နေပြည်တော်သင်္ကြန်အတွက် လုံခြုံရေးယူထားရတဲ့ အမှတ် ၁၇ လုံခြုံရေးရဲတပ်ရင်းမှ ရဲတပ်ဖွဲ့ဝင်အချင်းချင်း ဧပြီ ၁၅ ရက်ညက စကားများပြီး ပစ်ခတ်မှုဖြစ်ရာမှ ရဲ ၃ ဦး သေဆုံးခဲ့တယ်လို့ ပြည်ထဲရေးနဲ့နီးစပ်သူတွေဆီက သိရပါတယ်။

အမှတ် ၁၇ လုံခြုံရေးရဲတပ်ရင်းမှာ ဇမ္ဗူသီရိမြို့နယ် လွှတ်တော် အမှတ် ၄ ဂိတ်မှာ မနေ့ညတာဝန်ကျပြီး ရဲတပ်ကြပ်ကြီးက အရက်မူးလာတဲ့ ရဲတပ်သားတဦးအား ပြောဆိုဆုံးမရာမှ ခိုက်ရန်ဖြစ်ပွားပြီး ပစ်ခတ်မှုဖြစ်ခဲ့တာလို့ လုံခြုံရေးရဲတပ်ဖွဲ့နဲ့နီးစပ်သူတဦးက ဒီဗွီဘီကို ပြောပါတယ်။

"ရဲတပ်သားက အရက်သောက်လာတော့ ကင်းမှူးကဆူတယ်၊ အဲဒီမှာ တယောက်တခွန်း စကားများပြီး ရဲတပ်သားက သေနတ်နဲ့ယူပစ်တာ ရဲတပ်ကြပ်ကြီးသေတယ်၊ ရဲတပ်သားတယောက်သေတယ်၊ ပစ်တဲ့ရဲလည်း​ သေသွားတယ်။" 

အဆိုပါပစ်ခတ်မှုဖြစ်စဥ်မှာ ရဲတပ်ကြပ်ကြီးမျိုးနိုင်ဦး၊ ရဲတပ်သားအေးဝင်းနဲ့ ရဲတပ်သား ပိုင်စိုးဦးတို့ သေဆုံးပြီး အမှတ် ၁၇ လုံခြုံရေး ရဲတပ်ဖွဲ့ခေါင်းဆောင်ကို ပြည်ထဲရေးက စစ်ဆေးနေတယ်လို့ ပြည်ထဲရေးနဲ့နီးစပ်သူတွေဆီက သိရပါတယ်။

စစ်ကောင်စီတပ်က သေဆုံးသူရဲတပ်ဖွဲ့ဝင် ၃ ဦးကို ဇေယျာသီရီမြို့နယ်ရှိ အမှတ် ၂ ခုတင်တထောင်စစ်ဆေးရုံကို ပို့ဆောင်ထားတယ်လို့ သိရပါတယ်။