ရန်ကုန်တိရစ္ဆာန်ဥယျာဥ်၊ ဆာဖာရီဥယျာဉ်၊ ရတနာပုံဥယျာဥ်နဲ့ နက္ခတ်တာရာ ပြခန်းတို့ကို စစ်ကောင်စီက ၁၀ နှစ်စာနှစ်ချုပ်နဲ့ ပုဂ္ဂလိကကို ငှားရမ်းမယ်လို့ သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနနဲ့ နီးစပ်သူတွေဆီက သိရပါတယ်။
ရန်ကုန်တိရစ္ဆာန်ဥယျာဥ်၊ နေပြည်တော် ဆာဖာရီဥယျာဥ်၊ မန္တလေး ရတနာပုံဥယျာဥ်နဲ့ နေပြည်တော် နက္ခတ်တာရာပြခန်းတို့ကို ပုဂ္ဂလိကလုပ်ငန်းရှင်တွေကို ၂၀၂၄-၂၀၂၅ ဘဏ္ဍာနှစ်မှာ စတင်ငှားရမ်းသွားမှာဖြစ်တယ်လို့ သစ်တောနဲ့နီးစပ်သူတဦးက ဒီဗွီဘီကို ပြောပါတယ်။
“မတ်လထဲမှာ တင်ဒါခေါ်မှာ၊ တင်ဒါအောင်တဲ့သူကို ၁၀ နှစ်စာ နှစ်ရှည်ငှားမှာ၊ ကုမ္ပဏီတွေအနေနဲ့ သစ်တောဦးစီးဌာနမှာ လာစုံစမ်းလို့ရတယ်။”
တင်ဒါလျှောက်ချင်တဲ့ ကုမ္ပဏီတွေအနေနဲ့ နေပြည်တော်ရှိ သစ်တောဦးစီဌာန တိရစ္ဆာန်ဥယျာဉ်များဌာန ရုံးအမှတ် ၃၉ မှာ မတ်လ ၃ ရက် နောက်ဆုံးထားပြီး လျှောက်ထားရမယ်လို့ သဘာဝပတ်ဝန်းကျင်ထိန်းသိမ်းရေး ဝန်ကြီးဌာနနဲ့ နီးစပ်သူတဦးက ဒီဗွီဘီကို ပြောပါတယ်။
နှစ်ပေါင်း ၁၀၀ ကျော် သက်တမ်းရှိတဲ့ ရန်ကုန်တိရစ္ဆာန်ဥယျာဥ်ကို ၂၀၁၁ ခုနှစ် ဧပြီ ၁ ရက်က စတင်ကာ ထူးကုမ္ပဏီကို ငှားရမ်းထားတာ ဖြစ်ပါတယ်။
မန္တလေးရှိ တိရစ္ဆာန်ဥယျာဥ်(ရတနာပုံ) ကို စစ်အာဏာရှင်ဟောင်း ဗိုလ်ချုပ်မှူးကြီးသန်းရွှေလက်ထက် ၁၉၈၉ ခုနှစ်က တည်ထောင်ခဲ့တာပါ။
ဒါ့အပြင် ၂၀၀၇ ခုနှစ်မှာ တိရစ္ဆာန်ဥယျာဥ်(နေပြည်တော်) ကို ထပ်မံတည်ဆောက်ပြီး ၂၀၀၈ ခုနှစ် ဧပြီ ၁ ရက်မှာ ဖွင့်လှစ်ခဲ့သလို ၂၀၀၉ ခုနှစ် မတ်လ ၂၆ ရက်မှာ နက္ခတ်တာရာပြခန်း(နေပြည်တော်) ကို ဖွင့်လှစ်ခဲ့ပါတယ်။
