မနေ့ညက ကစားခဲ့တဲ့ ပရီးမီးယားလိဂ် ပွဲစဉ် ၃၇ အပြီးမှာ ဘန်လေနဲ့ လူတန်တောင်းအသင်းတို့ ရှုံးပွဲတွေ့ခဲ့တာကြောင့် နှစ်သင်းစလုံး တန်းဆင်းသွားခဲ့ရပါတယ်။
မနှစ်ကရာသီကမှ ချန်ပီယံရှစ်ကနေ တန်းတက်လာခဲ့တဲ့ အဲဒီနှစ်သင်းဟာ တရာသီအတွင်းမှာပဲ တန်းပြန်ဆင်းသွားခဲ့ရတာပါ။
ဘန်လေအသင်းက စပါးအသင်းကို အဝေးကွင်းမှာ ၂ ဂိုး ၁ ဂိုးနဲ့ ရှုံးနိမ့်ခဲ့ပြီး ပွဲစဉ် ၃၇ အပြီးမှာ ရမှတ် ၂၄ မှတ်သာရခဲ့လို့ တန်းဆင်းရဖို့ သေချာသွားခဲ့တာပါ။
အလားတူ လူတန်တောင်းအသင်းကလည်း ဝက်စ်ဟမ်းကို ၃ ဂိုး ၁ ဂိုး နဲ့ရှုံးနိမ့်ခဲ့ပြီး ရမှတ် ၂၆ မှတ်နဲ့ အဆင့် ၁၇ က နော်တင်ဟမ်နဲ့ သုံးမှတ်ပြတ်သွားခဲ့တာပါ။
ယတိပြတ် တန်းဆင်းပြီလို့ မပြောနိုင်ပေမဲ့ လက်ကျန်တပွဲအလိုမှာ နော်တင်ဟမ်နဲ့ သုံးမှတ်ကွာဟနေတဲ့ အပြင် ဂိုးကွာခြားချက် ၁၂ ဂိုး အထိ ကွာဟနေတာကြောင့် တန်းဆင်းသွားပြီလို့ ဆိုရမှာပါ။
ရှက်ဖီးယူနိုက်တက်လည်း တန်းဆင်းသွားခဲ့ပြီဖြစ်တာကြောင့် မနှစ်ကနေ တန်းတက်လာခဲ့တဲ့ အသင်း ၃ သင်းစလုံး တန်းဆင်းသွားခဲ့ရတာ ဖြစ်ပါတယ်။
Photo - REUTERS/Tony Obrien
