ပြီးခဲ့တဲ့ ၃ နှစ်တာကာလ တိုက်ပွဲတွေအတွင်း ချင်းပြည်ကာကွယ်ရေးတပ်ဖွဲ့ (CDF-KKG) က ရဲဘော်အယောက် ၄၀ ကျော် ကျဆုံးပြီး ထိခိုက်ဒဏ်ရာရတဲ့သူတွေလည်း အများအပြား ရှိခဲ့ပါတယ်။
စစ်ကိုင်းတိုင်း၊ ကလေးမြို့၊ တမူးမြို့နဲ့ မကွေးတိုင်း၊ ဂန့်ဂေါမြို့နယ်တွေမှာ စစ်ရေးလှုပ်ရှားမှုတွေ ပြုလုပ်နေတဲ့ ချင်းပြည်ကာကွယ်ရေးတပ်ဖွဲ့ - Kalay Kabaw Gangaw က CDF KKG တပ်ဖွဲ့ဟာ တပ်ရင်းစတင်တည်ထောင်ခဲ့တာ ဇူလိုင် ၁ ရက်က ၃ နှစ်ပြည့်ခဲ့ပြီ ဖြစ်ပါတယ်။
CDF-KKG တပ်ဖွဲ့ဟာ တပ်ရင်းတည်ထောင်ချိန်ကစပြီး ၃ နှစ်တာကာလအတွင်း တိုက်ပွဲပေါင်း ၈၀ ကျော် ဖော်ဆောင်နိုင်ခဲ့ကာ အဲဒီတိုက်ပွဲတွေအတွင်းမှာ ရဲဘော် ၄၀ ကျော် ကျဆုံးထားပြီး ထိခိုက်ဒဏ်ရာရသူ အများအပြား ရှိခဲ့တယ်လို့ ဆိုပါတယ်။
KKG ရဲဘော်တွေအနေနဲ့ အခု ၂၀၂၄ ခုနှစ် အစပိုင်း ဇန်နဝါရီလက ဖြစ်ပွားခဲ့တဲ့ သိုင်းငင်းစခန်းသိမ်းတိုက်ပွဲအတွင်းမှာ အများဆုံး ကျဆုံးခဲ့ကြရတယ်လို့ သိရပါတယ်။
CDF-KKG တပ်ဖွဲ့ဟာ စစ်အာဏာသိမ်းပြီး ၅ လအကြာ ၂၀၂၁ ခုနှစ် ဇူလိုင် ၁ ရက်မှာ တပ်ရင်းကို စတင်တည်ထောင်ခဲ့တာဖြစ်ပြီး လက်ရှိမှာ တပ်ရင်း တပ်ခွဲပေါင်း ၇ ခုအထိရှိကာ တပ်သားအင်အား ရဲဘော်နဲ့ ရဲမေ စုစုပေါင်း ၆၀၀ ကျော်နဲ့ တပ်ရင်းကို ဖွဲ့စည်းထားတယ်လို့ သိရပါတယ်။
တပ်ရင်းအနေနဲ့ တိုက်ပွဲတွင်း ထိခိုက်ဒဏ်ရာရရှိသွားတဲ့ ရဲဘော်တွေကို ဆေးကုသမှုတွေနဲ့ ကူညီထောက်ပံ့မှုတွေ ပေးအပ်ပေမဲ့ ဘဏ္ဍာရေးအခက်အခဲတွေအရ ထိရောက်တဲ့ ကူညီမှုမျိုးကိုတော့ ပံ့ပိုးပေးနိုင်တာ မရှိသေးဘူးလို့ KKG တပ်ရင်း ၄ တာဝန်ခံ ဆလိုင်းလုန်ပီးက ပြောပါတယ်။
CDF-KKG တပ်ဖွဲ့ဟာ တခြားဒေသ ကာကွယ်ရေးတပ်ဖွဲ့တွေနဲ့ ပူးပေါင်းကာ စစ်အာဏာရှင်ကျဆုံးတဲ့အထိ စစ်ရေးလှုပ်ရှားမှုတွေကို ဆက်လုပ်သွားမှာဖြစ်ပြီး လက်နက်ခဲယမ်း လိုအပ်နေတယ်လို့ တပ်ဖွဲ့ဝင်တွေက ပြောပါတယ်။
လင်းအိမ်
