မန္တလေးတိုင်းဒေသကြီး၊ မြင်းခြံမြို့မှာ ဒီကနေ့ မေ ၂ ရက်၊ မွန်းတည့် ၁၂ ၀န်းကျင်က ဆိုင်ကယ်ဆီထည့်ရင်း မီးကူးစက်တာကြောင့် နေအိမ် ၁၀ လုံး မီးလောင်ဆုံးရှုံးသွားတယ်လို့ ဒေသခံတွေဆီက သိရပါတယ်။

မြင်းခြံမြို့ခံတဦးက “မြို့ပေါ်က ရပ်ကွက် ၅ နဲ့ ရပ်ကွက် ၆ အစပ်မှာ ဆိုင်ကယ်ဆီထည့်ရင်း အပူလွန်ကဲပြီးလောင်တာတဲ့။ အိမ် ၁၀ လုံးလောက် မီးလောင်သွားတယ်´´ လို့ ပြောပါတယ်။

မီးလောင်မှုဖြစ်ပွားတဲ့နေရာကို မြင်းခြံမြို့နယ်မီးသတ်နဲ့ မြို့နယ်အရန်မီးသတ်က မီးသတ်မော်တော်ယာဥ်တွေအပါအ၀င် ဒေသခံပြည်သူတွေ ဝိုင်း၀န်းငြိမ်းသတ်ခဲ့ကြတယ်လို့ ဆိုပါတယ်။

“အခု မီးလောင်မှုက မိနစ် ၃၀ လောက်ကြာမြင့်ခဲ့ပါတယ်။ မီးလောင်ဆုံးရှုံးမှုတန်ဖိုးကိုတော့ တွက်ချက်နေဆဲပါဗျ။ ဒီမြို့နယ်မှာ တပတ်အတွင်း မီးလောင်မှု ၄ ကြိမ်ဖြစ်ပွားခဲ့တာဆိုတော့ မိဘပြည်သူတွေအနေနဲ့ မီးအန္တရာယ်ကို အထူးသတိထားကြပါလို့ ပြောချင်ပါတယ်” လို့ မြင်းခြံမြို့နယ်မီးသတ်စခန်းမှ တာ၀န်ရှိသူက DVB ကို ပြောပါတယ်။

မြန်မာပြည်အလယ်ပိုင်းမှာ အပူချိန်မြင့်တက်နေတဲ့အတွက် ပြီးခဲ့တဲ့ရက်ပိုင်းကလည်း မကွေးမြို့နယ်နဲ့ ပေါင်းတည်မြို့နယ်တွေမှာ မီးလောင်ကျွမ်းမှုတွေ ဆက်တိုက်ဖြစ်ပွားခဲ့ပြီး အပူချိန်လွန်ကဲတဲ့အတွက် မန္တလေးနဲ့ မကွေးမြို့နယ်တွေမှာ လူသေဆုံးရတာအထိ ဖြစ်ပွားခဲ့တယ်လို့ သိရပါတယ်။