ရခိုင်ပြည်နယ်၊ မောင်တောမြို့နယ်က နယ်ခြားစောင့်ရဲတပ်ရင်းတွေဖြစ်တဲ့ နခခ ၆ (အင်းဒင်) နဲ့ နခခ ၉ (မြင်းလွှတ်) တို့ကို အာရက္ခတပ်တော် (AA) က သိမ်းပိုက်လိုက်တယ်လို့ မောင်တောဒေသခံတွေက ပြောပါတယ်။

နယ်ခြားစောင့်တပ်ဖွဲ့ခွဲ (နခခ) ၆ (အင်းဒင်) ကို ဇွန် ၆ ရက် မနက်ပိုင်းမှာ သိမ်းပိုက်နိုင်ခဲ့တာဖြစ်ပြီး နခခ ၉ (မြင်းလွှတ်) ကိုတော့ ဇွန် ၇ ရက် မနက်ပိုင်းမှာ သိမ်းပိုက်နိုင်ခဲ့တာလို့ မောင်တောမြို့မှ စစ်ရေးအကဲခတ်တဦးက ပြောပါတယ်။

“မနေ့က မနက်ပိုင်းကတည်းက စစ်ကောင်စီရဲ့ နခခ ၆ (အင်းဒင်) ကို AA က သိမ်းပိုက်ထားပြီးဖြစ်တယ်။ ဒီနေ့မှာလည်း နခခ ၉ (မြင်းလွှတ်) ကို ထပ်သိမ်းပိုက်ခဲ့တာ ဖြစ်တယ်။ အင်းဒင်ကျသွားတော့ မောင်တောတောင်ပိုင်းကို AA က အပြည့်အဝ ထိန်းချုပ်လိုက်ပြီလို့ ပြောလို့ရတယ်။ နခခ ၂၊ နခခ ၄ နဲ့ နခခ ၅ တို့ဟာလည်း AA က ဝိုင်းရံပိတ်ဆို့တာကို ခံနေကြရတယ်။”

အခုသိမ်းပိုက်ရရှိတဲ့ နခခ ၆ (အင်းဒင်) နဲ့ နခခ ၉ (မြင်းလွှတ်) တို့ကို အာရက္ခတပ်တော် (AA) က ဇွန် ၂ ရက်မှာ စတင်ထိုးစစ်ဆင်ခဲ့တာဖြစ်ပြီး ၄ ရက်အကြာမှာ သိမ်းပိုက်နိုင်ခဲ့တာပါ။

လက်ရှိ မောင်တောမြို့နယ်အတွင်းမှာ နခခ ၂ (၄ မိုင်)၊ နခခ ၄ (မောရဝတီ) နဲ့ နခခ ၅ (မြို့သူကြီး) တို့သာ ကျန်ရှိတော့ပြီး နခခ ၈ ခုရှိတဲ့အထဲက ၅ ခုကို သိမ်းပိုက်ထားပါတယ်။

ကျန် နခခတွေ မကျစေဖို့အတွက် စစ်ကောင်စီက လေကြောင်း၊ လက်နက်ကြီးတွေနဲ့ ခုခံနေရတယ်လို့ ဒေသခံတွေက ပြောပါတယ်။

ဒါ့အပြင် AA က အမ်း၊ သံတွဲမြို့နယ်တွေမှာလည်း စစ်ကောင်စီတပ်စခန်းတွေကို အပြင်းအထန် ထိုးစစ်ဆင် တိုက်ခိုက်နေပါတယ်။

ရခိုင်တိုက်ပွဲ ၆ လကျော်အတွင်းမှာ အာရက္ခတပ်တော်က မြို့နယ် ၁၀ ခုအထိ သိမ်းပိုက်ရရှိထားပြီး ဖြစ်ပါတယ်။