မြန်မာ-ထိုင်းနယ်စပ် မြဝတီမြို့တောင်ဘက် ဖလူးကျေးရွာတဘက်ကမ်း ထိုင်းနိုင်ငံဘက်ခြမ်းမှာ  ဧပြီ ၂ ရက်က ကင်းလှည့်နေတဲ့  ထိုင်းစစ်တပ်က  လက်နက်ကျည်ဆန်တွေ ပိုင်ရှင်မဲ့ သိမ်းဆည်းရမိခဲ့ ပါတယ်။

ထိုင်းနိုင်ငံက ထုတ်လုပ်တဲ့ 7.62 ကျည်ဆန် ၈၀၀ ၊ RPG ကျည်နဲ့ တခြား ကျည်ဆန်တွေကိုပါ သိမ်းဆည်းရမိတာဖြစ်ပြီး ပိုင်ရှင်ကတော့ ထွက်ပြေးလွတ်မြောက်သွားတယ်လို့  ဧပြီ ၃ ရက် မနက်က ထိုင်းစစ်တပ်အပါအဝင် အဖွဲ့စုံပါဝင် ကျင်းပတဲ့ သတင်းစာရှင်းလင်းပွဲမှာ ထိုင်းတာဝန်ရှိသူတွေက ပြောပါတယ်။

မြန်မာ-ထိုင်းနယ်စပ်မှာ တိုက်ပွဲတွေနဲ့ စခန်းသိမ်းတိုက်ပွဲတွေ ပြင်းထန်ဖြစ်ပွားနေပြီး  လက်နက်တွေလည်းပျံ့နေတဲ့အတွက် ထိုင်းနိုင်ငံဘက်ကို မရောက်ရှိစေဖို့ ကာကွယ်တားဆီး၊ အထူးသတိထားကြဖို့  သတင်းစာရှင်းလင်းပွဲမှာ ပြောသွားပါတယ်။

အထူးသဖြင့် သင်္ကြန်ပွဲတော်မှာ မူးယစ်ဆေးလက်နက်တွေကို စစ်ဆေးဖမ်းဆီး နိုင်ရေးအတွက် ထိုင်းဝန်ကြီးချုပ်က  ညွှန်ကြားထားတယ်လို့လည်း  ထိုင်းအာဏာပိုင်တွေက ပြောပါတယ်။