ကရင်ပြည်နယ်၊ မြဝတီမြို့နယ်မှာ စစ်ကောင်စီတပ်က လေကြောင်းနဲ့ လက်နက်ကြီးတွေ ပစ်ခတ်မှုတွေကြောင့် အရပ်သား ၁၀ ဦးထက်မနည်းသေဆုံးပြီး နေအိမ်အလုံး ၂၀ မီးလောင်ခဲ့တယ်လို့  ကရင်အမျိုးသားအစည်းအရုံး (KNU) က မတ် ၁၃ ရက်မှာ  ထုတ်ပြန်ပါတယ်။

သင်္ကန်းညီနောင်အခြေစိုက် ခမရ ၃၅၅ တပ်ရင်းကို KNLA ပူးပေါင်းတပ်ဖွဲ့က မတ် ၇ ရက် မနက် ၁၀ နာရီကျော်လောက်က ဝင်ရောက်တိုက်ခိုက်ရာမှာ ည ၆ နာရီခွဲမှာ အပြီးသတ် တိုက်ခိုက်သိမ်းပိုက်နိုင်ခဲ့ပါတယ်။

တိုက်ပွဲအတွင်း စစ်ကောင်စီတပ်ကလည်း  လေယာဉ်နဲ့ လက်နက်ကြီးပစ်ကူတွေကြောင့် အရပ်သားတွေ ထိခိုက်သေဆုံးမှုရှိခဲ့သလို KNLA ပူးပေါင်းတပ်ဖွဲ့ဝင်  ၆ ဦးသေဆုံးပြီး ၈ ဦး ဒဏ်ရာရရှိခဲ့ပါတယ်။ 

စစ်ကောင်စီတပ်ဘက်ကလည်း ၁၉ ဦးသေဆုံးပြီး လက်နက်၊ခဲယမ်းနဲ့ စစ်သုံးကား အများအပြားကိုလည်း  သိမ်းဆည်းရမိခဲ့ပါတယ်။

KNU တပ်မဟာ ၆ နယ်မြေအတွင်း KNLA ပူးပေါင်းတပ်ဖွဲ့တွေက စစ်ကောင်စီတပ်စခန်းတွေနဲ့  မြို့သိမ်းတိုက်ပွဲတွေ  ဆက်လက်ဆင်နွဲနေတာပါ။

သင်္ကန်းညီနောင်တိုက်ပွဲတွေကြောင့် သင်္ကန်းညီနောင်မြို့၊ ရွာသစ်ကျေးရွာ၊ မဲကနယ်၊ ဖားကျောင်း၊ မြစန္ဒီနဲ့ အနီးနားကျေးရွာ‌တွေက ပြည်သူ ၅,၀၀၀ ကျော်  စစ်ဘေးတိမ်းရှောင်နေရပါတယ်။