ရခိုင်ပြည်နယ်မှာ စစ်ကောင်စီတပ်တွေနဲ့ ရက္ခိုင့်တပ်တော်(အေအေ)တို့ရဲ့ မနှစ် ၂၀၂၃ နိုဝင်ဘာလလယ် လောက်ကစခဲ့တဲ့ တကျော့ပြန်တိုက်ပွဲတွေအတွင်း ထိုးစစ်ဆင်တိုက်ခိုက်နေတဲ့ အေအေက မြို့ ၇ မြို့ကို သိမ်းပိုက်ရရှိထားပါတယ်။
ဒီ ၇ မြို့နယ်ထဲမှာ ပုဏ္ဏားကျွန်းမြို့နယ်ဟာ နောက်ဆုံးသိမ်းပိုက်ထားတဲ့မြို့ဖြစ်ပြီး ခမရ ၅၅၀ တပ်ရင်းကို ဖေဖော်ဝါရီ ၂၁ ရက်နေ့ကနေ မတ် ၄ ရက်နေ့အထိ ၁၃ ရက်ကြာ တိုက်ပြီးနောက် အေအေက သိမ်းယူခဲ့တာပါ။
ဒါကြောင့် ပုဏ္ဏားကျွန်းမြို့ဟာ ရက္ခိုင်ဒေသအတွင်းက စစ်ကောင်စီကင်းစင်တဲ့ နောက်ထပ် တမြို့ဖြစ်လာပြီလို့လည်း အေအေက ပြောထားပြီး မြို့သိမ်းတိုက်ပွဲပြီးတဲ့နောက် ဒီမြို့နဲ့ ပတ်သက်တဲ့ ဓာတ်ပုံမှတ်တမ်းတွေကို မတ် ၈ ရက်မှာ အေအေက ထုတ်ပြန်လာပါတယ်။
ပုဏ္ဏားကျွန်းမြို့ရဲ့ နောက်ဆုံးစစ်ရေးပစ်မှတ်ကိုတိုက်ခိုက်တဲ့ ခမရ ၅၅၀ တပ်ရင်း စခန်းသိမ်း တိုက်ပွဲအတွင်း အဲဒီတပ်ရင်းက ဗျူဟာမှူး ဗိုလ်မှူးကြီး မျိုးမင်းကိုကို၊ ခလရ ၂၀၈ တပ်ရင်းမှူး ဒုဗိုလ်မှူးကြီး ဖြိုးသူအောင်၊ ခမရ ၅၅၀ က ဗိုလ်မှူးစောထွေးအပါအဝင် စစ်ကောင်စီတပ်ဖွဲ့ဝင် အမြောက်အများကို အသေဖမ်းမိခဲ့တယ်လို့လည်း အေအေက ပြောထားပါတယ်။
နိုဝင်ဘာလလယ်လောက်ကစတဲ့ ရခိုင်ပြည်နယ်ရဲ့ တကျော့ပြန်စစ်ပွဲ ၄ လလောက်အတွင်း ရက္ခိုင့်တပ်တော် အေအေက မင်းပြား၊ ပေါက်တော၊ မြောက်ဦး၊ ကျောက်တော်၊ မြေပုံ၊ ပုဏ္ဏားကျွန်းနဲ့ ချင်းပြည်နယ် ပလက်ဝမြို့ တို့ကို သိမ်းပိုက်ရရှိထားပါတယ်။
