ပါလက်စတိုင်း ဟားမတ်စ်အဖွဲ့ရဲ့ အပစ်အခတ်ရပ်စဲရေး အဆိုပြုချက်အပေါ် တုံ့ပြန်မှုထဲမှာ အပြောင်းအလဲ အများအပြားကို အဆိုပြုထားပြီး အဲဒီထဲက တချို့ ပြောင်းလဲချက်တွေက အလုပ်ဖြစ်နိုင်ပြီး တချို့အချက်တွေကတော့ အဆင်မပြေကြောင်း အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်က ဇွန် ၁၂ ရက်မှာ ပြောပါတယ်။

အမေရိကန် နိုင်ငံခြားရေးဝန်ကြီး ဘလင်ကန်က “ဟားမတ်စ်က စားပွဲဝိုင်းမှာ ဆွေးနွေးထားတဲ့ အဆိုပြုချက်ကို အပြောင်းအလဲတွေ အများအပြား လုပ်ထားလို့ အဲဒီအပြောင်းအလဲတွေကို အီဂျစ် လုပ်ဖော်ကိုင်ဖက်တွေနဲ့ ကာတာဝန်ကြီးချုပ်တို့နဲ့ ဆွေးနွေးခဲ့ပြီး ဟားမတ်စ်ရဲ့ တုံ့ပြန်မှုကို စောင့်နေတယ်”လို့ ကာတာနိုင်ငံ ဒိုဟာမြို့မှာ ပြုလုပ်တဲ့ သတင်းစာရှင်းလင်းပွဲမှာ ပြောသွားတာပါ။

“ဒါပေမဲ့ ရှေ့ရက်တွေမှာ အရေးတကြီး လုပ်ရမှာက ဒီသဘောတူညီချက်ကို ပိတ်သိမ်းသွားဖို့ ကျွန်ုပ်တို့ရဲ့ မိတ်ဖက်တွေဖြစ်တဲ့ ကာတာ၊ အီဂျစ်တို့နဲ့အတူ ကြိုးစားပြီးတော့ တွန်းအားဆက်ပေးသွားမှာပါ” လို့လည်း ဝန်ကြီး ဘလင်ကန်က ဆိုပါတယ်။

ဘာကြောင့်လဲဆိုတော့ ဒါဟာ အစ္စရေး၊ ပါလက်စတိုင်း၊ ဒီဒေသနဲ့ အမှန်စင်စစ် တကမ္ဘာလုံးရဲ့ အကျိုးစီးပွားအတွက်ပါပဲလို့လည်း ဆိုပါတယ်။

ဒါ့အပြင် အပစ်အခတ်ရပ်စဲရေး အဆိုပြုချက်ဟာ နိုင်ငံတကာ အသိုက်အဝန်းတရပ်လုံး ထောက်ခံတဲ့ အခြေခံမူတွေနဲ့ သဘောတူညီချက်ကို အခြေခံရမှာ ဖြစ်ကြောင်းလည်း အားလုံးက သဘောတူထားပြီးသားလို့ ဘလင်ကန်က ပြောပါတယ်။

အဆုံးစွန်အားဖြင့် ဒါက ဟားမတ်စ်လိုချင်တဲ့ လမ်းကြောင်းကို လိုက်နိုင်မှာ မဟုတ်ကြောင်းနဲ့ ဒီဒေသနဲ့ ဒေသခံပြည်သူတွေအတွက် အနာဂတ်ကို ဟားမတ်စ်ကို ဆုံးဖြတ်ခွင့် မပေးပါဘူးလို့ ဘလင်ကန်က ပြောသွားပါတယ်။

အခုသီတင်းပတ်အစောပိုင်း မေလ ၁၀ ရက်နေ့မှာ ကုလသမဂ္ဂ လုံခြုံရေးကောင်စီက အပစ်ရပ်စဲရေး အဆိုပြုချက်ကို ကျောထောက်နောက်ခံပြုပေးခဲ့ပြီး ၈ လကြာစစ်ပွဲကို အဆုံးသတ်ဖို့ ရည်ရွယ်တဲ့ သဘောတူညီချက်ကို လက်ခံဖို့ ပါလက်စတိုင်း စစ်သွေးကြွတွေကို တိုက်တွန်းခဲ့တာ ဖြစ်ပါတယ်။

ဒီအပစ်အခတ်ရပ်စဲရေးဟာ ဂါဇာမှာ ရန်လိုမှုတွေ ထာဝရအဆုံးသတ်ရေး၊ အစ္စရေးတပ်ဖွဲ့များ ဆုတ်ခွာရေး၊ ပါလက်စတိုင်းနယ်မြေ ပြန်လည်တည်ဆောက်ရေးနဲ့ အစ္စရေးရှိ ပါလက်စတိုင်း အကျဉ်းသားတွေကို လွှတ်ပေးရေး စတဲ့အချက်တွေကို ဦးတည်ရမှာဖြစ်ကြောင်း ဟားမတ်စ် တာဝန်ရှိသူတဦးက  ရိုက်တာသတင်းဌာနကို ပြောကြားခဲ့ပါတယ်။

Source-Reuters