မန်ယူအသင်းအနေနဲ့ ရာသီအကုန်မှာ ချန်ပီယံလိဂ်ဝင်ခွင့် မရနိုင်ကြောင်း အသင်းတိုက်စစ်မှူးဟောင်း ဝိန်းရွန်းနီက သုံးသပ်သွားပါတယ်။
မန်ယူအသင်းဟာ မတ်လ ၉ ရက် မနေ့ညက အဲဗာတန်အသင်းနဲ့ ပွဲစဉ်မှာ ၂ ဂိုး ဂိုးမရှိနဲ့ နိုင်ပွဲ ပြန်လည်ရရှိခဲ့ပေမဲ့ အဆင့် ၄ နေရာက ဗီလာနဲ့ ၈ မှတ် ကွာဟနေဆဲပါ။
မန်ယူအသင်းရဲ့ခြေစွမ်းဟာ တသမတ်တည်းမရှိတာကြောင့် ပွဲတိုင်းအနိုင်ရဖို့ ခက်ခဲမှာဖြစ်ပြီး ပြိုင်ဘက်ကို အခွင့်အရေးကောင်းတွေ အမြဲတမ်းပေးနေကြောင်း၊ ရာသီကုန်မှာ အဆင့် ၄ အတွင်း ဝင်ပြီး ချန်ပီယံလိဂ်ဝင်ခွင့်ရမယ်လို့ မထင်ကြောင်း ဝိန်းရွန်းနီက ပြောပါတယ်။
ဝိန်းရွန်းနီနဲ့ အတူ TNT Sport ရုပ်သံမှာ သုံးသပ်တင်ဆက်ခဲ့ကြတဲ့ ဖာဒီနန်နဲ့ လက်စ်ကော့တို့ကလည်း ယူနိုက်တက်အသင်းရဲ့ အခြေအနေအပေါ် အားမလိုအားမရ ဖြစ်ခဲ့ကြပါတယ်။
အခုနှစ်ပရီးမီးယားလိဂ်မှာ အင်္ဂလန်အသင်းတွေရဲ့ ဥရောပပြိုင်ပွဲရလဒ်အပေါ် မူတည်ပြီး အဆင့် ၄ ရတဲ့ အသင်းအပြင် အဆင့် ၅ ရရှိတဲ့ အသင်းကပါ ချန်ပီယံလိဂ်ဝင်ခွင့် ရရှိနိုင်ပါတယ်။
Photo-Reuters
