ကမ္ဘာတဝန်းနေရပ်စွန့်ခွာထွက်ပြေးခဲ့ရတဲ့ ရွှေ့ပြောင်းနေထိုင်သူ ဦးရေဟာ ၁၀ နှစ်အတွင်း ၂ ဆတိုးခဲ့ပြီး သန်း ၁၂၀ အထိ ရှိလာတယ်လို့ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) က ထုတ်ပြန်ပါတယ်။

အကြမ်းဖက်မှု၊ နှိပ်စက်မှု၊ ပဋိပက္ခဖြစ်ပွားမှုတို့ကြောင့် ကမ္ဘာတဝန်း လူ ၆၉ ဦးအနက် တဦးဟာ နေရပ်ကိုစွန့်ခွာပြီး ဒုက္ခသည်အဖြစ် ရွှေ့ပြောင်းနေထိုင်ရတာ ဖြစ်ပါတယ်။

UNHCR ရဲ့ ထုတ်ပြန်ချက်အရ အနည်းဆုံး လူ ၁၁၇ ဒသမ ၃ သန်းဟာ နေရပ်စွန့်ခွာ ထွက်ပြေးနေရတယ်လို့ သိရပါတယ်။

၂၀၂၄ ခုနှစ် အစောပိုင်း ၄ လမှာ ဒီလို လူ့အခွင့်အရေး ချိုးဖောက်ခံရမှုတွေကြောင့် ဒုက္ခသည်တွေ ပိုတိုးလာပြီး ဧပြီလမှာ သန်း ၁၂၀ ကျော်လာတာ ဖြစ်ပါတယ်။

အစ္စရေး-ဂါဇာ စစ်ပွဲကြောင့် နိုင်ငံရဲ့ လူ ၇၅ ရာခိုင်နှုန်း ၁ ဒသမ ၇ သန်းဟာ နေရပ်စွန့်ပြေးရတဲ့ ဒုက္ခသည်တွေ ဖြစ်လာပါတယ်။

ဆူဒန်၊ ယူကရိန်းနဲ့ အခြားဒေသတွေမှာလည်း နေရပ်စွန့်ပြေးရတဲ့သူတွေရှိလို့ ၂၀၂၃ ခုနှစ်ကထက် ၇ ရာခိုင်နှုန်း တိုးတက်လာပါတယ်။​

တခြားနိုင်ငံမှာ ဒုက္ခသည်အဖြစ် ခိုလှုံခွင့်တောင်းခံတဲ့သူ ၆ ဒသမ ၉ သန်းအထိရှိပြီး အရင်နှစ်ကထက် ၂၆ ရာခိုင်နှုန်း တိုးတက်ခဲ့တာဖြစ်ပါတယ်။

တကမ္ဘာလုံးကို ကြည့်မယ်ဆိုရင်  အီရန်မှာ ၃ ဒသမ ၈ သန်း၊ တူရကီမှာ ၃ ဒသမ ၃ သန်း၊ ကိုလံဘီယာမှာ ၂ ဒသမ ၉ သန်း၊ ဂျာမနီမှာ ၂ ဒသမ ၆ သန်း၊ ပါကစ္စတန်မှာ ၂ သန်းအထိ ဒုက္ခသည်ဦးရေ တိုးတက်လာတာဖြစ်ပါတယ်။

ဂျာမနီိနိုင်ငံကတော့ ရွှေ့ပြောင်းဒုက္ခသည်တွေ ခိုလုံမှုအများဆုံးဖြစ်ပြီး ယူကရိန်း၊ ဆီးရီးယား၊ အာဖဂန်နစ္စတန်နဲ့ အီရန်နိုင်ငံတို့က အဓိက ပြောင်းရွှေ့ခဲ့တာ ဖြစ်ပါတယ်။