ဂါဇာကမ်းမြောင်ဒေသခံတွေအတွက် မတ် ၂ ရက်နေ့မှာ အမေရိကန်က စားနပ်ရိက္ခာအကူအညီတွေကို လေကြောင်းကနေ ပထမဆုံးအကြိမ် ကြဲချပေးခဲ့ပြီး ဆက်တိုက်ကူညီပေးသွားဖို့ရှိတယ်လို့လည်း ထုတ်ပြန်ပါတယ်။ 

ဂါဇာမှာ လူ ၅ သိန်းကျော်လောက် အငတ်ဘေးဆိုက်တော့မယ်လို့ ကုလသမဂ္ဂက သတိပေးထားချိန်မှာ အမေရိကန် C-130 စစ်လေယာဉ် ၃ စင်းက အသင့်စား စားစရာ အယောက် ၃၈,၀၀၀ စာ ပါတဲ့ ရိက္ခာထုတ်တွေ ကြဲချခဲ့တာဖြစ်ပြီး ဂျော်ဒန်တပ်ဖွဲ့တွေလည်း ပါဝင်ကူညီခဲ့တယ်လို့ဆိုပါတယ်။ 

အစ္စရေးကလည်း အမေရိကန်ရဲ့လုပ်ရပ်ကို ကြိုဆိုသလို သူတို့နဲ့ ဆွေးနွေးပြီးမှ ပူးပေါင်းဆောင်ရွက်တာ ဖြစ်တယ်လို့ ထုတ်ပြန်ပါတယ်။

သီတင်းပတ် ၆ ပတ် အပစ်အခတ် ရပ်စဲဖို့ကတော့ အစ္စရေးဘက်က သဘောတူထားပြီးဖြစ်ပေမဲ့ ဓားစာခံတွေ လွှတ်ပေးဖို့ ဟားမတ်စ်ဘက်က သဘောတူ၊ မတူ ဆိုတဲ့အပေါ် မူတည်တယ်လို့ အမေရိကန်ဘက်က ထုတ်ပြန်ပါတယ်။ 

အမေရိကန် ဒုတိယသမ္မတ ကမ်မလာဟားရစ်ဟာ အစ္စရေး စစ်ကာလအစိုးရအဖွဲ့ဝင် ဌာနလက်ကိုင်မရှိ ဝန်ကြီး ဘင်နီဂန့်ဇ်နဲ့ အိမ်ဖြူတော်မှာ မတ် ၄ ရက်နေ့ကျရင် တွေ့ဆုံမှာ ဖြစ်ပါတယ်။

Source/Photo-REUTERS/Kosay Al Nemer