မသင်္ကာသူကို ဖမ်းထားတုန်းမှာ သေနတ်နဲ့ သေစေခဲ့တဲ့အတွက် ကရင်နီအမျိုးသားများ ကာကွယ်ရေးတပ် (KNDF) တပ်ဖွဲ့ဝင် ၂ ယောက်ကို ဒီနေ့ မတ် ၂၄ ရက်မှာ ထောင်ဒဏ် နှစ် ၂၀ နဲ့ ၁ လစီ ပြစ်ဒဏ်ချလိုက်တယ်လို့ KNDF ဗဟိုကော်မတီက ထုတ်ပြန်ပါတယ်။
၂၀၂၄ ခုနှစ်၊ ဖေဖော်ဝါရီ ၂၁ ရက် ည ၁၁ နာရီဝန်းကျင်မှာ ပီကင်းကောခူရွာက အသက် ၂၇ နှစ်အရွယ် အရပ်သားတယောက်ကို ရပ်ရွာတွင်း မူးယစ်ရမ်းကားမှု စွဲချက်နဲ့ ဖမ်းဆီး ထိန်းသိမ်းထားတုန်း KNDF တပ်ဖွဲ့ဝင်တချို့က ပေးအပ်ထားတဲ့ လက်နက်ကို အသုံးပြုပြီး မလျော်ကန်တဲ့ ပစ်ခတ်မှုကနေ လူသေမှုဖြစ်ခဲ့တယ်လို့ ဆိုပါတယ်။
KNDF အနေနဲ့ သစ္စာအဓိဋ္ဌာန် ၅ ချက်၊ နိုင်ငံရေး မူဝါဒကြေညာစာတမ်းနဲ့အညီ လိုက်နာကျင့်သုံး ရပ်တည်နေတာကြောင့် အဲဒီကိစ္စကို ဗဟိုစုံစမ်းစစ်ဆေးရေးအဖွဲ့က ကနဦး စုံစမ်းစစ်ဆေးခဲ့အပြီးမှာ ဖြစ်စဉ်အပေါ် စစ်ဘက်ဆိုင်ရာအက်ဥပဒေ ပုဒ်မ ၄၉ အရ ပထမအဆင့် ဗျူဟာစစ်ခုံရုံးနဲ့ စစ်ဆေးကြားနာခဲ့တယ်လို့ ဆိုပါတယ်။
အဲဒီနောက် ပုဒ်မ ၄၈ အရ ဗဟိုစစ်တရားရုံးချုပ်ကို ဖွဲ့စည်းပြီး ဥပဒေပြဋ္ဌာန်းချက်နဲ့အညီ ကျူးလွန်သူ KNDF တပ်သား ၂ ယောက်ကို စစ်အက်ဥပဒေ ပုဒ်မ ၂၂၊ ၃၀ အရ ထောင်ဒဏ် နှစ် ၂၀ နဲ့ ၁ လစီ ပြစ်ဒဏ်ခံယူဖို့ ဒီနေ့ စီရင်ချက်ချလိုက်တယ်လို့ ထုတ်ပြန်ထားပါတယ်။
