ထိုင်းတောင်ပိုင်း စူရတ်ဌာနီခရိုင် ခိုတောင်ကျွန်းမှာ တရားမဝင်ဧည့်လမ်းညွှန် ဝင်ရောက် လုပ်ကိုင်နေတဲ့ မြန်မာနိုင်ငံသား ၈ ဦး ဖမ်းဆီးခံရတယ်လို့ ထိုင်းရတ်သတင်းမှာ ဖော်ပြပါတယ်။ 

ကော်ဖငန်းမြို့နယ် ခိုတောင်(လိပ်ကွန်း) နဲ့ နန်းယွန်းကျွန်းပေါ်မှာ နိုင်ငံခြားသားတွေဟာ ထိုင်းနိုင်ငံသားတွေသာလျှင် လုပ်ကိုင်ခွင့်ရှိတဲ့ တိုးရစ်စ်ဂိုက် (ဧည့်လမ်းညွှန်) အလုပ်ကို ဝင်ရောက် လုပ်ကိုင်နေကြောင်း တိုင်ကြားချက်ရတဲ့အတွက် ခရိုင်လဝကရဲ၊ တိုးရစ်စ်ရဲနဲ့ နယ်မြေခံရဲတွေ ပူးပေါင်းပြီး စုံစမ်းထောက်လှမ်းမှုတွေ ပြုခဲ့ပါတယ်။ 

ထောက်လှမ်းရေးရဲတွေဟာ ကော်စမွီ နဲ့ ခိုတောင် ခရီးသွားလုပ်ငန်းကုမ္ပဏီ ၂ ခုကနေ အလည်အပတ်ထွက်ဖို့ ပက်ကေ့ချ်ဝယ်ခဲ့ယူခဲ့တယ်၊ မေ ၂၃ ရက်နေ့မှာ ခရီးသွားဧည့်သည် အသွင်ဆောင်ပြီး ခရီးစဉ်တလျှောက် လိုက်ပါသွားခဲ့ပါတယ်။ အဲဒီခရီးစဉ်မှာ လှေ ၂ စီးဖြစ်ပြီး မြန်မာနိုင်ငံသားတွေက ဧည့်သည်တွေကို လည်ပတ်စရာနေရာတွေ ခေါ်ဆောင်သွားပြီး ဒေသအကြောင်း ရှင်းပြတယ်။ ရေငုပ်တဲ့နေရာ ခေါ်သွားတယ်၊ ကုန်းပေါ်က ဗျူးပွိုင့်ရှုမျှော်ခင်းတွေလည်း လိုက်ပို့တယ်။ သူတို့ဟာ တကယ့်ဧည့်လမ်းညွှန်တွလို လုပ်နေတာကို အရပ်ဝတ်ထောက်လှမ်း‌ရေးတွေက သက်သေအဖြစ် ဓာတ်ပုံတွေရိုက်ထားခဲ့တယ်လို့ တာဝန်ရှိသူတဦးက သတင်းထောက်ကို ပြောပါတယ်။ 

ခရီးစဉ်အဆုံးမှာ တရားမဝင်ဧည့်လမ်းညွှန်လုပ်နေတဲ့ မြန်မာနိုင်ငံသား ၆ ဦးနဲ့ စက်လှေ ခုတ်မောင်းတဲ့ မြန်မာ ၂ ဦး စုစုပေါင်း ၈ ဦးကို ဖမ်းဆီးခဲ့တယ်။ သူတို့မှာ နေထိုင်ခွင့်သက်သေ အထောက်အထားတွေရှိပေမဲ့ အလုပ်သမားဥပဒေက ခွင့်မပြုတဲ့အလုပ်မှာ ဝင်‌ရောက်လုပ်ကိုင်မှု၊ လှေမောင်းသမား ၂ ဦးမှာ စက်လှေမောင်း လိုင်စင်မရှိဘဲ ခုတ်မောင်းမှု၊ အလုပ်‌ရှင် ပြောင်းလဲတာကို ၁၅ ရက်အတွင်း သက်ဆိုင်ရာကို အကြောင်းမကြားမှု စတာတွေနဲ့  အရေးယူသွားမယ်လို့ ဆိုပါတယ်။ 

ဒါ့အပြင် ခရီးသွားကုမ္ပဏီမှာ တရားမဝင်ဧည့်လမ်းညွှန်ခအတွက် ငွေကြေးကောက်ခံပေးခဲ့တဲ့ ဗြိတိန်နိုင်ငံသား ၁ ဦးနဲ့ ဩစတြေးလျနိုင်သံသား ၁ ဦးတို့ပါ အမှုဖွင့် အရေးယူခံရမယ်လို့ တာဝန်ရှိသူမှ သတင်းထောက်ကို ပြောသွားပါတယ်။ 

ကိုးကား - Daily News