ကရင်ပြည်နယ်၊ ကြာအင်းဆိပ်ကြီးမြို့နယ်က ကျေးရွာတွေကို စစ်ကောင်စီက လေယာဉ်နဲ့ ဗုံးကြဲတိုက်ခိုက်တာကြောင့် အရပ်သားတွေ ထိခိုက်သေဆုံးခဲ့ပြီး စစ်ကိုင်းတိုင်း၊ ကလေးမြို့နယ် အနောက်မြောက်ပိုင်း လက်ပံချောင်းရွာမှာလည်း စစ်ကောင်စီလက်နက်ကြီးကြောင့် ဒေသခံရွာသား ၂ ယောက် သေဆုံးပြီး ၅ ယောက် ထိခိုက်ဒဏ်ရာရခဲ့တယ်လို့ ဒေသခံတွေက ပြောပါတယ်။

ကြာအင်းဆိပ်ကြီးမြို့နယ်၊ သစ်ကတိုက်ကျေးရွာ၊ လွှတ်ရှမ်းကျေးရွာနဲ့ အနန်းကွင်းကျေးရွာတို့ကို မတ် ၁၅ ရက်နေ့ မွန်းလွဲ ၂ နာရီကျော်မှာ စစ်ကောင်စီက ဗုံးကြဲတိုက်ခိုက်ခဲ့ပြီး ပြည်သူတွေ ထိခိုက်သေဆုံးခဲ့ပါတယ်။

ကရင်အမျိုးသားအစည်းအရုံး(KNU) နဲ့ နီးစပ်သူတယောက်က “ဗုံးကြဲသွားတာတော့ သိတယ်ဆိုပေမယ့် ဖုန်းလိုင်းတွေပြတ်တောက်နေလို့ အတည်ပြုလို့မရသေးဘူး။ ရွာ ၃ ရွာလုံးကို ဗုံးကြဲသွားတာပါ။ ထိခိုက်သေဆုံးမှုတွေတော့ရှိတယ်ဆိုပေမယ့် အတည်ပြုနေတုန်းပါ။ အနန်းကွင်းက မိန်းကလေးတယောက်သေတယ်လို့တော့ မြေပြင်သတင်းအရသိထားတယ်” လို့ ပြောပါတယ်။

အနန်းကွင်းကျေးရွာနားမှာပဲ တိုက်ပွဲအနည်းငယ်ဖြစ်ပွားနေပြီး ကျန်တဲ့ကျေးရွာနှစ်ရွာမှာ တိုက်ပွဲဖြစ်ပွားခြင်းမရှိခဲ့သလို ဗုံးကြဲခဲ့တာဟာလည်း စစ်ရေးပစ်မှတ်မဟုတ်တဲ့ အရပ်သားတွေရှိတဲ့ ရွာထဲကို ကြဲခဲ့တယ်လို့ ဆိုပါတယ်။

ကော့ကရိတ်မြို့ခံတယောက်က “ကျနော်တို့ကြားရသလောက်တော့ လတ်တလော ၃ ဦးသေပြီး အများကြီး ဒဏ်ရာရထားတယ်လို့ကြားတယ်။ ကျနော်တို့ အတိအကျကြီးသိတာမဟုတ်ဘူး ကြားရတာပဲရှိတာပါ။ သေချာသိတာကတော့ သူတို့အရပ်သားတွေကို ပစ်မှတ်ထားပြီး တိုက်သွားတာ” လို့ ပြောပါတယ်။

ကြာအင်းဆိပ်ကြီးကျေးရွာအတွင်းရှိ ကျေးရွာ ၃ ရွာ ဗုံးကြဲခံရပြီး အရပ်သားပြည်သူတွေ ထိခိုက်သေဆုံးတဲ့အရေအတွက်ကို ဒီဗွီဘီအနေနဲ့ ဆက်လက်စုံစမ်းနေဆဲဖြစ်ပါတယ်။

မြဝတီမြို့နယ်၊ သင်္ကန်းညီနောင်မှာလည်း စစ်ကောင်စီနဲ့ KNLA ပူးပေါင်းတပ်ဖွဲ့တို့ တိုက်ပွဲဖြစ်တဲ့ တပတ်အတွင်း အရပ်သားပြည်သူ ၂၀ လောက် သေဆုံးထားတယ်လို့ ဒေသခံတွေက ပြောပါတယ်။

စစ်ကိုင်းတိုင်း၊ ကလေးမြို့နယ် အနောက်မြောက်ပိုင်း လက်ပံချောင်းရွာမှာ စစ်ကောင်စီ လက်နက်ကြီးကြောင့် ဒေသခံ အမျိုးသား ၁ ယောက်နဲ့ အမျိုးသမီး ၁ ယောက် ပွဲချင်းပြီးသေဆုံးခဲ့ပြီး ၅ ယောက်ထိခိုက်ဒဏ်ရာရခဲ့တယ်လို့ ဒေသခံတွေက ပြောပါတယ်။

မတ် ၁၄ ရက်နေ့ည ၉ နာရီခွဲဝန်းကျင်က ကလေးမြို့ အမြောက်တပ်ကနေ မြောက်ပိုင်း ကျေးရွာတွေဘက်ကို လက်နက်ကြီးတွေနဲ့ပစ်ခတ်ခဲ့တာလို့ဆိုပါတယ်။

စစ်ကောင်စီပစ်ခတ်လိုက်တဲ့ လက်နက်ကြီးကျည်ဟာ လက်ပံချောင်းရွာက သင်းအုပ်ဆရာ နေအိမ်ရှေ့မှာကျရောက်ပေါက်ကွဲခဲ့ပြီး အသက် ၄၁ နှစ်အရွယ်အမျိုးသား TV.Lalramdika နဲ့ အသက်အရွယ် ၆၂ အရွယ်အမျိုးသမီး Pi Lalzuali တို့ ၂ ယောက်ဟာ နေရာမှာတင်ပွဲချင်းပြီး သေဆုံးသွားခဲ့တာ လို့လက်ပံချောင်းရွာနဲ့နီးစပ်သူတယောက်က ပြောပါတယ်။

“၁၄ ရက်ညက ရွာဘက်မှာ ဘာတိုက်ပွဲမှမရှိဘူး။ လက်နက်ကြီးနဲ့ တောက်လျှောက်ပစ်တာ။ လက်နက်ကြီးက အသင်း‌တော်လူကြီးအိမ်ရှေ့ကျတာ။‌ ခေါင်းထိပြီး ၂ ယောက်လုံး နေရာတင် ဆုံးသွားတာ။ ၅ ဦးလောက်ဒဏ်ရာရကြတယ်” လို့ ပြောပါတယ်။

မတ် ၁၀ ရက်နေ့ကလည်း စစ်ကောင်စီလက်နက်ကြီးကြောင့် ကလေးမြို့နယ် ရှတောရွာက အသက် ၂၂ နှစ်အရွယ် မနုနုထွေး ထိခိုက်ဒဏ်ရာရပြီး သေဆုံးခဲ့ပါသေးတယ်။