မန္တလေးတိုင်း၊ မြင်းခြံမြို့နယ်မှာ ယာယီစခန်းချတပ်စွဲထားတဲ့ စစ်ကောင်စီတပ်ဖွဲ့ဝင်တွေကို ပြည်သူ့ကာကွယ်ရေးတပ်ဖွဲ့တွေက ဝင်ရောက်တိုက်ခိုက်ခဲ့လို့ စစ်ကောင်စီတပ်ဖွဲ့ဝင် ၃ ယောက် သေဆုံးပြီး ဓားစာခံပြည်သူ ၂ ယောက်ကို ကယ်ထုတ်နိုင်ခဲ့တယ်လို့  Myingyan Black Tiger -MBT အဖွဲ့က ဧပြီ ၁၄ ရက် ဒီနေ့မှာ ထုတ်ပြန်ပါတယ်။

မြင်းခြံမြို့နယ်၊ တောပုရွာနဲ့ ရွာရှည်ရွာအကြား ဘုန်းကြီးကျောင်းမှာ အထိုင်ချထားတဲ့ စစ်ကောင်စီ တပ်ဖွဲ့ဝင်အင်အား ၃၀ ကျော်ကို  ဧပြီ ၁၀ ရက်နေ့က ဝင်ရောက်တိုက်ခိုက်ခဲ့တာဖြစ်ပါတယ်။

အဲဒီစစ်ကောင်စီတပ်တွေ ဧပြီ ၆ ရက်နေ့ မြင်းခြံမြို့နယ်ကို စစ်ကြောင်းထိုးဝင်ရောက်တည်းက ဖမ်းဆီးထားတဲ့ တောပုကျေးရွာက ဓားစာခံပြည်သူ ၂ ယောက်ကိုလည်း ကယ်တင်ခဲ့ပြီး မိသားစုဆီ ပြန်လည်အပ်နှံခဲ့တယ်လို့ သိရပါတယ်။

Myingyan Black Tiger-MBT က ဗိုလ်မိုက်ခဲက “စကစနဲ့ ပျူစောထီး အင်အား ၃၀ ပါစစ်ကြောင်းကို ဝင်ရောက်တိုက်ခိုက်ခဲ့တာပေါ့။ သူတို့ဘက်က ထွက်ပြေးတော့ ဓားစာခံပြည်သူ ၂ ယောက်ကို ကယ်တင်ခဲ့ပါတယ်။ စကစရဲ့ ၆၀ မမ အဝေးပစ်ပို့ယမ်း ၅ ထုပ် သိမ်းဆည်းရမိခဲ့တယ်။ သူတို့ဘက်က သေဆုံးမှုကို ပစ်ပြီးတဲ့နေ့ကတည်းက စုံစမ်းနေတာပေါ့။ ၁၃ ရက်နေ့ ညနေကမှ တယောက်က ပေါင်ကိုထိပြီး ကျန်တဲ့ ၃ ယောက်က ကျသွားတယ်ဆိုတာသိရတာ။ ဓားစာခံ ၂ ယောက်ကိုတော့ ကယ်ပြီးပြီးချင်း မိသားစုတွေဆီ ဆက်သွယ်ပြီး ပြန်ပို့ခဲ့ပါတယ်” လို့ ပြောပါတယ်။

တိုက်ခိုက်မှုအတွင်း စစ်ကောင်စီတပ်ဖွဲ့ဝင် ၄ ယောက် ဒဏ်ရာရရှိခဲ့ပြီး အဲဒီထဲက ၃ ယောက်က ဧပြီ ၁၃ ရက်နေ့မှာ သေဆုံးခဲ့တယ်လို့ သိရပါတယ်။

မြင်းခြံမြို့နယ်ထဲကို ဧပြီ ၆ ရက်နေ့ကတည်းက စစ်ကြောင်းထိုးဝင်ရောက်နေတဲ့ စစ်ကောင်စီတပ်တွေဟာ အရပ်သား ၄ ယောက်ကို သတ်ဖြတ်ခဲ့ပြီး တောပုရွာနဲ့ ရသာရွာက လူနေအိမ် ၆၀၀ ကျော်ကို မီးရှို့ဖျက်ဆီးခဲ့တယ်လို့လည်း သိရပါတယ်။