တနင်္သာရီတိုင်း၊ ကျွန်းစုမြို့နယ်၊ ပဲ့တိုင်ကျေးရွာအုပ်စု၊ ယမုံရွာဘောလုံးကွင်းမှာ တရားမဝင် ခဲသတ္တုတူးဖော် လုပ်ကိုင်နေတယ်လို့ ဒေသခံတွေက ပြောပါတယ်။
အဆိုပါဘောလုံးကွင်းကို ဦးမောင်ရှည် ဆိုသူက စစ်ကောင်စီလက်အောက်ခံ အုပ်ချုပ်ရေးမှူးတွေနဲ့ ရဲစခန်းကို လာဘ်ထိုးပြီး တရားမဝင် ခဲသတ္တုလုပ်ကိုင်လာတာ ၅ လခန့် ရှိနေပြီလို့ ဒေသခံတွေက ဆိုပါတယ်။
ယမုံရွာဘောလုံးကွင်းဟာ အလျား ၂၀၀ ပေနဲ့ အနံ ပေ ၁၅၀ ရှိပြီး အများပြည်သူပိုင်အဖြစ် သတ်မှတ်ကာ ဒေသခံတွေ လေ့ကျင့်ခန်းလုပ်တဲ့နေရာ ဖြစ်ပါတယ်။
စစ်ကောင်စီနဲ့ နီးစပ်သူတဦးက “ဦးမောင်ရှည်က ဘောလုံးကွင်းမှာ ခဲမိုင်းလုပ်ဖို့အတွက် ပဲ့တိုင်ကျေးရွာအုပ်စုက အုပ်မှူးတွေကို သိန်း ၅၀ ပေးရတယ်။ ယမုံရွာက အုပ်မှူးတွေကို တလ ၅ သိန်းပေးရတယ်။ သဇင်ကျေးရွာ ရဲစခန်းကို သိန်း ၂၀ ပေးရတယ်” လို့ ပြောပါတယ်။
အဆိုပါ တရားမဝင် ခဲမိုင်းလုပ်ကိုင်တာနဲ့ ပတ်သက်ပြီး ဒေသခံတွေက သဇင်ရဲစခန်းကို တိုင်ကြားထားပေမဲ့ တစုံတရာ အရေးယူဆောင်ရွက်တာ မရှိဘူးလို့ ဒေသခံတွေဆီက သိရပါတယ်။
ဒေသခံတဦးက “ဘယ်နေရာတိုင်တိုင် သူတို့က မကြောက်ဘူးလို့ ပြောတယ်။ တိုင်ကြားတဲ့ ဒေသခံတွေကိုလည်း ဖိနှိပ်ထားတာ။ သူတို့ခဲမိုင်းက တလကို ၃ တန်လောက်ထွက်တယ်” လို့ ပြောပါတယ်။
စစ်အာဏာမသိမ်းခင်တုန်းက ယမုံရွာမှာ ခဲသတ္တုတူးဖော်နေတဲ့ ထိုင်းပိုင် ငွေကမ္ဘာကုမ္ပဏီနဲ့ တရုတ်ပိုင် ရွှေပင်လယ်ကုမ္ပဏီအပြင် တနိုင်တပိုင် ခဲမိုင်း ၂၀ ကျော်လောက်သာရှိပြီး အာဏာသိမ်းပြီးနောက်ပိုင်းမှာ တနိုင်တပိုင် ခဲမိုင်း ၃၁၂ ခုအထိ ရှိလာတယ်လို့ ခဲမိုင်းလုပ်ကိုင်နေသူတွေဆီက သိရပါတယ်။
