဟဲ ဟဲ ဟဲ . . . လင်းစမ်းပါအုံးဟ "

သို့ဖြင့် ဖြစ်ကြောင်းကုန်စင်ကို သိရပါလေ၏။ စိမ်းချစ်မှာ သူ့ဦးလေးလိုပဲ အစွန်းရောက် စိမ်းဆိုမှစိမ်းဖြစ်လေရာ "စစ်မှုထမ်းခေါ်ရင် လိုက်သွားပြီး PDF တွေကို ဆော်မယ်"ဟု လေကြီးထားသူလည်း ဖြစ်ပါ၏။

"အဲဒါကွာ သင်တန်းနှစ်လသုံးလ တက်ပြီးသင်တန်းဆင်းတော့ သူတို့လက်ဦးက ပြောထားသလို ကိုယ့်ရပ်ရွာ ကိုယ့်ဒေသကို ပြန်ပြီး တာဝန်မထမ်းဆောင်ရပဲ ရှေ့တန်းကို တန်းအလွှတ်ခံရတယ်ကွ "

" ဟေ . . . အဲသလိုအဖြစ်မျိုး ရှိသလား "

"အေးကွ . . . အခု ရှေ့တန်းမှာ ဒီကောင်မခံနိုင်တော့ဘူးထင်တယ်"

 “သြော် . . . မင်းတို့က မအလတွေစကားကို အယုံကြီးယုံခဲ့ကြတာကိုး ဟကောင်ရ"

"အခု ဒီကောင် ' လစ် ' ချင်နေပုံပဲ "

" လစ်ရင်တော့ မအလတွေက အသေလိုက်ဗြင်းမှာဟ စိမ်းမောင်ရ"

" ဟှူး. . . . . ဝှူး . . . "

နောက်ထပ် သက်ပြင်းကြီးချပြန်ပါလေ၏။ ထို့ထက်ဆိုးသော အချက်ကို ကျွန်ုပ်တို့ ထပ်မံ သိရှိရပြန်ပါလေ၏။ စစ်မှုထမ်းပါပြီး သင်တန်းဆင်းပါက တပ်မတော်ထဲမှာ ' ၂ နှစ် ' သာ စစ်မှုထမ်းရမည်ဟု ဆိုခဲ့သော်လည်း လက်ပူတိုက်သင်တန်းပြီးဆုံးသည့်အခါမှာတော့ စာချုပ်ထဲမှာ ' ၅ နှစ်တိတိ တာဝန်ထမ်းဆောင်ပါမည် ' ဟု ဝန်ခံကတိစာချုပ်မှာ လက်မှတ်ထိုးခဲ့ရပါကြောင်းတဲ့။

" ဒီတော့ ဘာဖြစ်လဲကွ၊ ၅ နှစ်လုပ်လိုက်ပေါ့ဟ"

"ဟာကွာ . . . ဘယ်ဖြစ်မလဲကွ၊ ' ၂ နှစ် ' လို့ပြောထားတာ ' ၅ နှစ် ' လုပ်စရာလား"

" ဝါး . . . ဟားဟား ဟားဟား ဟားဟား"

(ခ)

အဘစိမ်းမောင်က မျက်မှောင်ကြုံ့ပါလေ၏။ သူတို့ကိုးကွယ်တော်မူနေသည့် ကြင်စိုးသာ၀နှင့် အပေါင်းပါ မအလများ၏ လိမ်ညာမှုကို နောက်ထပ်တခါ ထပ်မံခံလိုက်ရလေရာ မခံချိမခံသာ ဖြစ်နေပုံပါပဲ။

"ဒီမယ်စိမ်းမောင် . . . တတုံးလည်း မဟုတ်တော့ဘူး၊ လေးငါးခြောက်တုံးရှိနေတာတောင်မှ ' အဘအဘ ' လုပ်နေသေးရင်တော့ မင်းတို့ရှေ့ရေး ရင်လေးသကွာ "

" စိတ်ညစ်ရတဲ့အထဲ မင်းတို့ကလဲ "

" ဟဲဟဲ ဟဲဟဲ ဟဲဟဲ "

ထိုမှသည် အရွှင်အဘတွေက ငယ်သူငယ်ချင်းအရင်းခေါက်ခေါက်ကြီးကို ဖျောင်းဖျနားချနေကြပါလေ၏။ " နဂိုကတည်းကမှ မှန်မှန်ကန်ကန်မဟုတ်တဲ့  (--) ကောင်နဲ့ သူ့နောက်လိုက်တသိုက်ကို မင်းတို့က အခုအထိ ယုံစားနေတာကိုတော့ ငါတို့ ဘယ်လိုမှ မစဉ်းစားတတ်တော့ဘူး" ဟုဆိုကြ၏။

" ဟှူး . . . . . . . . . "

