မတ္တရာမြို့နယ် မန္တလေး -မိုးကုတ်ကားလမ်းမပေါ် တံငါတောင်တံတားအနီး လုံခြုံရေးကင်းကို မေ ၁၀ ရက် ဒီနေ့မနက် ၅ နာရီမှာ ပြည်သူ့ကာကွယ်ရေးတပ်တွေက တိုက်ခိုက်ခဲ့ရာ စစ်ကောင်စီတပ်က အများအပြားသေဆုံးခဲ့တယ်လို့ မြို့ခံတွေဆီက သိရပါတယ်။
စစ်ကောင်စီတပ်သားတွေဟာ မတ္တရာမြို့ တံငါကျေးရွာ ဘုန်းကြီးကျောင်းနဲ့တံငါတံတားအနီးမှာ လူခွဲတပ်စွဲထားပြီး မနက် ၅ နာရီမှ ၇ နာရီအတွင်း PDF တွေနဲ့ အပြန်အလှန်တိုက်ပွဲဖြစ်ခဲ့တာလို့ ဒေသခံတဦးက DVB ကို ပြောပါတယ်။
"ဒီနေ့မနက်အစောကြီးဖြစ်တာ ဘုန်းကြီးကျောင်းက အထိုင်စခန်းရော တံတားနားက လုံခြုံရေးကင်းရော PDF တွေက ဝင်ပစ်ပြီး သေနတ်တွေလည်း သိမ်းသွားတယ်။ ပစ်ခတ်မှုက ၁ နာရီ ၂ နာရီနီးပါးကြာတယ်။”
မတ္တရာမြို့၊ တံငါကျေးရွာ ဘုန်းကြီးကျောင်းမှာ တပ်စွဲထားတဲ့ စစ်တပ်စခန်းကို တိုက်ခိုက်သိမ်းပိုက်မှုမှာ စစ်တပ်ဘက်မှ ဗိုလ်ကြီး ချစ်ခိုင် အပါအဝင် ၁၂ ဦးသေဆုံးပြီး လက်နက်နဲ့ကျည်ဆန် အများအပြား သိမ်းဆည်းရမိခဲ့တယ်လို့ ပြည်သူ့ကာကွယ်ရေးတပ်မတော် (မန္တလေး) က သတင်းထုတ်ပြန်ထားပါတယ်။
အဆိုပါတိုက်ခိုက်မှုမှာ စစ်ကောင်စီဘက်မှ ဗိုလ်ကြီးအပါအဝင် ၃ ဦးနဲ့ ပြည်သူ့စစ် ၇ ဦး သေဆုံးကာ ၃ ဦး ဒဏ်ရာရခဲ့တယ်လို့ စစ်ဘက်နဲ့နီးစပ်သူတဦးက DVB ကို ပြောပါတယ်။
“လပခက ဗိုလ်ကြီးချစ်ခိုင်ရယ်၊ မတ္တရာဘက်မှာ စစ်သားစုဆောင်းဖို့ လွှတ်ထားတဲ့ တပ်ကြပ်တဦးရယ်၊ တပ်သားတဦးရယ် သေတယ်။ စစ်ကူလာတဲ့ ပြည်သူ့စစ်အဖွဲ့တွေလည်း ပစ်ခံရလို့ ၇ ဦးသေသွားတယ်၊ ၃ ယောက်က ဒဏ်ရာရတယ်၊ လက်နက်တွေလည်း ပါသွားတယ်။”
လတ်တလောမှာ မတ္တမြို့နယ် တံငါကျေးရွာမှာ စစ်တပ်နဲ့ ပြည်သူစစ်တွေ ရောက်နေပြီး သေဆုံးသွားတဲ့ စစ်ကောင်စီတပ်သားတွေရဲ့ ရုပ်အလောင်းတွေကို သယ်ဆောင်နေတယ်လို့ ဒေသခံတွေဆီက သိရပါတယ်။
