ထိုင်းနိုင်ငံ၊ ချင်းမိုင်ခရိုင်၊ ချင်းဒေါင်းမြို့နယ်ထဲမှာ ဇူလိုင် ၁၁ ရက်ညက မူးယစ်တရားခံကို သွားရောက်ဖမ်းဆီးတဲ့ ရဲတပ်ဖွဲ့ဝင် ၂ ဦး သေနတ်ပစ်ခံရပြီး တဦးသေဆုံး တဦး ဒဏ်ရာ ရသွားတယ်လို့  Daily News ထိုင်းသတင်းမှာ ဖော်ပြပါတယ်။ 

ချင်းဒေါင်းမြို့နယ် မိုင်းနအုပ်စု ဘန့်ကျေ့ကျန်းရွာမှာ နေထိုင်သူ လားဟူအမျိုးသား နိုင်းကျိုင်း ကျကာ (၃၇ နှစ်) ဆိုသူမှာ မူးယစ်ဆေးဝါးရောင်းဝယ်မှုရှိကြောင်း သတင်းရတဲ့အတွက် နားဝိုင်နယ်မြေရဲစခန်း တာဝန်ရှိရဲတပ်ဖွဲ့ဝင် ၂ ဦးက ဝယ်သူအယောင်ပြပြီး သွားရောက် ဖမ်းဆီးခဲ့ပါတယ်။ 

ဒီမတိုင်ခင် နိုင်းကျိုင်းနဲ့ ပတ်သက်သူအမျိုးသမီး ၁ ဦးထံမှ  စိတ်ကြွဆေးနဲ့ ဘိန်းဖြူ ၃၉၀၀ ဘတ်ဖိုး ဝယ်ယူခဲ့တယ်၊ အဆိုပါမူးယစ်ဆေးတွေဟာ နိုင်းကျိုင်း ကျကာထံမှ ယူလာခဲ့တယ်လို့ ဆိုတာကြောင့် ရဲဝန်ထမ်းဟာ ယမန်နေ့ ည ၉ နာရီခွဲလောက်က နိုင်းကျိုင်းရဲ့အိမ်ကို သွားရောက် စစ်ဆေးဖမ်းဆီးခဲ့ပါတယ်။ 

ဒါပေမဲ့ နိုင်းကျိုင်းက သူတို့ဟာ ရဲတွေဆိုတာသိသွားပြီး သေနတ်နဲ့ပစ်ပြီး ထွက်ပြေး လွတ်မြောက်သွားတယ်။ သူ့ရဲ့ပစ်ခတ်မှုကြောင့်  တပ်ကြပ်ကြီး ဆရီကွန်း ဆင်ခမ်း နဲ့ ရဲတပ်ကြပ် အဝိရဖွန်း ဝမ်းဆိုင်တို့ ၂ ဦး ဒဏ်ရာရသွားပါတယ်။ 

အခင်းဖြစ်ပွားတဲ့ရွာဟာ တောင်ပေါ်မှာဖြစ်ပြီး ချင်းဒေါင်းဆေးရုံရောက်ဖို့ ကားနဲ့ ၄၅ မိနစ်ခန့် မောင်းရကြောင်း၊ လည်ပင်းမှာထိမှန်ဒဏ်ရာရတဲ့ တပ်ကြပ်ကြီး ဆရီကွန်းကတော့ ဆေးရုံပို့ ဆောင်စဉ် လမ်းခုလပ်မှာ ဆုံးပါးသွားတယ်လို့ ဆိုပါတယ်  

တာဝန်ရှိသူတွေက တရားခံနိုင်းကျိုင်းကျကာကို အပူတပြင်းလိုက်လံရှာဖွေနေပြီး တိုင်းပြည်တာ ဝန်ထမ်းဆောင်ရင်း အသက်ပေးလှူသွားတဲ့ တပ်ကြပ်ကြီးရဲ့ နာရေးကို ထိုင်းရဲချုပ်ကိုယ်တိုင် လာရောက်ဂုဏ်ပြုမယ်လို့ သတင်းမှာ ဖော်ပြပါတယ်။ 

 Source: Daily News