ကလေးမြို့က ရဲတပ်သားတယောက်ဟာ ချင်းပြည်ကာကွယ်ရေးတပ်-ကလေး၊ ကဘော်၊ ဂန့်ဂေါ (CDF-KKG) ဆီကို မတ် ၉ ရက် မနက်ပိုင်းမှာ လက်နက်နဲ့တကွ အလင်းဝင်ရောက်လာခဲ့တယ်လို့ CDF-KKG ဆီက သိရပါတယ်။

CDF-KKG တပ်ဖွဲ့ဝင်တွေနဲ့ ချိတ်ဆက် အလင်းဝင်ရောက်လာတာဖြစ်ပြီး အဲဒီရဲတပ်သားနဲ့အတူ G3 သေနတ် ၁ လက်၊ ကျည်ဘောက် ၅ ခု၊ ကျည်ဆန် အတောင့် ၃၃၀ ပါရှိလာတာကြောင့် CDF-KKG က ငွေကျပ်သိန်း ၅၀ ချီးမြှင့်ဂုဏ်ပြုခဲ့တယ်လို့ သိရပါတယ်။

အလင်းဝင်ရောက်လာတဲ့ ရဲတပ်သားဟာ အသက် ၂၆ နှစ်အရွယ်ရှိရှိပြီး ကလေးမြို့ပေါ် ရဲတပ်ရင်းတခုက ဖြစ်တယ်လို့ သိရပါတယ်။

CDF-KKG ပြန်ကြားရေးမှူးက “ကျနော်တို့ကတော့ အချိန်မရွေး ကြိုဆိုပါတယ်။ လက်နက်ပါရင် သိန်း ၅၀ ချီးမြှင့်ပါတယ်၊ သူတို့သွားချင်တဲ့ နေရာပို့ပေးဖို့ ခရီးစရိတ်လည်း ကျနော်တို့ စီစဉ်ပေးပါတယ်၊ အခုချိန်မှာတော့ အတော်လေး နောက်ကျနေပါပြီ၊ လက်နက်နဲ့အတူ ကျနော်တို့ဆီ လာရောက်ပူးပေါင်းပေးဖို့ အမြဲ ဖိတ်ခေါ်ပါတယ်” လို့ ပြောပါတယ်။

CDF-KKG အနေနဲ့ အလင်းဝင်ရောက်လာသူတွေကို အကူအညီပေးနေသလို စစ်ပညာသင်ကြားချင်တဲ့ လူငယ်တွေကိုလည်း သင်တန်းခေါ်ယူနေတယ်လို့ သိရပါတယ်။