ချင်းပြည်နယ်၊ မင်းတပ်မြို့နယ်ရှိ ဝမ္မသူးဆေးရုံကို မနေ့ညက စစ်ကောင်စီတပ်ဘက်က  လေကြောင်းတိုက်ခိုက်လို့  အနည်းဆုံးအရပ်သား ၂ ဦး သေဆုံးခဲ့တယ်လို့  CDF မင်းတပ်က သတင်းထုတ်ပြန်ပါတယ်။ 

စစ်ကောင်စီတပ်ဟာ မနေ့ညနေ ၄ နာရီခွဲလောက်ကစပြီး  မင်းတပ်မြို့နယ်၊ တိုက်နယ် (၂) ဘက်ကို  ဂျက်တိုက်လေယာဉ်နဲ့ ၂ ကြိမ်တိုက်ခိုက်ပြီး Y12 အမျိုးအစားလေယာဥ်က ၅ ကြိမ် တိုက်ခိုက်ခဲ့တာလို့ ဆိုပါတယ်၊ 

အဲဒီနောက်  ည ၈ နာရီလောက်မှာတော့ တိုက်နယ် (၂) ရှိ ဝမ္မသူးဆေးရုံကို စစ်တပ်ကဂျက်ဖိုက်တာလေယာဥ်နဲ့ ထပ်ပြီးလေကြောင်းတိုက်ခိုက်လို့  အနည်းဆုံးအရပ်သား ၂ ဦး သေဆုံးပြီး   ဒဏ်ရာရသူအများအပြားရှိကြောင်း CDF မင်းတပ်ရဲ့ ထုတ်ပြန်ချက်မှာ ဖော်ပြပါတယ်။

ဝမ္မသူးဆေးရုံအပြင် အရပ်သားပြည်သူတွေရှိတဲ့ တခြားနေရာတွေကိုလည်း လေကြောင်းတိုက်ခိုက်မှုတွေရှိခဲ့ပြီး အသေးစိတ်အခြေအနေတော့  မသိရသေးဘူးလို့ ဆိုပါတယ်။

စစ်ကောင်စီတပ်ဟာ ဆေးရုံတွေ၊ ဆေးပေးခန်းတွေ၊ စာသင်ကျောင်းတွေ၊ ခရစ်ယာန်ဘုရားကျောင်း၊ ဘုန်းကြီးကျောင်း၊ စေတီပုထိုးတွေအပါအဝင် အရပ်ဘက် ပစ်မှတ်တွေကို လေကြောင်းကနေ  မကြာခဏဆိုသလို ပစ်ခတ်တိုက်ခိုက်နေတာ ဖြစ်ပါတယ်။