ရန်ကုန်မြို့၊ သာကေတမြို့နယ်မှာ ဒီနေ့ ဇူလိုင် ၁၀ ရက် မနက်က ဘက်ထရီပန်ကာ အားသွင်းပြီး အသုံးပြုခဲ့ရာက အပူလွန်ကဲပြီး နေအိမ်မီးလောင်မှု ဖြစ်ပွားခဲ့ရာ ၈ နှစ်အရွယ် ကလေးငယ်တဦး မီးလောင်သေဆုံးခဲ့ကြောင်း မြို့နယ် လူမှုကယ်ဆယ်ရေးအဖွဲ့ထံက သိရပါတယ်။
သာကေတမြို့နယ်၊ ၁/အနော်မာရပ်ကွက်၊ တပ်ဖွဲ့လမ်းမှာ ဒီနေ့မနက် ၇ နာရီကျော်က နှစ်ထပ်အိမ်တလုံးအတွင်း မီးလောင်မှုဖြစ်ပွားခဲ့တာလို့ အောင်နိုင်သူ လူမှုကူညီရေးအသင်းဝင်တဦးက ပြောပါတယ်။
“ကလေးက ၈ နှစ်ဝန်းကျင်အရွယ် ယောက်ျားလေးပါ။ အထဲမှာ ပိတ်မိနေတာဆိုတော့ မီးခိုးမွှန်ပြီး ဆုံးတာပါ။ မီးလောင်ကျွမ်းတာက ခဏလေးအတွင်းမှာဆိုတော့ အချိန်မီ မကယ်တင်လိုက်နိုင်ဘူးပေါ့။ ကလေးကိုတော့ အသင်းကားနဲ့ စံပြဆေးရုံကို ပို့ဆောင်ပေးခဲ့ပါတယ်။”
မီးလောင်မှုကြောင့် အလျား ပေ ၂၀၊ အနံ ပေ ၆၀ ရှိ နေအိမ်အပေါ်ထပ်နဲ့ အတွင်းပစ္စည်းတွေ ဆုံးရှုံးခဲ့ပြီး အသက် ၈ နှစ်အရွယ် မောင်ပြည့်စုံထွန်းထွန်းဦး မီးလောင်သေဆုံးခဲ့ကြောင်း သိရပါတယ်။
မီးလောင်မှုမှာ ၁၅ မိနစ်ခန့်သာ ကြာမြင့်ခဲ့ပြီး မီးငြှိမ်းသတ်ယာဥ် ၅ စီး၊ ရေသယ်ယာဥ် ၂ စီး၊ အထောက်အကူပြုယာဥ် ၁ စီး၊ သန္ဓေအရန်မီးသတ်တပ်ဖွဲ့ဝင် ၄၀ ကျော်နဲ့ လူမှုရေးအသင်းအဖွဲ့တွေက ဝိုင်းဝန်းကူညီ ငြှိမ်းသတ်ခဲ့ကြပါတယ်။
အိမ်ရှင်ဖြစ်သူ အသက် ၅၃ နှစ်အရွယ် ဦးမျိုးမြင့်ကိုတော့ ပေါ့ဆမီးအသုံးပြုမှု ပုဒ်မ၂၈၅၊ ပုဒ်မ ၃၀၄(က) နဲ့ သာကေတမြို့မရဲစခန်းက အမှုဖွင့်ကာ စစ်ဆေးနေကြောင်း ရဲစခန်းနဲ့ နီးစပ်သူတွေထံက သိရပါတယ်။
