တိတ်ဆိတ်ငြိမ်သက်နေတဲ့ ညဟာ ဆေးလိပ်မီးညှိလိုက်တဲ့ မီးခြစ်သံကြောင့် ဟိန်းထွက်လာတယ်။ ခါတိုင်းညတွေနဲ့ မတူတဲ့အချက်က တခုခု ဖြစ်တော့မယ့်အချိန် ချောက်ချောက်ချားချား ငြိမ်သက်နေပုံမျိုးပါ။

အဘွားက သူ့မြေးတွေနဲ့ ရှေးဟောင်းနှောင်းဖြစ် ဘဝအတွေ့အကြုံတွေ ပြောပြနေချိန်လည်း ဖြစ်ပါတယ်။ အလုပ်ပင်ပန်းနေကြသူတွေအဖို့ ခေါင်းချလိုက်တာနဲ့ အိပ်ပျော်ချိန်ဆိုတော့ အကြောင်းအရာ တခုခုကို တအေးတဆေး ထိုင်ပြောလို့ရတဲ့အချိန်လည်း ဖြစ်သလို ဘေးဘီက တခြားအသံတွေ ဆိတ်ငြိမ်နေတာကိုက ပြောသူ၊ နားထောင်သူတို့အတွက် အခွင့်အခါကောင်းကို ပေးထားသလိုလည်း ဖြစ်နေပါတယ်။

အဘွားက ဆေးလိပ်ဖွာရင်း စကားတွေ ပြောရင်းပေါ့။ ခါတိုင်းညတွေနဲ့ မတူရခြင်းက ထူးခြားမှု ရှိလာဖို့ ရှေ့ပြေးနိမိတ်လို့ သတ်မှတ်ရမလိုလဲ ဖြစ်တယ်။

“ငါ ကိုင်းထဲ ဆင်းနေတဲ့အချိန် ရွာမှာ တိုက်ပွဲဖြစ်တာ။ သားသမီးဇောနဲ့ အိမ်ကို အတင်း ပြန်ပြေးတာပေါ့။ ကိုင်းပင်တွေ မြက်ပင်တွေရဲ့ အရွက်ဖျားတွေပေါ် ရှပ်တိုက် တိုးဝင်သွားတဲ့ ကျည်ဆန်တွေဆိုတာ မနည်းဘူး။ မသေလို့ အခုထိရှင်တာပေါ့”

ပစ်သံ ခတ်သံ ကြားတော့ သားဇော၊ သမီးဇောကပ်ပြီး အိမ်ကို အမြန်ဆုံးနည်းနဲ့ အပြေးပြန်ခဲ့ရပုံကို အဘွားက ပြောပြ၊ မြေးတွေက နားထောင်သူအဖြစ်နဲ့ စိတ်ကူးပုံဖော်နေကြပါတယ်။

အဘွားက သူ့အကြောင်းကို ပြန်ပြောပြတိုင်း ဆေးလိပ်ကို အခိုးအများဆုံး ဖွာဖွာထုတ်ပြီးတော့ ပြောလေ့ရှိတယ်။ အသက်ဘေးက လွတ်ခဲ့လို့ အခုလို မြေးတွေနဲ့ တဝကြီး စကားထိုင်ပြောခွင့်ရတာကိုလည်း ကျေနပ်နေတဲ့ပုံမျိုးပါ။

သူ့ငယ်ဘဝတွေကို စစ်ရှောင်ဘဝနဲ့ပဲ ကြီးပြင်းလာခဲ့ရသူလည်း ဖြစ်တယ်။ မအေ့ ခါးထစ်ခွင်ပေါ်ကနေ စစ်ပြေးဘဝနဲ့ ကြီးပြင်းလာပြီး အိမ်ထောင်ကျတဲ့ အရွယ်အထိ စစ်ရှောင်တဲ့ နေရာမှာပဲ ဘဝကို ရှင်သန်ခဲ့ရတဲ့အကြောင်းကို စကားစပ်မိတိုင်း ပြန်ပြောင်းပြောပြလေ့ ရှိပါတယ်။

တိုက်ပွဲပစ်ခတ်သံတွေကြားက အဘွားအိုတဦးကို မြင်ခဲ့ရတဲ့မြင်ကွင်းကို သတင်းသမားတဦးက အခုလို မှတ်ချက်ပြုဖူးပါတယ်။

