ဥရောပ သက်တမ်းအရှည်ဆုံး ဖက်ဆစ်အာဏာရှင်စနစ်ကို ဖြုတ်ချခဲ့တဲ့ ပေါ်တူဂီ “ကာနေးရှင်းတော်လှန်ရေး” နှစ် ၅၀ ပြည့် အခမ်းအနားကို ဧပြီ ၂၅ ရက်က နိုင်ငံတဝန်းမှာ ကျင်းပခဲ့ပြီး မြို့တော် လစ္စဘွန်းမှာ လူသောင်းချီ ချီတက်ခဲ့ကြပါတယ်။

အာဏာရှင်ကို မလိုလား၊ ဒီမိုကရေစီကို လိုလားတဲ့ စစ်ဘက်အရာရှိငယ်တွေက အာဏာရှင်ထံက အာဏာပြန်သိမ်းဖို့ ကြိုးစားခဲ့ရာကနေ စတင်ခဲ့တဲ့ လူထုအုံကြွမှုကြီးဟာ ပေါ်တူဂီကို ဒီမိုကရေစီလမ်းကြောင်းပေါ် တင်ပေးနိုင်ခဲ့ပါတယ်။

သောင်းနဲ့ချီတဲ့ လူအုပ်ကြီးဟာ “ထာဝရ .. ဧပရယ် ၂၅၊ ဖက်ဆစ်ဝါဒ ဘယ်တော့မှ တကျော့မပြန်စေ” ဆိုတဲ့ ကြွေးကြော်သံကို ဟစ်ကြွေးပြီး ကာနေးရှင်းပန်းတွေနဲ့ နိုင်ငံအလံတွေ ကိုင်ဆောင်ပြီး ချီတက်ခဲ့ကြပါတယ်။

ပေါ်တူဂီမှာ မကြာသေးမီနှစ်တွေအတွင်း လက်ယာစွန်းဝါဒ တကျော့ပြန် အားကောင်းလာချိန်မှာ ဖက်စစ်အာဏာရှင်စနစ်ကို ပြန်မသွားချင်ကြောင်း ဆန္ဒဖော်ထုတ်ခဲ့ကြတာပါ။

အာဏာရှင် အန်တိုနီယို အိုလီဗီရာ ဆာလာဇာဟာ ပေါ်တူဂီကို ၁၉၃၂ ခုနှစ်ကနေ ၁၉၆၈ အထိ အုပ်ချုပ်ခဲ့ပါတယ်။

ဒါပေမဲ့ အလွန်အမင်း ရှေးရိုးစွဲဆန်တဲ့ အာဏာရှင်အုပ်ဆိုးမှုဟာ သူ့နေရာဆက်ခံသူ မာဆယ်လိုကယ်တာနို လက်ထက်အထိ နောက်ထပ် ၆ နှစ်ကြာ ဆက်ရှိနေခဲ့ပါတယ်။

၁၉၇၄ ခုနှစ် ဧပြီ ၂၅ ရက်မှာမှ တော်လှန်ရေးက စတင်ခဲ့ပါတယ်။ ဒီမိုကရေစီလိုချင်တဲ့၊ ပေါ်တူဂီရဲ့ အာဖရိက ကိုလိုနီနိုင်ငံတွေမှာ ဖြစ်ပွားနေတဲ့ လွတ်လပ်ရေး လှုပ်ရှားမှုတွေအပေါ် ဖိနှိပ်တဲ့ ကာလရှည်စစ်ပွဲတွေ အဆုံးသတ်ချင်တဲ့ အငယ်တန်းစစ်အရာရှိတွေရဲ့ အာဏာသိမ်းမှုက စခဲ့တာဖြစ်ပါတယ်။

နောက်ပိုင်းမှာ မမျှော်မှန်းလောက်အောင် အားကောင်းတဲ့ လူထုတော်လှန်ရေးနဲ့ ပေါင်းစပ်သွားခဲ့ပြီး ဒီမိုကရေစီစနစ်ကို ပြန်လည်ကူးပြောင်းနိုင်ခဲ့တာ ဖြစ်ပါတယ်။

သေနတ်တချက်မဖောက်ခဲ့ရဘဲ အောင်မြင်ခဲ့သလို လူထုနဲ့ အတူရပ်တည်ခဲ့ကြတဲ့ စစ်သားတွေ ကာနေးရှင်းပန်းတွေ ပေးခဲ့ကြတာကို အစွဲပြုပြီး ကာနေးရှင်းတော်လှန်ရေးလို့ ထင်ရှားခဲ့တာ ဖြစ်ပါတယ်။

ဧပြီ ၂၅ ရက်ရောက်ရင် သေနတ်ပြောင်းဝနဲ့ စစ်ယူနီဖောင်းတွေမှာ လူထုက ကာနေးရှင်းပန်းတွေ ထိုးပေးလေ့ရှိကြပါတယ်။

Source/Photo-Reuters