အာဖဂန်နစ္စတန်အလယ်ပိုင်းမှာ လောလောလတ်လတ် ရွာသွန်းလိုက်တဲ့ မိုးနဲ့ ရေကြီးရေလျှံမှုတွေကြောင့် အနည်းဆုံး လူ ၅၀ ထက်မနည်း သေဆုံးခဲ့ပြီး အိမ်ခြေထောင်ပေါင်းများစွာလည်း ပျက်စီးခဲ့ကြောင်း အရာရှိတဦးက မေလ ၁၈ ရက် မှာ ပြောပါတယ်။

မေလ ၁၇ ရက်ကစတင်ခဲ့တဲ့ မိုးရွာသွန်းမှုကြောင့် လူဘယ်လောက် ထိခိုက်ဒဏ်ရာရခဲ့တယ်ဆိုတဲ့ သတင်းလည်း မသိရသေးကြောင်းနဲ့ ဒေသကိုသွားရောက်ရာ အဓိကလမ်းမကြီး အများအပြား ပြတ်တောက်ခဲ့ကြောင်း အလယ်ပိုင်း ဂေါရ်ပြည်နယ် ပြန်ကြားရေးဌာန အကြီးအကဲ မော်လဝီ အဗ္ဗဒူလ် ဟိုင်ဇာအီးမ်က ပြောပါတယ်။

ပြည်နယ်မြို့တော် ဖဲရော့ဇ်ကိုမှာ အိမ်ခြေ ၂၀၀၀ က လုံးဝကိုပျက်စီးခဲ့ပြီး တစိတ်တပိုင်း ပျက်စီးသွားတဲ့ နေအိမ်က ၄၀၀၀၀ လောက်ရှိကြောင်းနဲ့ ဆိုင်ခန်းပေါင်း ၂၀၀၀ ကျော်က ရေအောက်မှာ ရောက်နေကြောင်း ဇာအီးမ်က ပြောဆိုပါတယ်။

ပြီးခဲ့တဲ့သီတင်းပတ်ကလည်း ရုတ်တရက် မိုးသည်းထန်စွာ ရွာသွန်းမှုကြောင့် အာဖဂန်နစ္စတန် မြောက်ပိုင်းရှိ ကျေးရွာတွေ ပျက်စီးခဲ့ပြီး လူ ၃၁၅ ဦး သေဆုံးကာ ၁၆၀၀ ကျော် ဒဏ်ရာရရှိခဲ့ကြောင်း အာဏာပိုင်တွေက ပြောကြားခဲ့ပါတယ်။ 

Source/Photo - REUTERS/Stringer