ပဲခူးတိုင်းစာချအကျော်အမော် ဝင်းနိမ္မိတာရုံကျောင်းတိုက် ဆရာတော်ကြီး ဘဒ္ဒန္တ မုနိန္ဒာဘိဝံသဟာ ပြီးခဲ့တဲ့ ဇွန် ၁၉ ရက်က ငါန်းဇွန်မြို့နယ်ထဲမှာစစ်ကောင်စီတပ်က ပစ်တဲ့ ကျည်ဆန်ဒဏ်ရာကြောင့် ပျံလွန်တော်မူခဲ့ပါတယ်။ 

ဒီကနေ့ ဇွန် ၂၈ ရက် ညနေ ၅ နာရီခွဲမှာတော့ ဆရာတော်ဘုရားကြီးရဲ့ အရိုးပြာရေမျောပူဇော်ပွဲကို ပဲခူးတိုင်း၊ စစ်တောင်းမြစ်ကမ်းနံဘေးရှိ ကမ်းကြီးဆိပ်ကျေးရွာ၊ စစ်တောင်းမြစ်ကူးမီးရထားတံတားဟောင်းနေရာမှာ ကျင်းပခဲ့ပါတယ်။

ဆရာတော်ရဲ့ ဥဒကပဝါဟန အရိုးပြာရေမျောပူဇော်ပွဲကို အခြားကျောင်းတိုက်တွေက ဆရာတော်ကြီးတွေ၊ တပည့်ရဟန်းတော်တွေနဲ့ ဒါယကာ၊ ဒါယကမတွေက စစ်တောင်းမြစ် ကမ်းလုံးကျွတ် လာရောက်ပူဇော်ခဲ့ကြပါတယ်။

နိုင်ငံတော် သံဃမဟာနာယကအဖြစ် ၈ နှစ်တာ ထမ်းဆောင်ခဲ့တဲ့ ဆရာတော်ဟာ ပျံလွန်တော်မူချိန်မှာ သက်တော် ၇၈ နှစ်၊ သိက္ခာတော် ၅၈ ဝါရှိပြီဖြစ်ပြီး ဆရာတော်ရဲ့ အန္တိမအဂ္ဂိစျာပနကို ၉ ရက်တာ ကျင်းပခဲ့ပါတယ်။