တကြိမ် တခါမှ မကြားဖူးတဲ့ ကျယ်လောင်တဲ့ ပစ်ခတ်သံတခုကို ကြားလိုက်ရတယ်။ သူနဲ့အတူ ပါလာသူတွေကလည်း အသံကြောင့် ဟန်ချက်နည်းနည်း ပျက်သွားပါတယ်။ ဒီအသံက တော်ရုံ မျက်နှာစိမ်းသူတွေအဖို့တော့ အတော်လေး ထိတ်လန့်စရာ ဖြစ်စေပါတယ်။ သူတို့ရှေ့က ကရင်အဘွားအိုတဦးက သူ မွေးထားတဲ့ ဝက်ကို အစားကျွေးဖို့အတွက် ဟန်မပျက် လုပ်ကိုင်နေတာကို မြင်တော့ သူလည်း အံ့ဩသွားတယ်။ ဒီလောက်ကျယ်လောင်တဲ့ ပစ်ခတ်သံက ဒီအဘွားအိုကို မထိတ်လန့်စေတော့ဘူးလားလို့ သူ တွေးမိတယ်။ ပြီးတော့ သူ အဘွားအိုကို သွားမေးတယ်။ အဘွား မကြောက်ဘူးလားပေါ့။ အဘွားအိုက “ငါငယ်ငယ်ထဲက အခုချိန်ထိ ဒီအသံတွေ ကြားနေရတာ နားယဉ်နေပြီ” လို့ ပြန်ဖြေပါတယ်။ ပစ်ခတ်သံတွေကို ရိုးအီသွားတဲ့ အဘွားအိုတွေ ရှိတဲ့အကြောင်း သတင်းသမားက မှတ်ချက်ပြုသွားပါတယ်။

မြေးတွေနဲ့ စကားဝိုင်းဖွဲ့ပြောတဲ့ အဘွားဖြစ်သူဟာလည်း သေနတ်သံနဲ့ လက်နက်ကြီးသံတွေကို သူ မကြောက်တော့တဲ့အကြောင်း ပြောပြပါတယ်။ သူ ကြောက်တာထက် စိုးရိမ်တာတွေ ရှိတဲ့အကြောင်း သူ့မျက်နှာမှာ အထင်သားပေါ်နေပါတယ်။

ညက နက်သထက် နက်လာပါတယ်။ တိတ်ဆိတ်မှုကလည်း ပိုပိုပြီး နက်လာပါတယ်။ အဲဒီအချိန် စကားဝိုင်းထဲကို ခပ်လှမ်းလှမ်းက ညည်းညူသံ ဝင်ရောက်လာပါတယ်။ မြေးတွေက ဒါခွေးတွေ အူတာ၊ ခွေးသားပေါက်ကလေးတွေ အော်တာလို့ပဲ သိထားပါတယ်။ အဘွားဖြစ်သူကတော့ ဒီလို မဟုတ်ပါဘူး။

“အဲဒါ ခွေးအ(တောခွေး)တွေ အူတာ၊ ခွေးအတွေဆိုတာ တကောင်တည်း မနေကြဘူး။ ခွေးအတွေ အူရင် နိုင်ငံရေးအခြေအနေမကောင်းတော့မယ့် နိမိတ်ပဲ” လို့ အဘွားက ပြောပါတယ်။

အတိတ်နိမိတ်မကောင်းလို့ မြေးတွေကို အိပ်ရာထဲဝင်ဖို့ ပြောပါတယ်။ အတိတ်နိမိတ် မကောင်းဘူး ဆိုတာ ဘာများလဲပေါ့။ တခုခု ဖြစ်လာတော့မှာကို လူကြီးတွေက ကလေးတွေကို ဖုံးကွယ်ထားချင်တဲ့အတွက် ပြေရာပြေကြောင်းလေး ပြောပြီး နှစ်သိမ့်ပေးတာမျိုးလား။ ဘယ်လိုကြောင့်လဲတော့ မြေးတွေက မသိကြပါဘူး။

ခွေးအတွေဟာ အိမ်ခွေးနဲ့ ဆင်ဆင်တူပေမဲ့ ကိုယ်လုံးသေးပြီး နှုတ်သီးချွန်တဲ့အတွက် မြေခွေးနဲ့ ပိုပြီးတူပါတယ်။

အရောင်က အဝါညစ်။ ကျောဘက်မှာ အရောင်ပိုမွဲပြီး ရင်ဘတ်မှာတော့ ဖျော့ပါတယ်။ နှုတ်သီးဖျားကနေ အမြီးဖျားအထိ နှစ်ပေခွဲကျော်ကျော် ရှည်ပါတယ်။ အမြီးကတော့ ရှစ်လက်မခန့် ရှည်ပြီး အမွေးဖွာပါတယ်။

ခွေးအက လောဘကြီးတယ်။ ကောက်ကျစ်စဉ်းလဲတယ်။ ခိုးကြောင်ခိုးဝှက် ပြုကျင့်တတ်တယ်။ ရွယ်တူ တိရစ္ဆာန်တွေကို မတိုက်ခိုက်တတ်ဘူး။ မြို့ ရွာနဲ့ မနီးမဝေးဖြစ်တဲ့ ဂူတွေ၊ မြေတွင်းတွေမှာ နေလေ့ရှိတယ်။

