သမိုင်းဝင် “ကမ္ဘာထွက်” ဓာတ်ပုံကို ရိုက်ကူးခဲ့ သူ အပိုလို - ၈ အာကာသယာဉ်မှူး ဝီလျံအန်ဒစ်ဟာ လေယာဉ်ပျက်ကျ ကွယ်လွန်သွားခဲ့ပါတယ်။
အသက် ၉၀ အရွယ်အန်ဒါစ်ဟာ ဇွန် ၇ ရက်က ဝါရှင်တန်ပြည်နယ်မှာ လေယာဉ်ငယ် တစင်းကို ကိုယ်တိုင်မောင်းနှင်စဉ် ပျက်ကျကွယ်လွန်သွားတယ်လို့ ဒေသမီဒီယာတွေက ဖော်ပြပါတယ်။
လူသားတိုင်းဟာ နေထွက်တာ၊ လထွက်တာကို မြင်ခွင့်ရခဲ့ပေမဲ့ ကမ္ဘာထွက်တာကိုတော့ လကနေ ပြန်ကြည့်မှသာမြင်ခွင့်ရမှာဖြစ်ပါတယ်။
လကို ပတ်ခဲ့တဲ့ ပထမဆုံးလူသားသုံးဦးထဲက တစ်ဦးဖြစ်တဲ့ ဝီလျံအန်ဒါစ်ဟာ အပိုလို ၈ ခရီးစဉ် အတွင်း သမိုင်းဝင် “ကမ္ဘာထွက်”ဓာတ်ပုံကို ရိုက်ကူးခဲ့သူဖြစ်ပါတယ်။
သူ တဦးတည်း စီးနင်းမောင်းနှင်လာတဲ့ လေယာဉ်ငယ်ဟာ ဂျုံးစ်ကျွန်း ကမ်းရိုးတန်းမှာ ထိုးဆင်း သွားခဲ့တာဖြစ်တယ်လို့ သားဖြစ်သူ ဂရက်က အတည်ပြုပါတယ်။
အမေရိကန်ရေတပ်အကယ်ဒမီဆင်း၊ လေတပ်လေယာဉ်မှူးဟောင်း အန်ဒါစ်ဟာ ၁၉၆၃ မှာ အာကာသ ယာဉ်မှူးအဖြစ် နာဆာကို ဝင်ရောက်ခဲ့ပါတယ်။
၁၉၆၈ မှာ အပိုလို ၈ နဲ့အတူ ကမ္ဘာပတ်လမ်းထဲက ထွက်ခွာပြီး လဆီကို မိုင် ၂၄၀,၀၀၀ ဝေးတဲ့ ခရီးထွက်ခွာရာမှာ လိုက်ပါခွင့်ရခဲ့ပါတယ်။
အဲဒီခရီးစဉ်မှာ လရဲ့မိုးကုတ်စက်ဝိုင်းပေါ်ကနေ ထွက်ပေါ်လာတဲ့ ကမ္ဘာရဲ့ ပုံရိပ်ကို အန်ဒါစ်က အမှတ်မထင်ရိုက်ကူးနိုင်ခဲ့ပါတယ်။
အန်ဒါစ်ဟာ အဲဒီခရီးစဉ်မှာ လူသစ်အနေနဲ့ ဝါရင့်အာကာသယာဉ်မှူး ၂ ဦးနဲ့အတူ လိုက်ပါခဲ့တာ ဖြစ်ပါတယ်။
အန်ဒါစ်ဟာ မစ်ရှင်ကွန်မန်ဒါ ဖရန့်ဘောမန်း၊ နောက်ပိုင်းမှာ ပျက်ကျခဲ့တဲ့ အပိုလို ၁၃ ရဲ့ ကွန်မန်ဒါ ဖြစ်လာသူ ဂျိမ်းလိုဗဲလ်တို့နဲ့အတူ တိုင်းမ်မဂ္ဂဇင်းရဲ့ အဲဒီနှစ်အတွက် “Men of the Year” အဖြစ် အရွေးခံခဲ့ရပါတယ်။
ဒီခရီးစဉ်ဟာ နောက် ၇ လအကြာ လပေါ်ကို လူပထမဆုံးဆင်းသက်တဲ့ အပိုလို ၁၁ ယာဉ်အတွက် လမ်းဖွင့်ပေးခဲ့ပါတယ်။
Source: Reuters
