အရှေ့တောင်တိုင်း စစ်ဌာနချုပ် မော်လမြိုင်မှာ ဒုတိယ စစ်ခေါင်းဆောင် ဒုဗိုလ်ချုပ်မှူးကြီး အပါအဝင် အစည်းအဝေးလုပ်နေတဲ့နေရာကို အသေခံ ဒရုန်းနဲ့တိုက်ခိုက်မှုမှာ ဒုတိယ ဗိုလ်ချုပ်မှူးကြီး စိုးဝင်းနဲ့ ဒုဗိုလ်ချုပ်ကြီး ညွန့်ဝင်းဆွေတို့ ဒဏ်ရာရနိုင်ကြောင်း ရှာထူး​ဝေါ်နည်းပညာတပ်ဖွဲ့ Alpha Bats တပ်ခွဲက အခု ဧပြီ ၉ ရက် ညမှာ ထုတ်ပြန်ပါတယ်။

နှစ်ကြိမ်တိုက်ခိုက်ခဲ့တာဖြစ်ပြီး စစ်ဦးစီး ပထမတန်းနဲ့အထက် စစ်ဗိုလ်ချုပ် ၄ ယောက် အပါအဝင်  အရာရှိ အရာခံ အကြပ် တပ်သား ၃၀ ​ကျော် ထိခိုက်ဒဏ်ရာရတယ်လို့ အတွင်းသတင်းတွေအရ သိရတယ်လို့ ဆိုပါတယ်။

ဒီနေ့ ဧပြီ ၉ ရက် နေ့လယ်ပိုင်းက ဒုတိယအကြိမ်​ အသေခံ ဒရုန်းတွေနဲ့ တိုက်ခိုက်ရာမှာ ဒဏ်ရာရစာရင်းမှာ ဒုဗိုလ်ချုပ်မှူးကြီးစိုးဝင်းနဲ့ ဒုဗိုလ်ချုပ်ကြီးညွန့်ဝင်း​ဆွေတို့ ပါဝင်​နေနိုင်​ကြောင်းသိရပြီး ဗိုလ်ချုပ် ၁ ယောက်၊ ဗိုလ်မှူးချုပ် ၁ ယောက်အပါအဝင် အကြီးပိုင်း ၆ ယောက် အပြင်းအထန်ဒဏ်ရာရပြီး အဲဒီအထဲက ၃ ယောက်ဟာ ဒီနေ့ညမှာ သေဆုံးသွားခဲ့ပြီလို့လည်း သတင်းရင်းမြစ်တွေဆီက သိရကြောင်း ဆိုပါတယ်။

သတင်းရင်းမြစ်တယောက်က "စိုးဝင်းကားနဲ့ အနောက်က လူနာတင်ယာဉ်တစီး ပညာရေးတပ်နားက ခုတင် ၃၀၀ ရောက်နေတယ်။ ​ကွန်မန်ဒိုတွေလည်း ဆေးရုံမှာ အစောင့်ချထားတယ်။ အကောင်ကြီးကြီး​တွေအများကြီး ထိထားဟန်တူတယ်" လို့ ပြောကြောင်း ထုတ်ပြန်ပါတယ်။

ဒါ့အပြင် နောက်ဆုံးရ သတင်းတွေအရ နေပြည်​တော်နဲ့  ဒုချုပ်စိုးဝင်း၊ ကစထမှူး ညွန့်ဝင်း​ဆွေတို့နဲ့ အဆက်အသွယ်ပြတ်​တောက်​နေတယ်လို့ သိရကြောင်းလည်း ဆိုပါတယ်။

ဒုဗိုလ်ချုပ်မှူးကြီး စိုးဝင်းတို့ အစည်းအဝေးလုပ်နေတဲ့နေရာကို မနေ့ကလည်း အသေခံဒရုန်းတွေနဲ့ တိုက်ခိုက်ခဲ့ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။

ဒုဗိုလ်ချုပ်မှူးကြီး စိုးဝင်းဟာ အရှေ့တောင်တိုင်းစစ်ဌာနချုပ်ကနေ မြဝတီ၊ သင်္ဃန်းညီနောင်၊ ကော့ကရိတ် စစ်ဆင်ရေးတွေကို အနီးကပ်ကွပ်ကဲနေတာကြောင့် ရသမျှနည်းလမ်းတွေ အသုံးပြုပြီး တိုက်ခိုက်နေတာလို့ ရှာထူးဝေါ်တပ်ဖွဲ့ပြန်ကြားရေးက ဆိုပါတယ်။