ကချင်ပြည်နယ်၊ ဖားကန့်မြို့နယ်၊ နန့်ယားကျေးရွာမှာ ဧပြီ ၉ ရက် မနက်ပိုင်းက စတင်ပြီး စစ်ကောင်စီတပ်နဲ့ ကချင်လွတ်လပ်ရေးတပ်တပ်မတော် (KIA) တော်လှန်ရေး ပူးပေါင်းတပ်ဖွဲ့တို့ တိုက်ပွဲဖြစ်ပွားပြီး စစ်ကောင်စီတပ်က လေယာဉ်နဲ့ ရှစ်ကြိမ်ထက်မနည်း ဗုံးကြဲတိုက်ခိုက်ကြောင်း သိရပါတယ်။
မြစ်ကြီးနား-ဖားကန့် လမ်းပေါ်က နန့်ယား စစ်ကောင်စီတပ်စခန်းကို KIA က တိုက်ခိုက်ခဲ့တာဖြစ်ပြီး စစ်ကောင်စီဘက်ကလည်း လေယာဉ်နဲ့ ဗုံးကြဲတိုက်ခိုက်ခဲ့တဲ့အတွက် ကျေးရွာတရွာလုံးနီးပါး မီးလောင်ပျက်စီးသွားကြောင်း ဒေသခံတွေဆီက သိရပါတယ်။
ဒေသခံအမျိုးသားတဦးက “မနက် ၅ နာရီလောက်က KIA က နန့်ယားစခန်းကို ဝင်တိုက်တာ။ လက်နက်ကြီးတွေနဲ့လည်း တောက်လျှောက်ပစ်တယ်။ လေယာဉ်နဲ့လည်း ဗုံးကြဲတာ ရှစ်ကြိမ်လောက်ရှိပြီ။ တရွာလုံးနီးပါးကတော့ မီးလောင်ပျက်စီးနေပြီ။ ည ၇ နာရီလောက်ထိကို တိုက်ပွဲပြင်းထန်နေတုန်းပဲ” လို့ ပြောပါတယ်။
စစ်ကောင်စီတပ်နဲ့ KIAတို့ တိုက်ပွဲဖြစ်နိုင်ခြေရှိတာကြောင့် နန့်ယားကျေးရွာ၊ ကပ်မှော်ဇွပ်ကျေးရွာ၊ ဆိုင်းဖရာကျေးရွာက ဒေသခံပြည်သူတွေဟာ မတ်လကုန်ခန့်ကစပြီး ဘေးလွတ်ရာ တိမ်းရှောင်နေကြရပါတယ်။
တိမ်းရှောင်နေတဲ့ ဒေသခံအမျိုးသားတဦးက “တချို့တွေကလည်း တိုက်ပွဲဖြစ်လာနိုင်ခြေ ရှိကတည်းက ရှောင်သွားကြတယ်။ တချို့ကတော့ ရွာမှာ အိမ်စောင့်လောက်ပဲထားပြီး ရှောင်နေကြတာ။ ပြီးခဲ့တဲ့ရက်ပိုင်းကတော့ ကျေးရွာကနေ ရှောင်နေဖို့ KIA က ပြောတာတွေရှိတယ်” လို့ ပြောပါတယ်။
ပြီးခဲ့တဲ့ ဇန်နဝါရီ ၆ ရက်ကလည်း မြစ်ကြီးနား-ဖားကန့်လမ်းမှာရှိတဲ့ နန့်တိန်ကေးရွာက စစ်ကောင်စီတပ်စခန်းကို KIA က သိမ်းပိုက်ပြီးနောက် မတ် ၇ ရက်က စတင်ပြီး မြစ်ကြီးနား-ဗန်းမော် ကားလမ်းတလျှောက် ထိုးစစ်ဆင် တိုက်ခိုက်နေတဲ့အတွက် စစ်ကောင်စီ စခန်း ၆၀ ကျော်ကို KIA က သိမ်းပိုက်ထားပါတယ်။
