မွန်ပြည်နယ်၊ ကျိုက်မရောမြို့နယ်၊ ဓမ္မသရွာ အနီးတဝိုက်ကို ဧပြီ ၈ ရက်နဲ့ ၉ ရက်တို့မှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် တော်လှန်ရေးတပ်ဖွဲ့ဝင် ၂ ဦး ကျဆုံးပြီး ၆ ဦး ဒဏ်ရာရရှိခဲ့တယ်လို့ ဒေသခံတွေနဲ့ တော်လှန်ရေးတပ်ဖွဲ့တွေက ပြောပါတယ်။
ဓမ္မသရွာဘုန်းကြီးကျောင်းကို စစ်ကောင်စီတပ်က ဧပြီ ၈ ရက် ည ၉ နာရီလောက်က ဂျက်တိုက်လေယာဉ်နဲ့ ပေါင် ၅၀၀ ဗုံး ၃ လုံးကြဲတိုက်ခိုက်ခဲ့တာကြောင့် မွန်ပြည်သစ်ပါတီ စစ်အာဏာရှင်တိုက်ဖျက်ရေး (NMSP-AD) အဖွဲ့မှ ရဲဘော် ၂ ဦး သေဆုံးပြီး ၃ ဦး ဒဏ်ရာရရှိခဲ့ပါတယ်။
ဓမ္မသရွာခံတဦးက “ဘုန်းကြီးကျောင်းကို ဗုံးကြဲသွားတာ ရဲဘော် ၂ ဦး ကျသွားတယ်။ ဘုန်ကြီးကျောင်းလည်း မီးလောင်ပြီး လုံးဝပျက်စီးသွားတယ်။ အနားမှာရှိတဲ့ ဘုရားတွေကော စေတီတွေပါ ထိပြီး ပျက်စီးသွားတယ်။ အခုလည်း လက်နက်ကြီးတွေနဲ့ ဆက်တိုက်ပစ်နေတယ်” လို့ ပြောပါတယ်။
ဧပြီ ၉ ရက် မနက် ၁၀ နာရီမှာ ဓမ္မသရွာကို စစ်ကောင်စီတပ်အင်အား ၃၀ ခန့်နဲ့ စစ်ကြောင်းထိုးခဲ့တာကြောင့် တော်လှန်ရေးတပ်ဖွဲ့တွေနဲ့ တိုက်ပွဲဖြစ်ပွားပြီး Mi35 နဲ့ ၄ ကြိမ်တိတိ လာရောက်ပစ်ခတ်ခဲ့တာကြောင့် ဂဠုန်စစ်ကြောင်းမှ ရဲဘော် ၃ ဦး ဒဏ်ရာရရှိခဲ့ပြီး စစ်ကောင်စီလည်း ထိခိုက်မှုရှိပေမဲ့ အတိအကျ မသိဘူးလို့ ဂဠုန်စစ်ကြောင်းက ထုတ်ပြန်ပါတယ်။
လေကြောင်းနဲ့ တိုက်ခိုက်မှုကြောင့် မွန်ပြည်သစ်ပါတီ AD နဲ့ ဂဠုန်စစ်ကြောင်းတို့မှ ရဲဘော်တွေ ထိခိုက်သေဆုံးတာနဲ့ပတ်သက်ပြီး NMSP-AD ပြောရေးဆိုခွင့်ရှိသူ နိုင်ဗညားမွန်နဲ့ ဂဠန်စစ်ကြောင်း ပြန်ကြားရေးတို့က အတည်ပြုပေးခဲ့ပါတယ်။
ကျိုက်မရောမြို့နယ်၊ တရာနာကျေးရွာနဲ့ ကျွန်းကုန်းကျေးရွာတို့ကို ဧပြီ ၉ ရက် ညနေ ၃ နာရီခွဲက လေကြောင်းနဲ့ လက်နက်ကြီးတွေနဲ့ ပစ်ခတ်တိုက်ခိုက်ခဲ့တာကြောင့် အသက် ၇ နှစ်အရွယ် မောင်တိုးတက်ဦးနဲ့ အသက် ၁၆ နှစ်အရွယ် မဖူးဖူးဇော်ဝမ်းတို့ ဒဏ်ရာရရှိခဲ့တယ်လို့ မွန်ဖက်ဒရယ်ကောင်စီ လူသားချင်းစာနာနဲ့ ကယ်ဆယ်ရေးဌာနမှူး မိဆုတဂျိုက ပြောပါတယ်။
“စစ်ကောင်စီ လေကြေင်း၊ လက်နက်ကြီးတွေနဲ့ တိုက်ခိုက်လို့ ကလေး ၂ ယောက် ဒဏ်ရာရတယ်။ တဦးကတော့ စိုးရိမ်ရပါတယ်။ မွန်ဖက်ဒရယ်ကောင်စီက ကလေးမိသားစုနဲ့ ဆက်သွယ်ပြီး ထောက်ပံ့ဖို့ ဆောင်ရွက်နေပါတယ်။”
ကျိုက်မရောမြို့ရှိ ကျေးရွာတွေကို ဒီနေ့အထိ မော်လမြိုင် အတ္တရံမြစ်ဝ (ငန်းတေးချောင်း) နေ မောရဝတီ ရေတပ်ဌာနချုပ် သင်္ဘာ ၂ စီးက ဆက်တိုက်ပစ်ခတ်နေသလို အရှေ့တိုင်းစစ်ဌာနချုပ်ကလည်း လက်နက်ကြီးများနဲ့ ပစ်ခတ်နေပါတယ်။
စစ်ကောင်စီလက်နက်ကြီးကြောင့် ကျိုက်မရောမြို့နယ်အတွင်းက ပြည်သူ ၅၀,၀၀၀ ကျော် စစ်ဘေးတိမ်းရှောင်နေရပြီး စစ်ကောင်စီက လက်နက်ကြီး ဆက်တိုက်ပစ်ခတ်နေတာကြောင့် စစ်ဘေးရှောင်ဦးရေ ၁ သိန်းထိ တိုးလာနိုင်တယ်လို့ မွန်ဖက်ဒရယ်ကောင်စီကနေ သိရပါတယ်။
ပုံ-ဂဠုန်စစ်ကြောင်း
