အီရန်နဲ့ ဆွီဒင်တို့ ၂ နိုင်ငံကြား အကျဉ်းသားချင်း ဖလှယ်အပြီးမှာ အီရန်နိုင်ငံထဲမှာ ထိန်းသိမ်းခံထားရတဲ့ ဆွီဒင်နိုင်ငံသား ယိုဟန် ဖလိုဒယ်ရက်စ်နဲ့ ဆာအိအာဇီဇီတို့ဟာ ဆွီဒင်နိုင်ငံဆီ လေယာဉ်နဲ့ ပြန်ရောက်လာပြီလို့ ဆွီဒင်ဝန်ကြီးချုပ် အူးလ်ဖ် ခရစ္စတာရှုံ့ဖ်က ကြေညာချက်ထုတ်ပြန် ပြောပါတယ်။
ဖလိုဒယ်ရက်စ်ဟာ ဥရောပသမဂ္ဂ ဝန်ထမ်းတဦး ဖြစ်ပြီး ၂၀၂၂ ခုနှစ်မှာ အီရန်နိုင်ငံထဲမှာ ဖမ်းဆီးခံခဲ့ရတာပါ။
အစ္စရေးနိုင်ငံအတွက် သူလျှိုလုပ်မှု၊ အကျင့်ပျက်ခြစားမှုတွေနဲ့လည်း တရားစွဲဆိုခံခဲ့ရပါတယ်။ ဒီအမှုတွေဟာ အီရန်မှာ သေဒဏ် ပေးခံရနိုင်တဲ့ ရာဇ၀တ်မှုတွေပါ။
ဆွီဒင်-အီရန်နိုင်ငံသား ၂ ခုခံယူထားတဲ့ ဆာအိ အာဇီဇီဟာလည်း ၂၀၂၃ ခုနှစ် နိုဝင်ဘာလမှာ အီရန်နိုင်ငံထဲမှာ အဖမ်းခံရပြီး မှားယွင်းတဲ့ အကြောင်းပြချက်နဲ့ အဖမ်းခံရတာလို့ ဆွီဒင် အစိုးရက ပြောခဲ့ပါတယ်။
ဆွီဒင်မှာ ပြစ်ဒဏ်ကျခံနေရတဲ့ အီရန်အရာရှိဟောင်း ဟာမစ်နူရီလည်း လွတ်မြောက်လာပြီး အီရန်မြို့တော် တီရန်ကို ဇွန်လ ၁၅ ရက်မှာ ပြန်ရောက်လာခဲ့ပါတယ်။
နူရီဟာ ၁၉၈၈ ခုနှစ် အီရန်နိုင်ငံရေးအကျဉ်းသားများ အစုလိုက်အပြုံလိုက် ကွပ်မျက်မှုနဲ့ ညှဉ်းပန်းနှိပ်စက်မှုတွေအတွက် စစ်ရာဇဝတ်မှုတွေနဲ့ ထောင်ဒဏ်တသက်တကျွန်း ချမှတ်ခံခဲ့ရသူပါ။
အသက် ၆၃ နှစ်ရှိပြီဖြစ်တဲ့ နူရီဟာ ၂၀၁၉ ခုနှစ်မှာ စတော့ဟုမ်းလေဆိပ်မှာ ဖမ်းဆီးခံခဲ့ရပြီး စွဲချက်တွေကို သူက ငြင်းဆိုထားပါတယ်။
ဆွီဒင်- အီရန်နိုင်ငံသားနှစ်မျိုး ခံယူထားတဲ့ အရေးပေါ်ဆေးကုဆရာဝန် အာမက် ဒရေဇာ ဂျလာလီဟာ အီရန်နိုင်ငံဆီ ပညာသင်လာရောက်ချိန် ၂၀၁၆ ခုနှစ်မှာ ဖမ်းဆီးခံခဲ့ရပြီး အီရန်အကျဉ်းထောင်ထဲမှာ ကျန်ရှိနေဆဲ ဖြစ်ပါတယ်။
Source - Reuters
