ကရင်ပြည်နယ်၊ ကော့ကရိတ်မြို့၊ အာရှလမ်းမပေါ်မှာ ဧပြီ ၁၃ ရက်က စစ်ကောင်စီ တပ်ဖွဲ့ဝင်တွေကို KNLA ပူးပေါင်းစစ်ကြောင်းတွေက စောင့်ကြိုတိုက်ခိုက်ခဲ့တာကြောင့် အထိနာပြီး သံချပ်ကားနဲ့ Faw ကားတွေကို စွန့်ခွာထွက်ပြေးသွားခဲ့တယ်လို့ KNU တပ်မဟာ ၆ စစ်ဗျူဟာမှူး ဗိုလ်မှူးကြီး စောနယ်ဒါးထူးက ပြောပါတယ်။

တတန်ကူး​ကျေးရွာနားက တိုက်ပွဲအတွင်း စစ်ကောင်စီတပ်ဖွဲ့ဝင်တွေဟာ အထိနာပြီး ဆုတ်ခွာ ထွက်ပြေးသွားခဲ့တာကြောင့် လမ်းပေါ်မှာ သံချပ်ကာ ကား တစီး၊ ​Faw ကား ၈ စီး ကျန်ခဲ့တဲ့အပြင် မနီးမဝေး လမ်း​ဘေးသစ်ပင်​အောက်မှာ သံချပ်ကာကား ၂ စီး ကျန်ခဲ့တယ်လို့ ဆိုပါတယ်။

ဧပြီ ၁၂ ရက်ကစတင်ပြီး ကော့ကရိတ်မြို့တွင်းကို စစ်ကောင်စီတပ်ဖွဲ့ဝင်​တွေက လက်နက်ကြီးနဲ့ သံချပ်ကာကားနဲ့ ပစ်ကူ​အဆက်မပြတ် အသုံးပြုပြီး စကစ ၁၂ ထဲက​နေ ​တောက်​လျှောက် ထိုးစစ်ဆင်လာတာကြောင့် ကော့ကရိတ်မြို့ထဲမှာ ​နေရာယူတပ်စွဲထားတဲ့ KNLA  ပူး​ပေါင်းတပ်ဖွဲ့​တွေက ရန်သူပစ်အားနဲ့ အ​ခြေအ​နေကို သုံးသပ်ပြီး ပြန်လည်ဆုတ်ခွာ​ပေးခဲ့တာပါ။

ဗိုလ်မှူးကြီး စောနယ်ဒါးထူးက “အဲဒီလို ဆုတ်ခွာ​ပေးလိုက်တာက လက်ရှိ ကျ​နော်တို့​ နေရာယူ တပ်စွဲထားတဲ့ ​နေရာ​တွေက မြို့စွန် ရပ်ကွက်​တွေထဲဖြစ်ပြီး အခိုင်အမာခံစစ်ဆင်ပြီး ရန်သူကို တိုက်ခိုက်ဖို့ အဆင်မ​ပြေတဲ့​ နေရာ​တွေ ဖြစ်လို့။ ကျ​နော်တို့ အဲဒီလို ဆုတ်ခွာ​ပေးလိုက်တဲ့အတွက် ရန်သူက သံချပ်ကားပစ်ကူ ကားတန်းကြီးနဲ့ အလျင်အမြန်ထိုး​ဖောက်ဖို့ ကြိုးစားခဲ့တယ်” လို့ ပြောပါတယ်။

စစ်ကောင်စီတပ်တွေဟာ ​ကော့ကရိတ်မြို့အလွန် အာရှလမ်းမကြီးရဲ့ ​တောင်တက်လမ်းကို စတင်ဝင်​ရောက်မယ့် တတန်ကူး​နေရာအ​ရောက်မှာ​တော့ စနစ်တကျ ခံစစ်ပြင်ဆင်​ စောင့်ကြို​နေတဲ့ KNLA ပူး​ပေါင်းတပ်ဖွဲ့​တွေရဲ့ ​စောင့်ကြို​ချေမှုန်းတာကို မရှုမလှခံပြီး ဆုတ်ခွာထွက်​ပြေးသွားခဲ့တာကြောင့် ရှေ့ဆက်ပွဲစဥ်​​တွေမှာ ဘာဆက်ဖြစ်လာမလဲဆိုတာ ​စောင့်ကြည့်​ပေးဖို့ ပြောချင်တယ်လို့ စစ်ဗျူဟာမှူးက ပြောပါတယ်။

ဧပြီ ၉ ရက်နေ့က စတင်ပြီး ဘားအံမြို့ကတဆင့် မြဝတီမြို့ကို စစ်ကောင်စီတပ်ဘက်က လူ လက်နက်ခဲယမ်း ဖြည့်တင်းဖို့ လာရောက်နေတာဖြစ်ပြီး စစ်ကောင်စီတပ်ဖွဲ့ဝင်တွေနဲ့ သံချပ်ကာယာဉ်တန်းဟာ လမ်းကြောင်းတလျှောက် KNLA ပူး​ပေါင်းတပ်ဖွဲ့​တွေရဲ့ ပြောက်ကျားစနစ်နဲ့ ကြားဖြတ်တိုက်ခိုက်ခံခဲ့ရပါတယ်။

ဧပြီ ၁၀ ရက်နေ့ ည ၁၀ နာရီက မြဝတီမြို့၊ ခလရ ၂၇၅ တပ်ရင်းကို KNLA၊ PDF ပူးပေါင်းစစ်ကြောင်းတွေက အပြီးသတ်သိမ်းပိုက်ရရှိခဲ့ပြီး စစ်ကောင်စီဘက်က ၅၀ ကျော် သေဆုံး၊ အရှင်ဖမ်းဆီးရမိသူမရှိဘဲ တပ်မမှူးနဲ့ အင်အား ၂၀၀ ​လောက်က တပ်ရင်းကိုစွန့်ခွာပြီး ထိုင်း-မြန်မာနယ်စပ် အမှတ် ၂ တံတားဘက်ကို ပြန်ဆုတ်ခွာထွက်ပြေးခဲ့ပါတယ်။

လက်ရှိအချိန်အထိ သင်္ကန်းညီနောင်ဗျူဟာ အပါအဝင် ခမရ ၃၅၅၊ ခမရ ၃၅၆၊ ခလရ ၂၇၅ တပ်ရင်းတွေကို KNLA၊ PDF ပူးပေါင်းစစ်ကြောင်းတွေက သိမ်းပိုက်ထိန်းချုပ်ထားပါတယ်။

Photo - ပုံဟောင်း