ကရင်ပြည်နယ်၊ မြဝတီမြို့နယ်၊ သင်္ကန်းညီနောင်ဗျူဟာ၊ ခမရ ၃၅၆ ၊ ခမရ ၃၅၇ တပ်ရင်းတွေကို KNLA ၊ PDF ပူးပေါင်းစစ်ကြောင်းတွေက တိုက်ခိုက်သိမ်းပိုက်ခဲ့ရာ တိုက်ပွဲအတွင်း ဗျူဟာမှူးအပါအဝင် မိသားစုဝင် ၄၀၀ ကျော် လက်နက်ချခဲ့တယ်လို့ ကေအန်ယူ တပ်မဟာ ၆ စစ်ဗျူဟာမှူး ဗိုလ်မှူးကြီး စောနယ်ဒါးထူးက ပြောပါတယ်။

ဧပြီ ၅ ရက်နေ့ မနက် ၈ နာရီလောက်ကစတင်ပြီး ကရင်အမျိုးသားလွတ်မြောက်ရေးတပ်မတော် (KNLA) ပူးပေါင်းစစ်ကြောင်းတွေက ထိုးစစ်ဆင်တိုက်ခိုက်ခဲ့ရာ နှစ်ဖက်တိုက်ပွဲပြင်းထန်ခဲ့ပြီး စစ်ကောင်စီက မြေပြင်လက်နက်ကြီးအပြင် လေကြောင်းကနေ အပြင်းအထန်ခုခံခဲ့ပေမဲ့ မွန်းလွဲ ၁ နာရီလောက်မှာ ဗျူဟာနဲ့ တပ်ရင်းတပ်စခန်းတွေကို အပြီးသပ် သိမ်းပိုက်ရရှိခဲ့ပါတယ်။

ကေအန်ယူ တပ်မဟာ ၆ စစ်ဗျူဟာမှူး ဗိုလ်မှူးကြီး စောနယ်ဒါးထူးက “အခုက အရင်ရထားတဲ့ ၃၅၅ ရယ်၊ ကျန်​နေတဲ့ ၃၅၆၊ ၃၅၇ နဲ့ ဗျူဟာကို ရှင်းလိုက်တာပါ။ လက်နက်ချတာ​ရော မိသားစုပါအပါအဝင် ၄၀၀ ​ကျော်​လောက်ရှိတယ်။ မိသားစုက ၁၀၀ ​​ကျော်လောက်ပါတယ်။ အ​သေးစိတ်စာရင်း မလုပ်နိုင်​သေးဘူး။ လက်နက်ခဲယမ်းမီး​ကျောက်​တွေက​တော့ အများအပြား သိမ်းဆည်းရမိတယ်။ ခလရ ၂၇၅ ကို ကျ​နော်တို့ မတိုက်​သေးဘူး” လို့ ပြောပါတယ်။

နှစ်ဖက်တိုက်ပွဲအတွင်း စစ်ကောင်စီက လေကြောင်းကနေ အကြိမ်​ရေ ရာ​နဲ့ချီ လာရောက်ဗုံးကြဲတိုက်ခိုက်တိုက်ခိုက်တယ်လို့ တပ်မဟာ ၆ စစ်ဗျူဟာမှူးက ပြောပါတယ်။

“ Y12 ဆိုရင်ဗျာ တ​ခေါက်ပစ်ရင် ၁၀ လုံး​လောက်ပစ်တာ။ တကြိမ်လာရင် အလုံးရာချီပစ်တာ၊ Y12 ၃ ကြိမ်ဆို ဗုံးအလုံး ၃၀၀ ​လောက်ရှိတယ်။ Mi 35 ဆိုလည်း ပတ်ပြီး ကျည်မကုန်မချင်း ​ဆော်တာ၊ Jetfighter က​တော့ ​ပေါင် ၅၀၀ ဗုံး ၂ လုံးကြဲပြီးရင် ပြန်တယ်။”

တိုက်ပွဲအတွင်း စစ်ကောင်စီတပ်ဘက်က ၅၀ ​နီးပါးသေဆုံးပြီး ​ ၄၀ ​နီးပါးဒါဏ်ရာရရှိကာ KNLA ပူးပေါင်းစစ်ကြောင်းဘက်က ၅ ယောက် ကျဆုံးပြီး ဒဏ်ရာရသူတွေလည်း ရှိတယ်လို့ ဆိုပါတယ်။

အလားတူ ကော့ကရိတ်မြို့တွင်းက ခလရ ၉၇ တောင်ပေါ်ကျောင်းမှာတပ်စွဲနေတဲ့ စစ်ကောင်စီတပ်ဖွဲ့ဝင်တွေကို ထိုးစစ်ဆင်တိုက်ခိုက်နေတာကြောင့် တိုက်ပွဲတွေ ပြင်းထန်နေတယ်လို့ ရှေ့တန်းသတင်းရင်းမြစ်က ပြောပါတယ်။