" ဒီမယ်စိမ်းမောင် . . . မအလဟာ လူလိမ် လူညာ လူကောက်ကွ၊ မင်းပြန်ကြည့်လေကွာ . . . ၂၀၂၀ ရွေးကောက်ပွဲ မဲပေးတဲ့ရက်မှာ သူ့ကို နိုင်ငံတကာကအင်တာဗျုးတော့ ပြုံးပြုံးပြုံးပြုံးနဲ့ ဒင်း ဘယ်လိုဖြေခဲ့သလဲ"

" အဲ . . . ဟို . . . "

" အေး . . . ဒီ (--) ရဲ့အဖြေ အခုအထိ လိုင်းပေါ်မှာရှိနေသေးတယ်။" 

“ရွေးကောက်ပွဲကော်မရှင်ရဲ့ ဆုံးဖြတ်ချက်သာ အတည်ဖြစ်လို့ ကျနော်တို့ လိုက်နာကြရမှာပါ " တဲ့ ။ 

" အေး . . . အဲ . . . "

" ပြီးလည်းပြီးရော အကုန်လုံးကို  (--) ကောင်ကြီး ဖျက်ဆီးပစ်လိုက်တာ "

" အာဏာသိမ်းပြီးတော့ တနှစ်ပြည့်တဲ့ အချိန်မှာ ရွေးကောက်ပွဲအသစ် ကျင်းပပေးပါမယ်" တဲ့၊ ဖြစ်လား၊ လုပ်ပေးလား "

" အဲ . . . . . "

" လျှပ်စစ်ရထားတွေ ပြေးဆွဲပေးမယ် "တဲ့။ 

 “ပေးလား၊ လုပ်နိုင်လား "

" အမ် . . . . . "

"မြေအောက်ရထားလမ်းတွေ ဖောက်လုပ်ပါတော့မယ်" တဲ့။ 

“ဖောက်နိုင်လား "

" အဲ . . . . . "

"ကုန်ဈေးနှုန်းတွေ တည်ငြိမ်အောင် စွမ်းဆောင်ပေးပါ့မယ် " တဲ့၊ 

စွမ်းဆောင်ပေးနိုင်လား၊ ကျလား "

" ဟား ဟား ဟား ဟား ဟား ဟား ဟား "

ကျန်သူအားလုံး ပေါ့ပေါ့ပါးပါး တဟားဟားရယ်နေကြစဉ် အဘစိမ်းမောင်မှာ သက်ပြင်းတွေသာ တသွင်သွင် ချနေပါလေ၏။ အဘစောမူးသာက မြင်သမျှကို ဆက်ပြောပါလေ၏။

"ဒီ (--) ကြီးက  ပလ္လင်ပေါ်ကို ခွေးတိုးပေါက်ကနေ ဖြဲတိုးပြီး မဆင်မခြင်တက်လာတာ ၃ နှစ်ကျော်သွားပြီ၊ သူလုပ်ပြနိုင်တာဘာရှိသလဲ၊ ဘာမှမရှိဘူးမဟုတ်လား ''

" ဒီလိုတော့မပြောပါနဲ့မူးသာရာ . . . မအလ လုပ်နိုင်တာ တခုတော့ ရှိပါတယ်ကွာ "

" ဘာရှိလို့လဲ လုံးတုံးရ "

" သူ့အာဏာငွေ့လေး အမျှင်မပြတ်စေဖို့ရာ ၆ လတခါ သက်တမ်းတိုးတာလေကွာ "

" ဝါး . . . ဟားဟား ဟားဟား ဟားဟား "

(ဂ)

မအလဟာ ဘာမဟုတ်တဲ့ဟာလေးတခုကိုသာ ပိုင်နိုင်စွာလုပ်ဆောင်နိုင်တယ်ဆိုတော့ အဘစောမူးသာ၏မျက်နှာမှာ တခုခုကိုသတိရလိုက်သလိုမျိုး ဝင်းလက်လာပါလေ၏။

"အေးကွ လုံးတုံးရ . . ဒီ (--)  ဘာမှအရေးမပါတာလေးတခုကိုသာ ပိုင်ပိုင်နိုင်နိုင် လုပ်တတ်တယ်ဆိုတော့ ငါဖတ်ဖူးခဲ့တဲ့ဝတ္ထုလေး  တပုဒ်ကို ပြေးသတိရမိသွားသကွ "

" လုပ်ပါအုံးဟ၊ မင်းဇာတ်လမ်းလေးကို "

သို့ဖြင့် အဘစောမူးသာက ဝတ္ထုသွားကို ပြောပြပါလေ၏။

တခါတုန်းက ရွာတရွာမှာ  ဘာမှဟုတ်တိပတ်တိမလုပ်တတ်ပဲ လေကြီးလေကျယ်တွေသာ တွင်တွင်ပြောပြီး လူအထင်ကြီးခံချင်တဲ့ ' လေပေါ ' ဆိုတဲ့လူတဦး ရှိသတဲ့။ သူက ရပ်ရွာကတင်မြှောက်ထားတဲ့ ပညာ သမ္ဘာ မေတ္တာ စေတနာ အလွန်ကြီးမားတဲ့သူကြီးကို မနာလိုဖြစ်ပြီး သူကြီးနေရာကို ငမ်းငမ်းတက် လိုချင်နေတာတဲ့။

