မွန်ပြည်နယ်၊ ဘီးလင်းမြို့နယ်နဲ့ သထုံမြို့နယ်ကြားက ကျုံအိတ်တံတား မေ ၁၁ ရက်နေ့ မနက်အစောပိုင်းက မိုင်းဖောက်ခွဲခံရတာကြောင့် လမ်းပန်းဆက်သွယ်ရေးပြတ်တောက်ပြီး ကုန်စည်စီးဆင်းမှု ရပ်တန့်ခဲ့တယ်လို့ ဒေသခံတွေနဲ့ ကားသမားတွေက ပြောပါတယ်။
ဘီးလင်းမြို့နယ်၊ ရွှေရောင်ပြကျေးရွာအနီးမှာရှိတဲ့ ကျုံအိတ်တံတား မေ ၁၁ ရက် မနက် ၁ နာရီကျော်က မိုင်းခွဲဖျက်ဆီးခံရပြီးနောက် တံတားအနီးမှာ လက်နက်ကြီး၊ လက်နက်ငယ်အသံတွေ ဆက်တိုက်ကြားနေရတယ်လို့ ရွှေရောင်ပြရွာသားတယောက်က ပြောပါတယ်။
“ညက ၁ နာရီကျော်ကစပြီး မိုင်းခွဲသံတွေရော၊ လက်နက်ကြီး၊ လက်နက်ငယ်တွေရော ဆက်တိုက်ကြားရတာ။ ၂ နာရီ ၃ နာရီကျော်တဲ့အထိက အသံတွေက မရပ်ဘူး၊ တိုက်ပွဲဖြစ်နေတယ်ပဲ ထင်နေတာ။ မနက်ကျမှ တံတားမိုင်းခွဲခံရတာဖြစ်နေတယ်” လို့ ပြောပါတယ်။
မိုင်းခွဲခံရတာကြောင့် အရင်တခေါက်က မိုင်းခွဲခံရတာမှာ ကျန်ခဲ့တဲ့ အုတ်တံတားတခြမ်းရော ပျက်စီးနေတဲ့နေရာမှာအသစ်ထိုးထားတဲ့ သံဘေလီတံတားပါ လုံးဝပျက်စီးခဲ့ပြီး လမ်းပန်း ဆက်သွယ်ရေးပြတ်တောက်လို့ ကုန်စည်စီးဆင်းမှုရပ်တန့်သွားပြီးလို့ ကားသမားတယောက်က ပြောပါတယ်။
“ဒီတံတားက ရန်ကုန်-မော်လမြိုင်ဘက်က အရေးပါတဲ့ တံတားတခုပဲ။ လမ်းပန်းဆက်သွယ်ရေး ပြတ်တောက်သွားတာကြောင့် ဒီဘက်ရော ဟိုဘက်ရော ကုန်စည်စီးစင်းမှုလုံးဝပျက်သွားပြီး။ ခုလက်ရှိ အခြားထွက်ပေါက်လမ်းကြောင်းလည်း မရှိတော့ တံတားအမြန်ဆုံးပြင်ပြီးပါစေလို့ပဲ ဆုတောင်းမှရမယ်” လို့ ပြောပါတယ်။
ကျုံအိတ်တံတား မိုင်းခွဲခံရတာနဲ့ပတ်သက်ပြီး KNU/KNLA နဲ့ သထုံခရိုင် PDF တာဝန်ခံကို မေးမြန်းထားပေမယ့် ပြန်လည်ဖြေကြားတာမရှိသေးပါဘူး။
ရွှေရောင်ပြကျေးရွာက ကျုံအိတ်တံတားကို ၂၀၂၃ ခုနှစ်၊ ဇွန် ၂၉ ရက်နေ့က မိုင်းဖောက်ခွဲ ဖျက်ဆီးခံရတာကြောင့် တံတားတခြမ်းပြိုကျပျက်စီးခဲ့သလို တံတားပြင်ဆင်နေတဲ့ ကာလအတွင်းလည်း ၄ ကြိမ်ထက်မနည်း ဒရုန်းနဲ့ ဗုံးကြဲတိုက်ခိုက်ခံခဲ့ရပါတယ်။
ပြီးခဲ့တဲ့ မေ ၄ ရက်နေ့ကလည်း သထုံမြို့နယ်၊ တံတားဦးကျေးရွာအနီး ရန်ကုန်-မော်လမြိုင် ကားလမ်းပေါ်က တံတားတစင်း မိုင်းခွဲဖျက်စီးခံခဲ့ရတာကြောင့် တံတားလက်ရန်း နည်းနည်းပျက်စီးခဲ့သလို ဖြတ်သွားတဲ့ ၁၂ ဘီးကားလည်း မိုင်းစထိမှန်ပြီး ယာဉ်မောင်းတယောက် ဒဏ်ရာရရှိခဲ့ပါတယ်။
