အမျိုးသားညီညွတ်ရေးအစိုးရ (NUG) ထိန်းချုပ်ထားတဲ့ ခါမ်းပါတ်မြို့နဲ့ အနီးဝန်းကျင်နေရာ ၄ ခုကို စစ်ကောင်စီက လေကြောင်းတိုက်ခိုက်တာကြောင့် ပြည်သူ ၃ ယောက် သေဆုံးပြီး ၃ ယောက် ပြင်းထန်ဒဏ်ရာရခဲ့ပါတယ်။ 

ဒေသကာကွယ်ရေးအဖွဲ့တွေ သိမ်းယူထားတဲ့ စစ်ကိုင်းတိုင်း၊ တမူးမြို့နယ်၊ ခမ်းပါတ်မြို့နဲ့ အနီးဝန်းကျင်နေရာ ၄ ခုကို ဧပြီ ၂၂ ရက် မနက်အစောပိုင်း ၂ နာရီဝန်းကျင်မှာ စစ်ကောင်စီက လေကြောင်းကနေ ဗုံးကြဲတိုက်ခိုက်တာကြောင့် ပြည်သူ ၃ ယောက် အခင်းဖြစ်နေရာမှာ သေဆုံးပြီး ၃ ယောက် ပြင်းထန်ဒဏ်ရာရခဲ့ပါတယ်။ 

စစ်ကောင်စီက ခါမ်းပါတ်မြို့ အမှတ် ၁ ရပ်ကွက်၊ အမှတ် ၄ ရပ်ကွက် နန်းစံပြစာသင်ကျောင်း၊ စော်ဘွားရေရှင်ရွာအစွန်နဲ့ ဇိုလင်းရွာတွေကို ဆက်တိုက်ပစ်ခတ်တိုက်ခိုက်ခဲ့တာပါ။ ခမ်းပတ်မြို့ အမှတ် ၁ ရပ်ကွက်က အမျိုးသားတဦးနဲ့ အမျိုးသမီးတဦး၊ စော်ဘွားရေရှင်ရွာက အမျိုးသမီးတဦးတို့ သေဆုံးခဲ့တယ်လို့ ဒေသကာကွယ်ရေးအဖွဲ့တွေက ပြောပါတယ်။

တမူးတိုက်နယ်  ပြည်သူ့ကာကွယ်ရေးတပ်ဖွဲ့ ဒုတာဝန်ခံ ဦးကပ်က “ခါမ်းပါတ်ကို ၂ နာရီနဲ့ ၁၄ မိနစ်မှာ ကြဲသွားတာ၊ ဒလန်ရဲ့ သတင်းအတိအကျပေးမှုကြောင့်ပေါ့။ သူတို့ချတာက ကျနော်တို့ တော်လှန်ရေးရဲဘော်တွေ ရှိတဲ့နေရာကို ချချင်တာ၊ ဒါပေမဲ့ လွဲသွားတာပေါ့။ ပြည်သူတွေတော့ ထိသွားတာပေါ့။ လက်ရှိ ခါမ်းပါတ် အမှတ် ၁ ထဲမှာ မိန်းကလေး ၂ ယောက်၊ ယောကျ်ားလေး ၂ ယောက်ထဲမှာက မိန်းကလေးတယောက်နဲ့ ယောကျ်ားလေးတယောက်က ပွဲချင်းပြီးပေါ့။ ပြီးရင် ယောကျ်ားလေးတယောက်ကတော့ မျက်စိထိတာပေါ့။ ဗုံးခိုကျင်းထဲကနေ လေယာဉ်ကို ကြည့်တာနဲ့ ကျောက်ခဲတွေ မှန်သွားတာနေမှာ၊ အဲဒီမှာ မျက်စိပြုတ်ထွက်သွားတာပေါ့။ ပြီးရင် အဘွားကြီးတယောက်ကတော့ အခုထိတော့ မသေသေးဘူး၊ ဒါပေမဲ့ အခြေအနေ မကောင်းပါဘူး” လို့ ပြောပါတယ်။

