မွန်ပြည်နယ်၊ ဘီးလင်းမြို့နယ်ရှိ ကျုံအိတ်တံတား မိုင်းခွဲဖျက်ဆီးခံရပြီးနောက် ရန်ကုန်-မော်လမြိုင်ကားလမ်း အသုံးပြုမရတော့ဘဲ ရထားစီးနင်းသူ ပိုများလာတဲ့အတွက် မေ ၁၃ ရက်ကစပြီး အထူးရထား တိုးချဲ့ပြေးဆွဲခဲ့တယ်လို့ မီးရထားဝန်ထမ်းတွေက ပြောပါတယ်။
ကျုံအိတ်တံတား အချိုးခံရပြီးနောက် ရထားစီးနင်းသူ များပြားလာတာနဲ့ ခရီးသည်တွေရဲ့ တောင်းဆိုတာတွေကြောင့် ရန်ကုန်-မော်လမြိုင်-ရန်ကုန် အထူးရထားပြေးဆွဲခဲ့တာဖြစ်တယ်လို့ မော်လမြိုင်ဘူတာကြီးက ဝန်ထမ်းတဦးက ပြောပါတယ်။
“လက်ရှိ ကားလမ်းအသုံးမပြုရတာကြောင့် မီးရထားကို ပိုသုံးလာတယ်။ လက်ရှိ ပြေးဆွဲနေတဲ့ ရထားတကြောင်းနဲ့ လုံလောက်မှုမရှိလို့ ခရီးသည်တွေကလည်း ထပ်တိုးပြေးဆွဲဖို့ တောင်းဆိုနေလို့ ပြေးဆွဲခဲ့တာပါ။ အဓိကကတော့ ခရီးသည်တွေ အဆင်ပြေဖို့ပါ။ ဘယ်အချိန်အထိ ပြေးဆွဲသွားမယ်ဆိုပြီး အကန့်အသတ်မရှိထားပါဘူး။”
ထပ်တိုးပြေးဆွဲခဲ့တဲ့ ရန်ကုန်-မော်လမြိုင် အထူးရထားဟာ ရန်ကုန်ဘူတာကြီးကနေ မနက် ၇ နာရီခွဲ ထွက်ခွာမှာဖြစ်သလို မော်လမြိုင်-ရန်ကုန်အထူးရထားဟာ မော်လမြိုင်ဘူတာကြီးကနေ မနက် ၉ နာရီ ၁၅ မိနစ်မှာ ထွက်ခွာမှာပါ။
ကားလမ်း အသုံးမပြုရတဲ့အချိန်မှာ အထူးရထားပြေးဆွဲတာဟာ ခရီးသွားတွေအတွက် အဆင်ပြေစေပေမဲ့ မှောင်ခိုလက်မှတ်ရောင်းတာတွေကို တားမြစ်သင့်တယ်လို့ ခရီးသွားတဦးက ပြောပါတယ်။
“လက်ရှိအခြေအနေက ရထားပဲ အားကိုးနေရတာဆိုတော့ ထပ်တိုးပြေးဆွဲတာတော့ ကောင်းပါတယ်။ ဒါပေမဲ့လည်း ရုံဖွင့်ပြီး မကြာဘူး။ လက်မှတ်သွားဝယ်ပေမဲ့ မရတော့ဘူး။ မှောင်ခိုရောင်းတဲ့သူတွေကတော့ ဘယ်အတန်းစီးမလဲဆိုပြီး ဘူတာထဲမှာ ဈေး ၂ ဆ ၃ ဆတင်ပြီး လက်မှတ်လိုက်ရောင်းနေတယ်။ ဒါက မဖြစ်သင့်ဘူး။”
ရန်ကုန်-မော်လမြိုင်-ရန်ကုန် အထူးရထားအတွက်လက်မှတ်တွေကို အထူးတန်းအတွက် ၃ ရက် ကြိုတင်ရောင်းချမှာ ဖြစ်ပါတယ်။
ရိုးရိုးတန်း ရထားလက်မှတ်ကိုတော့ တရက် ကြိုတင်ကာ မော်လမြိုင်ဘူတာကြီးရှိ ရက်ကြို လက်မှတ်ရုံနဲ့ ရန်ကုန် ဝဇီရာရုပ်ရှင်ရုံရှေ့က ကြိုတင်လက်မှတ်ရုံတို့မှာ မနက် ၇ နာရီကနေ နေ့လယ် ၃ နာရီအထိ ရောင်းချသွားမယ်လို့ မီးရထားဝန်ထမ်းတွေက ပြောပါတယ်။
