ကမ္ဘောဒီးယားတရားရုံးဟာ အစိုးရကို ဆန့်ကျင်ဖို့ ကြံစည်မှု၊ ဘုရင်ကိုစော်ကားမှု‌ စွဲချက်တွေနဲ့ Mother Nature သဘာဝပတ်ဝန်းကျင်ထိန်းသိမ်းရေးအဖွဲ့က တက်ကြွလှုပ်ရှားသူ ၁၀ ဦးကို ထောင်ဒဏ် ၈ နှစ်အထိ ချမှတ်လိုက်ကြောင်း အဖွဲ့တည်ထောင်သူနဲ့ ရှေ့နေက ဇူလိုင် ၂ ရက်မှာ ပြောကြားပါတယ်။

စီရင်ချက် ချပြီးပြီးချင်း နောက်မှာ အဲဒီအဖွဲ့ရဲ့ တက်ကြွလှုပ်ရှားသူ ၅ ဦးကို ဖနွမ်းပင်တရားရုံး အပြင်ဘက်မှာ ဖမ်းဆီးခဲ့ပါတယ်။

ယမ်လင်းန်ဟီကို အစိုးရကိုဆန့်ကျင်ဖို့ ကြံစည်ပြီး ဘုရင်ကို စော်ကားမှုအတွက် ထောင်ဒဏ် ၈ နှစ်နဲ့ ငွေဒဏ် ရီးလ်ငွေကြေး ၁၀ သိန်း (ဒေါ်လာ ၂,၄၃၄) ချမှတ်ခဲ့ပါတယ်။

ကျန် ၄ ဦးဖြစ်တဲ့ သွန်ရော့ဒ်ထား၊ လီ ချန်ဒရာဝု၊ လောင်းခွန်သိ၊ ဖွန် ကဲဗီစမိုက် တို့ကို အစိုးရဖြုတ်ချဖို့ ကြံစည်မှုနဲ့ ထောင်ဒဏ် ၆ နှစ် ချမှတ်ခဲ့ပါတယ်။ ကျန်တဲ့သူတွေက ပြည်ပြေးအဖြစ် အဝေးရောက်နေကြပါတယ်။

အင်္ဂါနေ့မှာ ဖမ်းဆီးခံရသူ ၅ ဦးဟာ တရားရုံးကြားနာပွဲကို မတက်ရောက်ခဲ့ပေမဲ့ “တရားမျှတမှု သေဆုံးသွားပြီ” လို့ ရေးထားတဲ့ ပန်းခွေကို သယ်ဆောင်ပြီးတော့ ဈာပနအတု လုပ်ပြထားတဲ့ ဆန္ဒပြချီတက်ပွဲကို ဦးဆောင်ခဲ့ကြပါတယ်။

အဖွဲ့ကိုတည်ထောင်သူ စပိန်နိုင်ငံသား အလက်ဂျန်ဒရို ဂွန်ဇာလက်စ် ဒေးဗစ်ဆင်န် ကိုလည်း ထောင်ဒဏ် ၈ နှစ်နဲ့ ရီးလ်ငွေကြေး ၁၀ သိန်း ချမှတ်ခဲ့ပါတယ်။

ဂွန်ဇာလက်စ် ဒေးဗစ်ဆင်န်ကို လွန်ခဲ့တဲ့ ၁၀ နှစ်လောက်က ပြည်နှင်ဒဏ်ပေးထားတာဖြစ်ပြီး သူ့မျက်ကွယ်မှာ အပြစ်ရှိကြောင်း စီရင်ချက် ချမှတ်ခဲ့တာ ဖြစ်ပါတယ်။

Source-Reuters