မြန်မာ့ရေပိုင်နက်အတွင်း တရားမဝင် ဝင်ရောက်လာတဲ့ ငါးမန်းဖမ်းစင်လှေပေါ်မှာ ဖမ်းဆီးရမိခဲ့တဲ့ အင်ဒိုနီးရှားနိုင်ငံသား ၇ ဦးကို ကော့သောင်းမြို့မရဲစခန်းမှာ ဇူလိုင် ၈ ရက်က လဝကအက်ဥပဒေနဲ့ အမှုဖွင့်လိုက်တယ်လို့ ရေတပ်နဲ့ နီးစပ်သူတွေဆီက သိရပါတယ်။
စစ်ကောင်စီတပ်ရဲ့ ကင်းလှည့်ရေယာဥ် ၅၆၇ က ဇူလိုင် ၄ ရက် မနက်မှာ ASLAM SAMMUDERA အမည်နဲ့ ငါမန်းမျှားစက်လှေပေါ်မှာ အင်ဒိုနီးရှားအမျိုးသားတွေကို ဖမ်းဆီးရမိခဲ့တာဖြစ်ပါတယ်။
ရေတပ်နဲ့နီးစပ်သူတဦးက "သူတို့ကို ပင်လယ်ထဲက ခေါ်လာပြီး ကော့သောင်းမြို့မရဲစခန်းကို လွှဲပေးတယ်လှေနဲ့ ဆက်စက်ပစ္စည်းတွေကို ငါးလုပ်ငန်းဦးစီးကို လွှဲပေးလိုက်တယ်"လို့ ပြောပါတယ်။
ကင်းလှည့်စစ်ရေယာဥ် ၅၆၇ က ကော့သောင်းမြို့ ဘုရင့်နောင်ဆိပ်ခံဘောတံတားမှာ ဇူလိုင် ၇ ရက်က ဖမ်းဆီးလာတဲ့ အင်ဒိုနီးရှားနိုင်ငံသား ၇ ဦး ၊ ငါးမန်းမျှားလှေနဲ့ ဆက်စပ်ပစ္စည်းတွေကို လာရောက်အပ်နှံခဲ့ရာ လဝကစစ်ဆေးပြီး မြို့မရဲစခန်းက အမှုဖွင့်ခဲ့တာဖြစ်တယ်လို့ အုပ်ချုပ်ရေးနဲ့ နီးစပ်သူတဦးက ပြောပါတယ်။
"ငါးလုပ်ငန်းက လှေနဲ့ဆက်စပ် ပစ္စည်းတွေသိမ်းသွားတယ်။ လဝကရုံးက စစ်ဆေးပြီး လဝကအက်ဥပဒေနဲ့ အမှုဖွင့်ဖို့လုပ်နေတယ် ၇ ယောက်လုံး ကော့သောင်းအချုပ်ထဲမှာပါ။”
လတ်တလောမှာ အင်ဒိုနီးရှားနိုင်ငံသား ၇ ဦးကို ကော့သောင်းမြို့မရဲစခန်းက လဝကအက်ဥပဒေ နဲ့အမှုဖွင့်အရေးယူထားတယ်လို့ အုပ်ချုပ်ရေးနဲ့ နီးစပ်သူတွေဆီက သိရပါတယ်။