ခါမ်းပါတ်မြို့ကို ဒေသကာကွယ်ရေးအဖွဲ့တွေက ၂၀၂၃ နိုဝင်ဘာ ၇ ရက်မှာ သိမ်းယူခဲ့ပြီးနောက်ပိုင်း စစ်ကောင်စီက လေကြောင်းတိုက်ခိုက်တာ၊ ပြောက်ကျားထိုးစစ်ဆင်တာတွေ ပြုလုပ်ပြီး မြို့ကို ပြန်သိမ်းဖို့ အကြိမ်ကြိမ်ကြိုးစားခဲ့တာပါ။ လတ်တလော မြေပြင်တိုက်ပွဲတွေ မရှိပေမဲ့ စစ်ကောင်စီက ပြောက်ကျားစနစ်၊ လေကြောင်းတိုက်ခိုက်တာတွေနဲ့ မြို့ကိုပြန်သိမ်းဖို့ ကြိုးစားနေတာပါ။

တမူးတိုက်နယ် ပြည်သူ့ကာကွယ်ရေးတပ်ဖွဲ့ ဒုတာဝန်ခံ ဦးကပ်က “ညတုန်းက ခါမ်းပါတ်မှာ အမှတ်တနေရာ၊ ခမ်းပတ် အမှတ် ၄ နန်းစံပြစာသင်ကျောင်းမှာတနေရာ၊ ပြီးရင် စော်ဘွားရေရှင်ရွာအစွန် အဲဒီမှာလည်း ချတယ်၊ စော်ဘွားရေရှင်ရွာအထွက်ဘက် ဇိုလင်းရွာထဲမှာလည်း ချသွားတာသူတို့၊ ၄ နေရာလောက်ပေါ့နော်။ နန်းစံပြစာသင်ကျောင်းမှာကျတော့ ကလေးလေးတယောက် ဒဏ်ရာရတယ်၊ ဒါပေမဲ့ ဒဏ်ရာကြီးကြီးမားမားတော့ မဟုတ်ဘူး။ အမှတ် ၁ ထဲမှာတော့ ပြည်သူအိမ် ၇ လုံးလောက် ပျက်စီးသွားတာပေါ့” လို့ ပြောပါတယ်။

စော်ဘွားရေရှင်ရွာသားတဦးက “သေဆုံးတာတော့ တယောက်ရှိတယ်၊ အသက် ၄၀ အရွယ် အမျိုးသမီး၊ ဒဏ်ရာရတာကတော့ ၈ ဦး အကျော်မှာရှိတယ်၊ စိုးရိမ်ရတဲ့လူနာကတော့ ၁ ယောက်ရှိတယ်၊ ဘာရှိလို့ ကြဲတယ်လို့တော့ ကျနော်လည်း မပြောတတ်ဘူးဗျ။ သူတို့ အဲဒီလို အလုပ်ခံရတာတော့ စိတ်ထဲမှာမကောင်းဘူးပေါ့။ အပြစ်မဲ့ပြည်သူတွေ” လို့ ပြောပါတယ်။

စစ်ကိုင်းတိုင်းအထက်ပိုင်း ကလေး-ခါမ်းပါတ်-တမူးလမ်းမှာ စစ်ကောင်စီကလမ်းကြောင်းတွေ အကုန်ပိတ်ဆို့ထားတာကြောင့် ကုန်စည်စီးဆင်းမှု အားလုံးရပ်တန့်နေပြီး ကုန်ဈေးနှုန်း အဆမတန် တက်လာတယ်လို့ ဒေသခံ PDF တွေက ပြောပါတယ်။ 

၂၀၂၃ နိုဝင်ဘာ ၇ ရက်နေ့က ခါမ်းပါတ်မြို့ကို PDF ပူးပေါင်းအဖွဲ့တွေက သိမ်းယူခဲ့ပြီးကတည်းက ကလေး-ခါမ်းပါတ်-တမူးလမ်းမှာ ထိတွေ့တိုက်ပွဲတွေဆက် တိုက်ဖြစ်ပွားခဲ့ပြီး သောင်းနဲ့ချီတဲ့ ဒေသခံပြည်သူတွေ စစ်ဘေးသင့်ပိတ်မိနေတယ်လို့ အရပ်ဘက်အဖွဲ့တွေက ပြောပါတယ်။

 သတင်း - ZA၊ KMT