ခွေးအ အမတွေဟာ တကြိမ်ကို သား ၃ ကောင်ကနေ ၅ ကောင်အထိ မွေးလေ့ရှိတယ်။

နေ့အခါမှာ ခွေးအတွေဟာ တွင်းအောင်းနေကြပြီး ညအခါမှာတော့ တကောင်ချင်း ဖြစ်စေ၊ အုပ်ဖွဲ့ပြီး ဖြစ်စေ အစာရှာ ထွက်လေ့ရှိကြတယ်။

ဒီလို အစာရှာထွက်ချိန်မှာ မသာယာတဲ့အသံနဲ့ အူတတ်ကြတယ်။ လူတွေ စိုက်ပျိုးထားတဲ့ သစ်သီး၊ ဟင်းသီးဟင်းရွက်နဲ့ လူတွေ မွေးထားတဲ့ ကြက်၊ ဘဲ၊ သိုး၊ ဆိတ်တွေကို ခိုးဝှက် စားသောက်တတ်ကြတဲ့အတွက် ခွေးအတွေကို လူတွေက အလွန်မုန်းတီးကြတယ်။

လူနေရပ်ကွက်တွေမှာ တွေ့ရတတ်တဲ့ အပုပ်အစပ်နဲ့ အသေကောင်တွေကို စားသောက် ရှင်းလင်းသွားတတ်တဲ့အတွက်လည်း လူတွေအတွက် တနည်းတဖုံ ကျေးဇူးပြုတယ်လို့လည်း ပြောနိုင်ပါတယ်။

တောထဲမှာ ကျား၊ ခြင်္သေ့ စတဲ့ သားရဲတိရစ္ဆာန်တွေ နောက်ကနေ နောက်ယောင်ခံလိုက်ပြီး သူတို့ရဲ့ စားကြွင်းစားကျန်တွေကိုလည်း လိုက်လံစားသောက်တတ်ကြတယ်လို့ ခွေးအ အကြောင်း လေ့လာသူတွေက ဆိုပါတယ်။

“ခွေးအတွေ အူရင် သူပုန်တွေ လာတော့မှာ”လို့ အဘွားက ပြောပါတယ်။

သူပုန် ဆိုတဲ့ စကားရပ်ကို တော်လှန်ရေးအတွက် တွန်းလှန်တော်လှန်ကြတဲ့ မိသားစုအဝန်းအဝိုင်းမှာ ကြားရလေ့ရှိပါတယ်။ တော်လှန်ရေးအတွက် တွန်းလှန်တော်လှန်ကြတဲ့သူတွေဟာ သူတို့ကိုယ်သူတို့ သူပုန်လို့ သတ်မှတ်ပြောဆိုတာကို လက်ခံကြပါတယ်။

တဖက်က  ခေတ်အဆက်ဆက် စစ်တပ်ကလည်း သူပုန် ဆိုတာ သောင်းကျန်းသူ အစုအဖွဲ့လို့ သုံးနှုန်း ပြောဆို ရေးသားပြီး ဝါဒဖြန့်ကြပါတယ်။

တော်လှန်သူတွေအဖို့တော့ မတရားတာကို တော်လှန်နေကြသူတွေဟာ သူပုန်လုပ်တာပဲလို့ အကောင်းဘက်က မှတ်ယူကြပါတယ်။ အဘွား ပြောပြတဲ့ သူပုန်တွေ လာတော့မယ်ဆိုတာ မကြာခင် တိုက်ပွဲတွေ ဖြစ်လာတော့မှာကို ဆိုလိုတာပါ။ မတရားမှုကို တော်လှန်တဲ့ သူပုန်တွေနောက် တပ်သားသစ်အဖြစ် ပါသွားနိုင်တယ်ဆိုတဲ့ အကြောင်းတော့ သူ မပြောပြခဲ့ပါဘူး။

သူ့မျက်နှာပေါ်က စိုးရိမ်စိတ်ကတော့ မြေးတွေထဲမှာ ယောက်ျားလေးတွေ များတာမို့ တိုင်းရေး ပြည်ရေး အခြေအနေ တခုခုဖြစ်လာလို့ အရေးကြုံရင်၊ မတရားမှုကို ဒီမြေးတွေက တော်လှန်သူ အဖြစ်နဲ့ ကြုံလာခဲ့ကြရင် အန္တရာယ်ကင်းဖို့ဆိုတဲ့ စိုးရိမ်ကြောင့်ကြစိတ်က ပိုလို့ဖြစ်နေမှာပဲ ဖြစ်ပါတယ်။

တာပလု