တနင်္သာရီတိုင်း၊ မြိတ်ခရိုင်၊ တနင်္သာရီမြို့နယ်၊ ညောင်ပင်ကွင်းကျေးရွာမှာ ဧပြီ ၂ ရက် မနက်က စစ်ကောင်စီတပ်ရင်းနဲ့ ရွာတံတားထိပ်က စစ်ဆေးရေးဂိတ်တို့ကို သွားရောက်တိုက်ခိုက်ခဲ့ကြောင်း မြိတ်ခရိုင် ပြည်သူ့ကာကွယ်ရေး ပူးပေါင်းစစ်ကြောင်း ၁ က DVB ကို ပြောပါတယ်။
ညောင်ပင်ကွင်းရွာအခြေစိုက် ခမရ ၅၆၁ တပ်ရင်းနဲ့ စစ်ကောင်စီတပ်သားတွေရှိတဲ့ ညောင်ပင်ကွင်းရွာ တံတားထိပ်က စစ်ဆေးရေးဂိတ်တို့ကို မြိတ်ခရိုင် ပြည်သူ့ကာကွယ်ရေး ပူးပေါင်းစစ်ကြောင်း ၁ ကနေ တပြိုင်တည်း သွားရောက်တိုက်ခိုက်ခဲ့တာဖြစ်ပြီး အပြန်အလှန် ထိတွေ့ပစ်ခတ်မှု ဖြစ်ပွားခဲ့တယ်လို့ ပြောပါတယ်။
စစ်ကြောင်း ၁ တာဝန်ရှိသူတဦးက “ကျနော်တို့ဘက်က ဒရုန်းတွေလည်းပါတယ်။ ၅၆၁ က လက်နက်ကြီး ရမ်းသန်းပြီး ပြန်ပစ်တယ်။ ကျနော်တို့ဘက်က ထိခိုက်မှု လုံးဝမရှိပါဘူး” လို့ ပြောပါတယ်။
တိုက်ပွဲ နှစ်နာရီနီးပါး ကြာမြင့်ခဲ့ပြီး မြိတ်ခရိုင် ပြည်သူ့ကာကွယ်ရေးစစ်ကြောင်း ၁ ဘက်က ဒရုန်းတွေနဲ့ပါ သွားရောက်တိုက်ခိုက်ခဲ့တာဖြစ်ကြောင်း၊ စစ်ကောင်စီဘက်က ထိခိုက်သေဆုံးမှုတွေ ရှိတယ်လို့ သိရပြီး အသေးစိတ် အချက်အလက်ကိုတော့ အတည်ပြုဆဲ ဖြစ်တယ်လို့ သိရပါတယ်။
တိုက်ပွဲအတွင်း ခမရ ၅၆၁ တပ်ရင်းကနေ လက်နက်ကြီး၊ လက်နက်ငယ်တွေနဲ့ ပြည်သူ့ကာကွယ်ရေးစစ်ကြောင်း ရှိတဲ့ဘက်ကို ပစ်ခတ်တိုက်ခိုက်တာတွေ ရှိပေမဲ့ ထိခိုက်ဒဏ်ရာရသူတော့ မရှိခဲ့ဘူးလို့ ပြောပါတယ်။
ဧပြီ ၁ ရက်ကလည်း ကမ္မလိုင်းရွာအခြေစိုက် ခမရ ၅၅၈ တပ်ရင်းကို မြိတ်ခရိုင် ပြည်သူ့ကာကွယ်ရေး ပူးပေါင်စစ်ကြောင်း ၁ က ဒရုန်းတွေနဲ့ ဗုံးသီးသွားရောက်ကြဲချခဲ့သေးသလို မတ် ၃၀ နဲ့ ၃၁ ရက်တို့ကလည်း တနင်္သာရီမြို့နယ်က စစ်ကောင်စီတပ်ရင်းတွေကို ဗုံးသီးချ တိုက်ခိုက်ခဲ့သေးတယ်လို့ သိရပါတယ်။
စစ်ကောင်စီ တပ်ရင်း တပ်ဖွဲ့တွေ ဆက်တိုက်ဆိုသလို တိုက်ခိုက်ခံလာရတဲ့ တနင်္သာရီမြို့နယ်မှာ ဒေသခံပြည်သူတွေနဲ့ ခရီးသွားပြည်သူတွေ အနေနဲ့ စစ်ကောင်စီတပ်ရင်းတွေအနီး မနေထိုင်ကြဖို့၊ အနီးကပ် မသွားလာကြဖို့ကို ဒေသတွင်း တော်လှန်ရေးတပ်ဖွဲ့တွေက အသိပေးထားပါတယ်။
