အသိဉာဏ်တု(AI) နည်းပညာနဲ့ ပတ်သက်တဲ့ကုမ္ပဏီတွေရဲ့ စတော့စျေးတွေ တောက်လျှောက် မြင့်တက်နေခြင်းနဲ့အတူ ချစ်ပ်ပြားထုတ်လုပ်တဲ့ကုမ္ပဏီ Nvidia (အန်ဗီဒီယာဟုထွက်ပါ) ရဲ့ စတော့ စျေးကွက်တန်ဖိုးဟာ မတ် ၁ ရက်မှာ ပထမဆုံးအကြိမ် ဒေါ်လာ ၂ ထရီလီယံကျော်သွားခဲ့ပါတယ်။ 

Nvidia က ထုတ်တဲ့ ပရောဆက်ဆာတွေ သုံးတဲ့ အေအိုင် ဆာဗာတွေရောင်းချနေတဲ့ ဒဲလ်ကုမ္ပဏီရဲ့ စတော့စျေး ၃၈ ရာခိုင်နှုန်းအထိ တက်သွားချိန်မှာ Nvidia ရဲ့ စျေးလည်း ၄ ရာခိုင်နှုန်း ထပ်တက်သွားပါတယ်။ 

ဒါကြောင့် Nvidia ရဲ့စျေးကွက်တန်ဖိုးဟာ ၂ ဒသမ ၀၆ ထရီလျံအထိ ရှိလာပြီး ဝေါစထရိမှာ တတိယ တန်ဖိုးအကြီးဆုံးကုမ္ပဏီ ဖြစ်လာပါတယ်။ 

ပထမက မိုက်ခရိုဆော့ဖ်ဖြစ်ပြီး ဒေါ်လာ ၃ ဒသမ ၀၉ ထရီလီယံ၊ ဒုတိယက အက်ပဲလ်ဖြစ်ပြီး ၂ ဒသမ ၇၇ ထရီလျံ တန်ကြေး ရှိကြပါတယ်။ 

Nvidia ရဲ့ချစ်ပ်တွေ နဲ့ လုပ်ထားတဲ့ ဆာဗာတွေ ရောင်းတဲ့ Super Micro Computer ရဲ့ ရှယ်ယာ စျေးလည်း ၄ ဒသမ ၅ ရာခိုင်နှုန်းအထိ တက်သွားပါတယ်။ 

တခြား အေအိုင်နည်းပညာအထူးပြု ချစ်ပ်ပြားထုတ်လုပ်တဲ့ ကုမ္ပဏီတွေရဲ့ တန်ဖိုးတွေလည်း ထိုးတက် နေပါတယ်။ 

Nvidia ဟာ အဆင့်မြင့် အေအိုင်ချစ်ပ်ပြားစျေးကွက်ရဲ့ ၈၀ ရာခိုင်နှုန်းအထိ လွှမ်းမိုးထားပြီး သူ့ဖောက်သည်တွေထဲမှာ နာမည်ကျော် ChatGPT ဖန်တီးတဲ့ OpenAI ၊ မိုက်ခရိုဆော့ဖ်၊ ဂူးဂဲလ်ရဲ့ Alphabet ၊ ဖေ့စ်ဘတ်ခ်ရဲ့  Meta Platforms တွေ ပါဝင်ပါတယ်။

Source/Photo - Reuters