ကချင်ပြည်နယ်၊ ဗန်းမော်မြို့နယ်၊ ဧရာဝတီမြစ်အနောက်ဘက်ခြမ်းကို မတ် ၈ ရက်နေ့မှာ စစ်ကောင်စီတပ်က လက်နက်ကြီးနဲ့ ပစ်ခတ်ခဲ့လို့ အမျိုးသမီး ၁ ယောက် သေဆုံးခဲ့ပြီး ကချင်လွတ်လပ်ရေးတပ်မတော် KIA နဲ့ စစ်ကောင်စီတပ်တို့တိုက်ပွဲ ဖြစ်ပွားနေတဲ့အတွက် မြစ်ကြီးနား-ပူတာအိုလမ်းမှာလည်း ရက်အကန့်အသတ်မရှိ ပိတ်ထားတယ်လို့ သိရပါတယ်။
ဧရာဝတီမြစ်အနောက်ဘက်ကမ်းက စင့်ကင်ကျေးရွာကို စစ်ကောင်စီတပ်က မတ် ၈ ရက် ညနေပိုင်းမှာ လက်နက်ကြီးနဲ့ ပစ်ခတ်ခဲ့တဲ့အတွက် အသက် ၅၀ အရွယ် ဒေါ်ဝင်းချစ် ထိမှန်သေဆုံးခဲ့ပြီး ပြည်သူတွေလည်း ဘေးလွတ်ရာတိမ်းရှောင်နေကြရပါတယ်။
ဒေသခံတယောက်က “လွန်ခဲ့တဲ့ ၂ ရက်လောက်ကတည်းက ပစ်နေတာ။ လက်နက်ကြီးထိတဲ့ အမျိုးသမီးက နာရေးအိမ်က ပြန်လာရင်းလမ်းမှာ လက်နက်ကြီးကျည်မှန်တာ။ ပြီးခဲ့တဲ့ရက်တွေက ရွာအပြင်ဘက်ကျပြီး အိမ်မွေးတိရစ္ဆာန်တွေ သေတာရှိတယ်” လို့ ပြောပါတယ်။
မြစ်ကြီးနား-ပူတာအို လမ်းပိုင်းမှာလည်း တိုက်ပွဲတွေဖြစ်နေတာကြောင့် မတ် ၉ ရက်နေ့ကစပြီး လမ်းကို ရက်အကန့်အသတ်မရှိ ပိတ်ထားတယ်လို့ မော်တော်ယာဉ်မောင်းတွေဆီက သိရပါတယ်။
ယာဉ်မောင်းတယောက်က “ကားလမ်းက ပိတ်လိုက်ပြီ။ တိုက်ပွဲဖြစ်နေလို့ ရက်အကန့်အသတ်မရှိ ပိတ်လိုက်တာ။ မြစ်ကြီးနားဆင်းမယ့်ကားတွေ ပူတာအိုတက်မယ့်ကားတွေ အကုန်နားလိုက်ရပြီ။ စစ်ရေးအခြေအနေအရ ကားလမ်းမထွက်ခိုင်းတာလို့ သိရတယ်။ ဘယ်နေ့ ပြန်ဖွင့်မလဲတော့ မသိရဘူး” လို့ ပြောပါတယ်။
KIA နဲ့ စစ်ကောင်စီတပ် တိုက်ပွဲကြောင့် ပူတာအို-မြစ်ကြီးနား အတက်အဆင်းပြုလုပ်မယ့် မော်တော်ယာဉ်တွေဟာ ဆွမ်ပရာဘွမ်မြို့နယ်၊ ခင်ဒူးယန်ကျေးရွာမှာ ယာယီ ရပ်နားထားကြရပါတယ်။
မြစ်ကြီးနား-ပူတာအိုကားလမ်း၊ ဆွမ်ပရာဘွမ်မြို့နယ်၊ မလိယန်ကျေးရွာက စစ်ကောင်စီတပ်စခန်းနဲ့ မြို့နယ်ရဲစခန်းကို မတ် ၈ ရက်နေ့မှာ ကချင်လွတ်လပ်ရေးတပ် KIA က သိမ်းပိုက်နိုင်ခဲ့ပါတယ်။
