ကရင်အမျိုးသားအစည်းအရုံး (KNU) ရဲ့ ကော်သူးလေအုပ်ချုပ်နယ်မြေထဲမှာ စစ်အာဏာသိမ်းပြီးချိန်ကစတင်ကာ ပြီးခဲ့တဲ့ မေလကုန်အထိ ၃ နှစ်ကျော် ကာလအတွင်း နေရပ်စွန့်ခွာ ထွက်ပြေးတိမ်းရှောင်နေရတဲ့ ပြည်သူ ၁ သန်းကျော်ထိ ရှိလာခဲ့တယ်လို့  ထုတ်ပြန်ပါတယ်။

တပ်မဟာနယ်မြေ ၇ ခုထဲမှာတော့ မြေပြင်တိုက်ပွဲတွေ ပြင်းထန်နေတဲ့ တပ်မဟာ (၃) ညောင်လေးပင်ခရိုင်က နေရပ်စွန့်ခွာ ထွက်ပြေးရသူဦးရေ ၅ သိန်းနီးပါးနဲ့ အများဆုံးဖြစ်ပြီး တပ်မဟာ (၆) ဒူးပလာယာခရိုင်က ၁ သိန်းခွဲကျော်၊ တပ်မဟာ (၁) သထုံခရိုင်က ၁၄၀,၀၀၀ ကျော်စီနဲ့ အစဉ်လိုက်ရှိနေတာပါ။

လတ်တလောမှာတော့ ကော်သူလေအုပ်ချုပ်နယ်မြေထဲမှာ တိုက်ပွဲတွေ နေ့စဉ်ဖြစ်ပွားနေဆဲ ဖြစ်ပြီး စစ်ဘေးလွတ်ရာကို ထွက်ပြေးတိမ်းရှောင်နေကြရသူတွေ တိုးပွားလာနေသလို အရေးပေါ်လူသားခြင်းစာနာထောက်ထားမှုဆိုင်ရာ အကူအညီတွေလည်း လိုအပ်နေတယ်လို့ သိရပါတယ်။

KNU အနေနဲ့ကတော့ ပြည်သူ ၆ သိန်းကျော်ကို ကူညီနိုင်ခဲ့ပြီး စစ်ဘေးရှောင် ပြည်သူအားလုံးကို လူသားချင်းစာနာ ထောက်ထားမှုဆိုင်ရာအကူအညီများရရှိအောင် လုပ်ဆောင်နေတယ်လို့ ထုတ်ပြန်ထားပါတယ်။

မြန်မာနိုင်ငံတဝန်းမှာတော့ အိုးအိမ်စွန့်ခွာထွက်ပြေးရသူဦးရေဟာ ၃ သန်းကျော်ထိရှိလာပြီး ဒါဟာ ဆိုးဝါးတဲ့ သမိုင်းမှတ်တိုင်တခုဖြစ်လာတယ်လို့  ကုလသမဂ္ဂက ပြီးခဲ့တဲ့ လတုန်းက ထုတ်ပြန်ပါတယ်။

ဒီကိန်းဂဏန်းအချက်အလက်တွေဟာ ပြီးခဲ့တဲ့ ၆ လတာအတွင်း ၅၀ ရာခိုင်နှုန်းလောက် သိသိသာသာ မြင့်တက်လာခဲ့တာလို့ ဆိုပါတယ်။

မြန်မာနိုင်ငံဟာ ပြီးခဲ့တဲ့ ၂၀၂၁ ခုနှစ် စစ်အာဏာသိမ်းပြီးနောက်ပိုင်း ပိုမိုနက်ရှိုင်းတဲ့ လူသား ချင်းစာနာထောက်ထားမှုဆိုင်ရာ အကျပ်အတည်းတွေနဲ့အတူ ချောက်ကမ်းပါးထိပ်မှာ ရပ်တည်နေပြီး နိုင်ငံအနှံ့အပြား ဖြစ်ပွားနေတဲ့ တိုက်ပွဲနဲ့ ပဋိပက္ခတွေကြောင့် နေရပ်စွန့်ခွာ ထွက်ပြေးတိမ်းရှောင်ရသူ အရေအတွက် စံချိန်တင်နေခဲ့တာပါ။

လက်ရှိ ပြည်တွင်း နေရပ်စွန့်ခွာထွက်ပြေးနေရသူ ၃ သန်းထဲက ၂ ဒသမ ၇ သန်းကျော် ကတော့ ပဋိပက္ခနဲ့ မလုံခြုံမှုတွေကြောင့် ထွက်ပြေးတိမ်းရှောင်နေကြရတာဖြစ်ပြီး ပညာရေးနဲ့ အနာဂတ်ကို မှီခိုနေရတဲ့ ကလေးသူငယ်ဦးရေ သုံးပုံတပုံလောက် ပါဝင်နိုင်တယ်လို့ ခန့်မှန်းထားပါတယ်။