ဘာပညာမှမရှိတဲ့လေပေါဟာ တနေ့တော့  ရပ်ရွာမှာ ကြွေးကြော်သတဲ့။ ရွာအနောက်ဘက်က တောအုပ်ကြီးထဲမှာ သူအကျင့်ထူး သွားကျင့်ပြီး ၃ နှစ်ပြည့်တဲ့အခါမှ ပြန်ထွက်လာမတဲ့။

" ဒီ (---) ရူးကကွာ  လူတွေက ရယ်ကြတာပေါ့၊ တောအုပ်ကြီးက နက်တော့ နက်တယ်တဲ့၊ လူသူအသွားအလာလည်း မရှိသလောက်ပဲတဲ့ "

" အဲဒီကောင် တကယ်ကျင့်တာလား "

"ဟုတ်တယ်လုံးတုံး၊ တိုတိုပြောရရင်တော့ကွာ ၃ နှစ်လည်းပြည့်ကော ဒီကောင် ပြန်ရောက်လာတယ်၊ သူကြီးအိမ်ကိုသွားပြီး ရပ်ရွာလူထုကိုစုပေးဖို့ မောင်းထုခိုင်းတော့ သူကြီးလည်း နားအေးပြီးရော ထုပေးလိုက်တဲ့အခါ တရွာလုံး ရောက်ချလာကြသတဲ့ဟ "

" ဒီတော့ . . . . "

"လူတွေလည်းစုံရော ' လေပေါ ' က ကွပ်ပစ်ပေါ်မှာ မတ်တပ်ရပ်ပြီး သူ အထူးကျင့်စဉ် အောင်မြင်လာပြီဖြစ်လို့ အများရှေ့မှောက်မှာ ထုတ်ဖော်ပြသပါတော့မယ်လို့ ကြေညာသတဲ့ "

" အ လဲ့ "

" သူ ကွပ်ပစ်ပေါ်မှာ တင်ပလ္လင်ခွေထိုင်ချလိုက်ပြီး မျက်လုံးကိုမှိတ် စိတ်ကိုစုစည်းပြီး ခဏအကြာမှာ သူ့ပါးစပ်ကိုဟလိုက်တဲ့အခါ ပါးစပ်ထဲကနေ ' မီးခိုးငွေ့တွေ ' ထွက် လာသတဲ့ "

" ဟေ . . . တယ်စွမ်းပါလားဟ "

"သူမျက်လုံးဖွင့်ကြည့်လိုက်တော့ ရှေ့ဆုံးမှာထိုင်နေတဲ့ ရွာသားတယောက်က သူ့ကို ပြုံးစိပြုံးစိနဲ့ ကြည့်နေတာ မြင်လိုက်ရသတဲ့ "

"အဲသည်လူက " မင်း ၃ နှစ်တောင်မှ နေ့မအားညမအားကျင့်ပြီး အခုလို ပါးစပ်ထဲကမီးခိုး ထုတ်တတ်တာလေးပဲ တတ်လာတော့ ငါတို့ရပ်ရွာအတွက် ဘာအကျိုးများဖြစ်ထွန်းသလဲ” လို့ မေးခွန်းထုတ်လိုက်တော့ လေပေါကြောင်အအ ဖြစ်သွားသတဲ့” 

" ဟား ဟား ဟား ဟား ဟား ဟား ဟား "

"လေပေါ ကြက်သေသေနေတုန်း အောက်ကလူက "ငါ ချက်ချင်း မင်းလိုလုပ်ပြမယ်" လို့ပြောလိုက်သတဲ့ "

" ဟိုက်ရှားပါး "

"ပြီးတော့ သူ့လက်ထဲက ဆေးပေါ့လိပ်တိုကြီးကို ပါးစပ်မှာတပ်၊ မီးခြစ်ကိုခြစ်၊ မီးညှိပြီး အားရပါးရဖွာလို့ ပါးစပ်ထဲကနေ မီးခိုးငွေ့တွေ ထုတ်ပြလိုက်တော့သတဲ့ဗျား "

" ဟား ဟား ဟား ဟား ဟား ဟား "

" အေး . . . အခုလည်း စိမ်းမောင်တို့အဘ မအလကြီးရဲ့  ၃ နှစ်ကျင့်စဉ်ဟာလည်း အရည်မရ အဖတ်မရ မီးခိုးထုတ်ပြတဲ့အဆင့်ပါပဲတဲ့ ဗျား "

" ဝါး . . . ဟားဟား ဟားဟား ဟားဟား "

ဖေကြီး(လေရှီး)