မွန်ပြည်နယ်၊ ကျိုက်ထိုမြို့မှာ ဇွန် ၂ ရက်‌နဲ့ ၃ ရက်က စစ်ကောင်စီရဲ့ လက်နက်ကြီး ပစ်ခတ်မှုတွေကြောင့် ကိုယ်ဝန်ဆောင်တဦး အပါအဝင် ၃ ဦး ဒဏ်ရာရရှိခဲ့ပြီး နေအိမ် ၅ လုံး ပျက်စီးခဲ့တယ်လို့ ဒေသခံတွေနဲ့ KNU သထုံခရိုင်ထံက သိရပါတယ်။

ကျိုက်ထိုမြို့နယ်၊ သိမ်ဇရပ်မြို့အခြေစိုက် စစ်ကောင်စီ အမှတ် ၃၁၀ အမြောက်တပ်နဲ့ ဝါးဒက်ကွင်းအခြေစိုက် ခမရ ၂၀၇ ဌာနချုပ်တို့ကို ဇွန် ၂ ရက်က တော်လှန်ရေးတပ်ဖွဲ့တွေက ပြောက်ကျား ပစ်ခတ်ခဲ့တာကြောင့် စစ်ကောင်စီတပ်ရင်း ၂ ခုက ကျေးရွာတွေကို ပစ်မှတ်ထားပြီး လက်နက်ကြီး အလုံး ၃၀ ထက်မနည်း ပစ်ခတ်ခဲ့ပါတယ်။

စစ်ကောင်စီရဲ့ ပစ်ခတ်မှုကြောင့် ဝါးဒက်ကွင်း၊ စစ်ကွင်း၊ အခိုင်၊ သုံးခွ၊ မုက္ခမော့နဲ့ ခရွဲကျေးရွာထဲ ကျရောက်ပေါက်ကွဲပြီး မုက္ခမော့ကျေးရွာက အသက် ၂၆ နှစ်အရွယ် ကိုယ်ဝန် ၆ လရှိတဲ့ မ‌ခင်လေးရီ ဘယ်ခြေထောက် လက်နက်ကြီးစ ထိမှန်ဒဏ်ရာ ရရှိခဲ့သလို စစ်ကွင်းရွာက နေအိမ် ၂ လုံး ပျက်စီးခဲ့ပါတယ်။

KNU သထုံခရိုင် အတွင်းရေးမှူး ပဒိုစောအေးနိုင်က “စစ်ကောင်စီတပ်ရင်းနှစ်ခုကို တော်လှန်ရေးတပ်ဖွဲ့တွေက ပြောက်ကျားသွားပစ်တာကို ထိခိုက်မှုရှိသွားလို့ ကျေးရွာတွေဘက်ကို ပစ်မှတ်ထားပြီး ပစ်တာပါ။ ကိုယ်ဝန်ဆောင်တဦးက ဒဏ်ရာရပြီး အိမ် ၂ လုံး ပျက်စီးတယ်။ ခုထိလည်း ဆက်ပစ်နေတုန်းပဲဆိုပေမဲ့ အထိအခိုက်စာရင်း ထပ်မရသေးပါဘူး” လို့ ပြောပါတယ်။

မေ ၃ ရက်မှာလည်း သုံးခွရွာမှ ကက်သလစ်သီလရှင်တပါးနဲ့ ဝါးဒက်ကွင်းရွာမှ အသက် ၂၀ အရွယ် အမျိုးသားတဦးတို့လည်း စစ်ကောင်စီပစ်လိုက်တဲ့ လက်နက်ကြီးစ ထိမှန်ဒဏ်ရာ ရရှိခဲ့ပြီး နေအိမ် ၃ လုံး ပျက်စီးခဲ့ပါတယ်။

ဝါးဒက်ကွင်း ဒေသခံတဦးက “လက်နက်ကြီးတွေက ဆက်တိုက်ပစ်နေတာ၊ ရှောင်နေတဲ့သူတွေလည်း ရှောင်နေကြပြီ။ ခုထိတော့ ၃ ဦးပဲ ထိခိုက်ထားတယ်။ ရွာတွေထဲကို တမင်သက်သက် ပစ်နေတာ။ ရွာသားတွေလည်း အကုန်လန့်နေတယ်” လို့ ပြောပါတယ်။

သိမ်ဇရပ်အခြေစိုက် စစ်ကောင်စီအမှတ် ၃၁၀ အမြောက်တပ်နဲ့ ဝါးဒက်ကွင်းအခြေစိုက် ခမရ ၂၀၇ ဌာနချုပ်တို့ကို KNLA ပူးပေါင်းတပ်တွေက လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့တာကြောင့် စစ်ကောင်စီတပ်သားတဦး သေဆုံးပြီး ၄ ဦး ဒဏ်ရာရရှိခဲ့ပါတယ်။